Sfuei Mensîl Furlan Indipendent
Archivi de Patrie

ATUALITÂT – Cumò i missii, ma no stin a dismentâsi dai avions

............

A proposit de base di Davian, oltri ae cuestion dute di viodi dai missii, al merte cualchi riflession il probleme dai AMX, i avions che a son a stâ te base. I politics a fevelin di «limitâ» il «disagio» (lôr i dan chel non alì) dal rumôr, ma a dismentein dut il rest: il passaç a basse cuote sui paîs, i fums e lis tantis conseguencis, che no stoi nancje a fâ la liste. Nissun no si insumie di domandâ il rispiet de int. Al plui a rivin a bruntulâ par vie dai masse pôcs bêçs che a rivin a tirâ dongje par colpe des «servitûts militârs». Cui avions AMX, che ju vin vûts par un pôcs di agns ancje a Rivolt, in dodis agns a son stâts 700 incidents, cun 14 pilotis muarts (in Italie). Intune scuele a Casalecchio, in provincie di Bologne, un avion Mb 326 de Aermacchi, al è plombât parsore copant 12 arlêfs che a jerin li a studiâ. Nissun no si vise di Reimstein, in Gjermanie, dulà che tal 1988 a son stâts copâts 67 di lôr propit di un Aermacchi des Frecis. Denant di chescj fats i nestris aministradôrs, scuasit ducj, no si son nancje çugnâts. Bisugne dî che nancje la int furlane no si à dât masse pinsîr, salacor parcè che i gjornâi, e la informazion in gjenar, a fasin un grant batibui a pro de P.A.N.. Al sucêt avonde di râr che si sinti une vôs cuintri, cualchidun che al disi alc fûr dal coro. Si à, insome, dât dongje une opinion publiche une vore pôc critiche, formade a no savê e, robe che mi preocupe une vore, al ven fat in maniere che no pensi, ma dome che e bati lis mans.
Di resint un grup partitic talian, midiant dai siei rapresentants di chenti, al à proponût di «judâ» la int che e je sogjete al «disagio» che i diven dal sei dongje dal Cjamp di Rivolt, massime par vie dal rumôr. (Cuant che a provin i motôrs o che a svolin, la int di Visepente, Vilecjasse, Gnespolêt, Bean, Vilevuarbe… no rive nancje a fevelâ cun chel che al stâ te puarte dongje), ducj chei altris problemis e pericui («disagi», par lôr) no esistin, o no san che a esistin. Secont lôr la soluzion no je chê di pretindi che almancul no svolin a basse cuote parsore des cjasis, ma chê di fâ in maniere che la int e puedi domandâ contribûts par podê meti sù i veris doplis intai barcons e intes puartis…
Intant de passade legjisladure, cuntun guvier di centri-çampe, la spese pes fuarcis armadis e je lade sù dal 30% rispiet a la legjislazion di prime, e no vin plui il Bloc di Varsavie… O varès gust di podê dâ numars resints sul cost de base in cuestion. Ce che o vin in man al è un calcul a pressapôc, e no masse resint. Fat di un ex uficiâl di marine, li che tai agns dal ’90 al stimave che la base di Rivolt a costàs ai contribuents la bielece di un miliart (1.000.000.000) di liris in dì, dome par podê fâ svolâ lis Frecis.
In dì di vuê, intune situazion economiche cussì grivie, cuale puedie sei la spese? No si lu sa, ma si pues zurâi che no je di sigûr chê dai agns dal ’90. Lis domandis a judin a tignî dismot il çurviel, parcè che po si cirin lis rispuestis. Il fat al è che chei che a varessin il dovê di dâlis no lis dan. Cun di plui e no par ultin, si trate ancje di un probleme etic, parcè che lis armis a copin ancjemò prime di scomençâ a copâ, i beçs doprâts par fâlis a vegnin tirâts vie di altris bandis, bêçs publics e duncje servizis publics par ducj che a vegnin cjastiâts par parâsi di no si sa ben cui. Salacor une rispueste pussibile si podarès vêle cjalant ben cui che a son i sponsorizadôrs des manifestazions des Frecis, al bastarès forsit dâ une cjalade al ultin manifestut publicât pai 45 agns de P.A.N.(Fincantieri, Aermacchi, Agusta…), cuissà che alore no rivassin a stratignîsi dal batiur lis mans e a fâsi cualchi domande di plui.
(Mauro Della Schiava, pal comitât No Amx)

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +