ATUALITÂT – Pre Checo Placeran

BIOGRAFIE_ Predi, insegnant, inteletuâl, ma soredut furlanist convint, pre Checo Placerean al à lassât un segn indelebil inte storie dal Friûl che lu celebre a 25 agns de sô muart (ai 18 di Novembar dal 1986). Ande sclete, personalitât autentiche e carismatic tant di jessi definît un “mît” intai scrits in sô memorie racuelts intes pagjinis dal sît web dal Istitût Ladin Furlan a lui dedicât, pre Checo Placerean al nas a Montenârs intal 1920: di chi al partìs il percors che lu puartarà a deventâ une des vôs ispiradoris des istancis autonomistis. Al è il 1932 cuant che al jentre intal seminari di Cjistilîr (Pagnà), mentri che la ordenazion sacerdotâl, consacrade intal domo di Udin, e je dal 1944. Tal stes an, al à tacât ancje i studis academics ae universitât gregoriane di Rome (al frecuentarà il “Russicum”); chest percors di formazion al larà indevant al Coleç Leonino, si completarà cu la tesi di dotorât in teologjie dogmatiche (1948) e cuntune lauree sucessive in letaris e filosofie (Padue,  1968). Su la fonde di chescj titui, al devente insegnant di religjon al Stellini di Udin e al Diacono di Cividât prime, e docent di storie e filosofie al Marinelli di Udin dopo. Inte sô cariere di professôr e je stade ancje une parentesi in Argjentine. Intai agns ’60 al sclope il so impegn par un protagonisim plui incisîf dal Friûl cu la istituzion de associazion Int Furlane (1962-63), la publicazion dal relatîf mensîl in lenghe furlane, la nassite (1966) dal Moviment Friûl, la mozion dal clericât pal disvilup sociâl dal Friûl (1967). Al devente membri e pont di riferiment di Glesie Furlane (1969-1970) e di Rît Furlan. In paralêl, si dediche ae valorizazion de lenghe furlane midiant de traduzion di tescj sacris, esperience partide cu la version in marilenghe dai Vanzelis (1958), lade indevant dopo cu la traduzion dal messâl roman (completade intal 1977) e de Biblie, opare concludude intal 1984 e là che si met dongje di lui pre Toni Beline. Memorabil il so coinvolziment atîf inte bataie pe nassite de Universitât furlane e intal motivâ il Friûl ae rinassite dopo il taramot dal ’76.
Ilaria Gonano