ATUALITÂT – Popui intal balon

«We are nations of Europe – Goodbye Spain»: pe finâl di Cope dal Re a Valencia si sfidavin i catalans dal Barcelone e i bascs dal Athletic Bilbao, e cussì al jere scrit suntun grant strisson cu lis musis di Zapatero (il premier spagnûl) e Rajoy (il leader de oposizion), tant par nô fâ difarencis jenfri çampe e drete, stimadis compagnis par nazionalisim. Il strisson al è stât fat ritirâ daurman dai polizais, ma no àn podût impedî ae maiorance dal public di sivilâ a plen l’imni spagnûl sunât prime dal inizi de partide. La television TVE che e trasmeteve in direte l’event e à censurât l’audio de proteste cu la scuse di un «probleme tecnic», jevant un scandul che al à puartât ae destituzion dal responsabil dal sport de emitente. Tancj i spetatôrs che intant che al sunave l’imni si son zirâts cu lis spalis viers il cjamp di zûc, dant acet a un invît in chel sens che al jere stât fat di une campagne vie stampe.
Di marcâ il fat che une volte tornade a Bilbao, la scuadre dal Athletic e je stade fiestezade di miârs di sostenidôrs, ancje se a vevin pierdût e i zuiadôrs a vevin declarât che no mertavin di sei fiestezâts.
COPE BRETONE_ In France invezit, pe Cope si sfidavin Guingamp e Rennes, dôs scuadris bretonis. Al «Stade de France» di Paris, tal mieç di une sdrume di bandieris bretonis, a vinci par 2 a 1 al è stât il Guingamp, scuadre che e zuie tal campionât di B.
«NAZIONÂL» PADANE?_ In Italie la situazion no je cussì ferbinte: la uniche notizie che e rivuarde il balon e i popui e je chel dal torneu di balon «Viva World Cup» (riservade a scuadris di paîs no afiliâts ae FIFA) li che e zuie la «nazionâl» de Padanie. I leghiscj no àn invidât nissune selezion furlane, pûr jessint il Friûl un popul che ur è dongje – ancje se ni par storie ni par gjeografie inte Padanie – ma invezit a fasin zuiâ cun lôr il furlan Ganz. In sumis, i «verts padans» a protestin tant cuintri de Italie che e tibie i popui dal nord, però daspò a fasin compagn: a clamin la lôr scuadre une «nazionâl», ancje se tal stes teritori padan a son altris nazionalitâts. «Curtis e che si tocjin» come che al disarès Arnalt Baracêt: l’armamentari retoric al è come chel di ducj i stâts centraliscj e nazionaliscj che a esistin za.
Dree Venier