IL FERÂL. Mandi, vôs dal Friûl

Mandi, pre Checo, vôs dal Friûl!
Mandi om che tu âs incjarnât inte tô vite dut ce che di plui grant e gjenuin, e ancje di scart, il to e nestri popul al puarte intorsi. Se ogni om al à une so filusumie, un so naturâl un so “habitat” culturâl che i dà savôr e che lu cualifiche, disferenziantlu di ogni altri, te no podìn pensâti se no furlan. Une volte tu âs dite che, gambiant aghe, ancje il pes al gambie di savôr. La tô aghe spirtuâl, culturâl, umane e je stade dome chê furlane. E dai valôrs de furlanetât tu tu sês stât il grant cantôr: cu la peraule, cui fats, cun dute la tô vite.
Mandi, om di sapience, che tu âs savût lei plui in là e plui in dentri di ce che i nestris puars vôi materialiscj e vuarps no rivin a viodi. Tu âs savût supâ de nestre storie la medole plui sauride e tu le âs sfruçonade par nô predis, par nô scuelârs, par nô popul furlan. Tant tu âs savût lâ in alt e in sot te storie e tant tu âs savût fânus gjoldi di cheste ricjece e tignînus in bon dal nestri jessi furlans. Cun ducj i limits, che ducj nus ai àn simpri ricognossûts. Dome che tu tu âs savût fânus preseâ ancje lis nestris buinis cualitâts, lis nestris virtûts. Jessi furlans, cun te, e je stade une braure, une bandiere, une concuiste. E cuant che ducj (o scuasit) i mestris nassûts in cheste tiere si son butâts te grande trasêf de talianitât là che a podevin sigurâsi e bêçs e podê e inomine, tu tu âs mantignude la tô frescjece culturâl di riul di mont e il savôr de vite di paîs e la sapience dai vons e dai paris e la semplicitât dai nestris fruts. Sempliç come une colombe e vuait come un sarpint tu sês stât, pre Checo. E di te nus reste chel to ridi plen di vite, chel to savê dâi a ogni fat e a ogni robe il so puest te storie e tal mont. Tu nus âs insegnât a preseâ no ce che al lusive, ma ce che al valeve. E a misurâsi cu lis veretâts di fonde, che a àn savôr di eternitât e che a resistin, a lis modis e a lis picis e a lis mafiis che a incein e che a incjochin e che a passin lassant une grande lamiece spirtuâl e di vite.
Om di veretâts eternis, om di valôrs trassendents, om di visions di secui. Om che si è nudrît di storie, om che al à fate storie, om che nus jude a puartâ indenant la storie. Storie vere, di popul e di glesie, che e devente “cuintristorie” e provocazion.
Mandi, om e predi salvadi, che tu ti sês salvât propit pe tô salvadiece. A àn dit che tu jeris “scomut”. Par cui? Ben par lôr! Par nô no tu jeris scomut. Che anzit tu nus âs segnade la strade, tu nus âs fat lusôr tal nestri scûr, tu nus âs passûts te culture e te fede, tu nus âs fevelât cu la tô bocje di sapience e tu nus âs fat sintî il revoc de peraule di Diu. Tu che no tu sês mai stât une ore tun paîs, tu âs capît che il predi al à di jessi insedât tal so popul come il pes te aghe. E tu âs capît plui di dutis lis comissions e i vescui, che la glesie o e riscje dutis lis sôs brisculis pe sô int o no val nuie e al è miei no vêle, parcè che impen di sâl e devente droghe e impen di mari che ti nudrìs e devente madrigne che ti folpee.
Mandi, om di paîs che no tu âs vude pôre de mafie de citât e tu i âs dade dignitât a di un e a di chê altre. Tal paîs tu nus âs fat viodi la comunitât primarole di civiltât e pe citât tu âs volût no dome panze e tacuin ma ancje culture e sience. E tu ti sês batût cuarp e anime pe universitât dal Friûl.
Mandi, pari di un partît che tu i âs volût ben cul afiet gjelôs di une gjate; che ti vignive voie di patafâlu parcè che nol veve avonde sgrimie e al tradive i valôrs de tô filosofie politiche. E di chê altre bande no tu volevis fruçâlu parcè che al sarès stât come copâ un fì. E cheste paternitât tu le âs sintude pardut: te politiche, te glesie, te scuele. Tu murivis pal Friûl, par chel Friûl che ti faseve murî. E cun dutis lis passions e lis gjelosiis e i improperis dai amants tu âs viodût il to Friûl a colâ, a tornâ a jevâ sù, a clopâ, a vendisi, a lassâsi comprâ. Tu varessis volût copâlu; tu varessis volût mangjâlu. E in dute la tô vite la tô disperazion si è compagnade cu la sperance: che in Friûl, tal ultin, il sintiment e la cussience de sô dignitât a varessin vude la miei su la coiarìe e il meninfot e la rassegnazion. Il Friûl ti è vignût ancje in sium, chel Friûl che al jere il to sium e che ti tormentave ma che al jere ancje la reson dal to vivi e dal to scombati.
Mandi, om di fede, che tu âs provade inte tô cjar la tentazion di jessi bandonât di Diu e dai oms. E tu ti sês ribelât come Jop, palesant in dut la penzece umane de tô fede, che no à mai disseparât ce che al è de anime di ce che al è dal cuarp, la dimension spirtuâl di chê storiche e temporâl, cheste vite di chê altre. Cuant che tu ti sês viodût a lâ denantdaûr, tu âs maludide la gnot che tu sês stât cjapât sù e la dì che tu sês nassût. Come te plui sante tradizion de Bibie. E dopo di vê bramât e berlât, tu âs pleât il cjâf e la schene. E tu ti sês indurmidît tai braçs di Chel che nus lambiche e che nus salve restant simpri mistereôs in ce che al fâs. Tu sês muart perdonant e domandant perdon e bussant un Signôr di cjarte come lis nestris nonis, tu che tu vevis svualampât come acuile tes altecis plui sflandorosis de teologjie e dal misteri. Grant e piçul, anzian e frut, om che al viodeve indenant un secul e che magari di dongje nol disserneve ni personis ni câs. Tu âs podût permetiti grandis pecjis, parcè che tu âs vudis grandis cualitâts. Cu la cuâl che nô o sin cjamâts di pecjis ma cence cualitâts o virtûts.
Mandi, cjar e cucjar dal Friûl. Mandi, patriarcje. Mandi, vôs dal Friûl. Di chel Friûl che al jere prin di te e che al è restât ancje dopo di te. Dome che, dopo di te, nol è e nol à di jessi compagn di prin. Parcè che al à viodude la lûs.
PRE ANTONI BELINE
La Patrie dal Friûl, n. 12 Dicembar 1986