Il poete Erasmi di Voleson al veve une idee precise dal Friûl, ancje se no savìn se e fos compagnade di une vision autonomistiche. Cussì al scriveve, intune poesie dal 1589:
«Siede la patria mia tra il monte e il mare/ quasi theatro ch’abbia fatto l’arte/ non la natura ‘a riguardanti appare,/ e ‘l Tagliamento l’interseca et parte:/s’apre un bel piano, ove si possa entrare/ tra ‘l merigge e l’occaso/ e in questa parte/ quanto aperto ne lassa il mar e ‘l monte/ chiude Liquenza con perpetuo fonte».
La storie dal moviment autonomist furlan, almancul chê dal ’45 indenant, e je avonde cognossude; mancul cognossude e je invezit chê di imprin, che e vâl la pene di contâ.
Sul gjornâl socialist sart «La folla», un ciert siôr Lassalle al veve scrit, tal 1907: «O vin voie di jessi forescj pe Italie, o volìn jessi forescj par dirit, come che o sin forescj pai vistîts, pal lengaç, pal costum, pe nestre nature, come che o sin di fat forescj denant a ducj chei altris che Rome e da dongje». Peraulis fuartis, chestis, di savôr cuasi indipendentist.
COMIZIS PAR FURLAN_ Cualchi an daspò, ancje in Friûl si sintì la stesse musiche, che e vignive simpri dal cjamp socialist, metude subit a tasê dai fats ma che e palesave un stât di anim difondût. Ripuartant la notizie che un maressial dai carabinîrs al veve improibît a un esponent socialist (Zuan Minut, ndr) di fâ un comizi in lenghe furlane, il gjornâl «Il lavoratore della sera», tal Març dal 1920, al scriveve franc: «A cheste notizie dut il Friûl, dal Lusinç al Tiliment, des Alps Cjargnelis al mâr, al sgrisularà di sacri disdegn. Cence altri si pues za previodi che chest sacri disdegn al sarà il pont di partence par un larc program di azion pai nazionaliscj furlans. Al nassarà un partît separatist furlan, che al reclamarà la fondazion de republiche furlane.»
Lis robis no son ladis come che il gjornâl si augurave: no cate che i furlans a vessin cuistade une cierte cussience linguistiche e che a fossin sburtâts di plui bandis a fâ alc, si sierarin dentri tal mît de «piçule patrie», rivant tart al regjonalisim e al autonomisim dal daspovuere.
AUTONOMIE SABORADE DI FÛR_ A proposit di sburts esternis, si pues vê indiment il tentatîf dai austriacs dopo Cjaurêt di dismovi un sintiment nazionâl furlan in funzion anti taliane; tentatîf falît tal Friûl talian, ma recepît in maniere paradossâl in chel austriac. Il 25 di Otubar dal 1918, tal cors de ultime sedude dal imperiâl reâl parlament di Viene, il deputât Giuseppe Bugatto di Gurize al domandà che al popul furlan i vignìs concedût il dirit ae autodeterminazion tant che entitât nazionâl divierse di chê taliane, di chê todescje e di chê slave.
Viers la fin de seconde vuere mondiâl, i furlans a forin ingolosîts cuntune dople schirie di atrativis nazionalitariis. Imprin, chê dai ocupants naziscj – propit chei che a vevin imprometût ai Cosacs di fâ dal Friûl la lôr patrie – , che par mieç dal Gaulaiter Renier, a afermarin che i furlans a jerin une nazionalitât diferente di chê taliane, e a ciririn di saborâ la cuistion midiant de publicazion di un setemanâl, che si clamave «La voce di Furlania».
Tal stes periodi, i partigjans comuniscj jugoslâfs a ciririn di convinci i garibaldins furlans – test di Stalin sot man – che il Friûl al jere une nazion par so cont, inviant fintremai un progjet che al calcolave il Friûl tant che future setime republiche federative jugoslave. Ducj i doi i progjets a falirin par vie che a jerin forescj e contingjents. La cuistion furlane no jere ancjemò maduride a nivel di autocussience: al voleve cualchidun che le indreçàs in cheste direzion.
IL MOVIMENT NOSTRAN_ Chel cualchidun al sarà il Moviment Popolâr Furlan pe Autonomie regjonâl, che tal so manifest dal Zenâr dal 1947 al declarave di sei nassût par «saborâ lis necessitâts presintis de nestre regjon, e par domandâ a Rome la plui largje autonomie aministrative, tal contest de unitât taliane». Compit dal Moviment al jere chel di «unî, parsore di ogni partît, dutis lis fuarcis, fin a vuê a slas, di chei che tes autonomiis regjonâls a viodin la uniche garanzie des libertâts democratichis».
Finalmentri un tentatîf ambiziôs no forest e destinât a durâ: une grande sfide, un grant obietîf, ambiziôs e trasversâl, ancje parcè che tal comitât a jerin presintis diviersis espressions politichis e dutis lis realtâts teritoriâls de tiere furlane: Udin, Cjasarse, Gurize e Puart. Tra i firmataris, personaç dal nivel di Luigi Ciceri, Chino Ermacora, Alessandro Vigevani, Pier Paolo Pasolini, Luigi Pettarin, Attilio Vignudo e il professôr Gianfranco D’Aronco, che indi jere il Segretari Gjenerâl.
Par vêr, la bataie pe autonomie e jere tacade a metât dal 1945, cuant che Tiziano Tessitori, inte puare sede de Societât Filologjiche di Palaç Venerio, presentant la riviste «Ce Fastu?», al riclamave la atenzion di chei che a jerin presints su la costituzion future, rivendicant al Friûl il dirit di jessi metût tra lis regjons autonomis. Tessitori al metè jù lis sôs ideis intun saç che al fo publicât, in trê pontadis, di un cuotidian locâl, e a daspò dai complasiments che al ricevè, al inmaneà, dutune cun cualchi amì, la Associazion pe autonomie furlane, che e nassè inte locande «Alla buona vite» di vie Treppo. Al jere il 29 di Lui dal 1945. Tal esecutîf de Associazion – intitulade ae «Patrie dal Friûl» che e veve par simbul la acuile patriarcjine e il sproc «Di bessôi» – o cjatìn, dal Novembar di chel an, ancje il professôr Gianfranco D’Aronco.
Il Friûl che i autonomiscj di chê volte a sostignivin, al jere un Friûl autonom dal Venit (di culì il sproc «di bessôi»), un Friûl tout court, cence nissune apendîs.
BORGHESIE VUARBE_ Une bataie dificile, contrastade fintremai di chei di cjase, la «pars destruens» de classe politiche nostrane. Une classe politiche descrite ben di Menis intun passaç che, pûr riferît ai agns che a van dal 1866 al 1915, al permet di intivâ cualchi sugjeriment valit ancje par chê rivade dopo de seconde vuere mondiâl. Al scrîf Menis: «La classe politiche locâl, paraltri di laudâ pe sô onestât aministrative, no je stade buine di afrontâ i problemis cun visions di prospetive largje, ni e à mai vude une percezion lucide de urgjence di tutelâ la unitât storiche e etniche dal Friûl. La classe borghese, di bande sô – mo coltivant sentimentalmentri problemis nazionâi ardints, mo entusiasmantsi ai problemis grâfs dal timp tal non di ideologjiis socialistis o catolichis – , e pierdè cuasi dal dut la cussience de sô individualitât etniche culturâl, pierdint dispès il contat cu la realtât sociologjiche popolâr.»
Roberto Iacovissi
___________________________
Il Friuli a mezzadria
L’ultin libri di Gianfranco D’Aronco, «Il Friuli a mezzadria» (Edizions «La nuova base», Udin), al nas di une sielte antologjiche dai articui, publicâts dal 1945 al 2008, sul teme de autonomie regjonâl. Tes pagjinis dal libri e comparìs simpri une linie costante: la rivendicazion di un Friûl che al sedi finalmentri e istituzionalmentri ricognossût come une realtât par so cont. Il libri al riclame vôs di oms di buine volontât: tacant cun Tiziano Tessitori e Josef Marchet, che a àn lassât il segn, rivendicant la dignitât e l’onôr di un popul furlan e cristian.
La posizion dai autonomiscj e je detade de logjiche plui elementâr. E pûr chei dûrs di capîle a son in tancj. E je la impression, o la ilusion che vuê lis robis a vadin a pene pene miôr: naturam expellas furca, tamen usque recurret. Al vignarà il timp.
(Redazion)
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +