Sfuei Mensîl Furlan Indipendent
Archivi de Patrie

ATUALITÂT – Triest e robe “Gjeriatrie” a Udin

............

Se o fasessin l’elenc des robis puartadis vie, a di chest articul no i bastarès cheste pagjine. Lis “robis puartadis vie” a son lis robariis di Triest, magari cence nancje la colpe di Triest: centris di podê, struturis di formazion e uficis decisionâi. L’ultin câs ripuartât de cronache al è chel di une scuele di specializazion universitarie de facoltât di medisine. Un colp di bisturi dât di Maristella Gelmini, ministri de Istruzion, Universitât e Ricercje, tal ambit di une riforme di organizazion (decret ministeriâl dai 31 di Març): stant che in Regjon a ‘nd jere dôs, une par ateneu, è à “unificât”, puartât dut te citât alabardade. E clarementri la motivazion e je di nature economiche. La pecje e je sedi sot il profîl procedurâl – i retôrs no son stâts nancje consultâts – sedi sot il profîl formâl: il decret ministeriâl di fat al propon la agregazion pes scuelis che no àn almancul trê borsis di studis, e i doi centris a ’nd àn trê parom. Duncje, tant Triest che Udin a saressin stadis in regule. «A podevin sorevivi dutis dôs» al spieghe Leonardo Sechi, proretôr di Udin e za diretôr de scuele di Gjeriatrie. E al rionç il president de Societât taliane di Gjerontologjie e Gjeriatrie, Nicolò Marchionni: «Dutis dôs a son in grât di rivâ, in mût indipendent, al numar minin definît di trê contrats / borsis di studi. Cheste agregazion e je une anomalie”.
A RENZULLI NO I VA BEN_ A cui che dal sigûr cheste “unificazion” no je lade propit jù, al è Aldo Gabriele Renzulli, president de Aziende pai servizis ae persone “La Quiete” di Udin e – tai agns di gjonde pal socialisim talian – za assessôr regjonâl ae sanitât. Renzulli al stave propit par definî un acuardi istituzionâl cu la Universitât dal Friûl par che i cjamiçs blancs che a studiavin chel ram de medisine a podessin lavorâ sul “cjamp”, in chê struture di vie Sant’Agostino. Al jere za a bon pont. Al mancjave propit dome l’acuardi formâl: «O vevin fat chest resonament propit cu la facoltât di medisine e cul retôr – al spieghe ae Patrie il stes Renzulli – par ufrî la grande casistiche di plui di 450 puescj jet de “Quiete” tant che puart – base pe formazion di chescj miedis in vie di specializazion».
LA LETARE AL MINISTRI FAZIO_ Daspò la gnove, Renzulli al à cjapât cjarte e pene e al à scrit al ministri de Salût Ferruccio Fazio. “O ai domandât al titolâr di chel dicasteri di intervignî par pupilâ la specialitât di Gjeriatrie te nestre universitât. Ae fonde, e je une semplice considerazion: il procès di senilizazion de popolazion furlane al è struturâl e tâl che e sarà simpri plui dibisugne di chescj miedis, massime pal nestri teritori”. Ma cjarte e pene le àn cjapade in man ancje i doi retôrs dai ateneus, Cristiana Compagno e Francesco Peroni, che a àn palesade la lôr contrarietât al ministeri de Universitât. Cussì come che il senatôr Ferruccio Saro (Pdl) al à puartade la cuistion in Parlament, par domandâ se e esist la pussibilitât di une retifiche dal decret, in timps rasonevui. Dut chest ce aial puartât? «O vin vude rispueste che la pratiche e je stade tornade a esaminâ. Chest àn al sarà cjatât une sorte d compromès e si podarà cjatâ une soluzion. Ma mi è stât sigurât che, dal prossim an, la situazion e sarà divierse. Chel cu ven, al sarà un an clâf: si fasaran i “plans trienâi” pe formazion e e sarà ripristinade la autonomie di Udin».
LA IMPUARTANCE DI GJERIATRIE_Par Renzulli, dut câs, no si trate di une problematiche dome procedurâl, cheste union di scuelis. «La gjeriatrie e je une specialitât che e covente a di une popolazion tant che chê furlane. Jo o resti convint che a varessin di jessi tirâts dentri ancje i miedis di base. Si trate di un setôr che al varès di jessi pandût sul teritori e par chest al varès di rivuardâ la ativitât mediche sul teritori propit pal fenomen impuartant di senilizazion de nestre int». Atenzion, al continue Renzulli, nol è un fenomen conzunturâl ma struturâl e ireversibil: «Il slungjâsi de vite e la etât medie che si è vie vie alçade a son dâts cierts, cun dut chel che a compuartin. Spostant la scuele a Triest, si slontane dal teritori cheste risorse e in ultime batude si dinee a Udin un cjamp e un contest dal sigûr impuartant e indispensabil».
Oscar Puntel

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +