ATUALITÂT – No vuei lis bombis tal gno curtîl

Avian isal l’«atomic garden» (zardin atomic, ndr) dal Friûl? Par cinc personis che a vivin in bande de base americane sì, tant che tal 2005 a àn citât al tribunâl di Pordenon i Stâts Unîts di Americhe e il so segretari de difese di chê volte Donald Rumsfeld, pe presince prossumade di bombis atomichis tal teritori furlan. A Fevrâr di chest an la Cassazion e à fermade la cause par un difiet di jurisdizion suntun teritori che, formalmentri, al è gjestît di une altre nazion aleade (vâl a dî, il teritori de base). Ma il Comitât «Via le bombe», un grum atîf tal web (par esempli tal sît www.vialebombe.org) al vûl lâ indenant te sô vuere ae atomiche, tant che al dîs che a son bombis ancje in altris bandis de Italie. Par esempli, in Emilie e in Venit, in Campanie e in Lombardie. Ma chestis bombis sono o no sono? Tal circuit dai «pacifiscj» no son dubis: in Friûl a son plui tumôrs che in altris regjons, e cheste par lôr e je une  prove dal fat che lis bombis a son sot de base. Di cuintri, in provincie di Pordenon une vore di personis a vuelin ben ai americans, e a viodin in cheste proteste dome un mût par contestâ la lôr presince sul teritori. La uniche robe di fâ e je chê di informâsi, cence prejudizis: par esempli, leint un dai pôcs libris sul argoment, vâl a dî chel des Edizions L’Omino Rosso, intitulât «Aviano-Usa, un angolo di Stati Uniti nel cuore del Nordest», scrit tal 2007 di Dario Bortolin e di Enri Lisetto. Leint, si capìs cemût che la base e alimenti di simpri misteris, par vie dai siei segrets. Par esempli, cualchidun al è sigûr di vê viodût timp fa un Ufo…
Redazion