ATUALITÂT. Tirâ la cengle nol vûl dî sierâ la bocje

Timps no facii pai aministradôrs locâi di dute Europe, pressâts di une bande di une crisi che e oblee il rigôr assolût e di chê altre di un tiessût vivarôs di associazions, grups di interès e singui citadins contraris a cualsisei gjenar di «tai» che al compuarte une riduzion dai stanziaments a pro des lôr ativitâts.
Rainer Hofmann, Artemisia Tatiana Chisca e Lidjia Basta Rainer, membris de Convenzion cuadri pe protezion des minorancis nazionâls dal Consei de Europe a àn racuelt dilunc la audizion publiche che si è davuelte a Udin ai 23 di Jugn, la denunzie di Lucio Roncali preocupât pe riduzion dai contribûts erogâts de Provincie di Pordenon a pro dal sodalizi storic «Il Cjavedâl» dulà che al è president. La associazion di Cordenons, impegnade di desenis di agns te promozion de lenghe furlane midiant publicazions di cualitât, cunvignis, ativitâts di formazion e sensibilizazion, e à gjoldût tai agns passâts – come tantis altris – dal jutori public che vuê al sarès limitât a fuart.
Dopo vê sintût in maniere informâl Palaç Sbrojavacca nus ven confermât che il cjapitul di belanç leât ae leç 15 dal 1996 nol sarès stât finanziât, ancje se l’impegn dal Ent a pro de culture e de lenghe furlane nol ven e nol podarès mai legalmentri e moralmentri vignî al mancul. Tancj a son i progjets e lis ativitâts sostignudis in maniere direte o indirete de Provincie di Pordenon che o ricuardìn, par chei che lu vessin  dismenteât pardabon o par fente, e je part fondant dal Friûl al pari des provinciis di Gurize e Udin.
I sodalizis furlans di Manià, Spilimberc, S. Vît, Cordenons, Voleson, Cjasarse, Vivâr, Midun, a varan di tirâ la cengle in prevision di timps miôr ma no sierâ la bocje.
Bêçs o no bêçs fevelâ furlan a cjase, a scuele, in glesie, a vore, tai ambients nol coste nuie e al fâs ben al cjâf, al cûr e a la societât. Tra cualchi an o varìn di podê dî che o sin furlans come e plui di vuê e no disfueant i anâi dai nestris circui, ma vivint in maniere furlane il cuotidian.
L’agnul dorât cjantât di Renato Appi tal imni di Cordenons al veglarà sul sô Cjavedâl e une bore gnove e zovine al fasarà di chest imprest no dome un simbul ma un lûc di vivarositât culturâl par dut il Friûl.
Daniele Martina