Daûr dal interès nassût pe mozion indipendentiste presentade dal «Partito Sardo D’Azione», o vin sintût il prin firmatari, l’onorevul Paolo Maninchedda (te foto a çampe), par resonâ cun lui sui temis dal indipendentisim, sedi sart che no. Paolo Maninchedda, 48 agns, al è conseîr regjonâl e professôr di Filologjie romanze ae Universitât dai Studis di Cagliari, al veve za frontade la cuistion indipendentiste vie pe campagne eletorâl, cjapant sù consens e interès ator dal teme storic dal «Partidu Sardu». La sô intenzion e jere chê di tornâ a meti fûr la istance indipendentiste te tribune politiche sarde, intune otiche moderne e positive, difûr dai folclorisims, ancje in gracie dal so blog, une vore frecuentât e vivarôs. Lu vin sintût par capî miôr lis resons de sô azion.
Nus puedial ilustrâ la vuestre mozion?
Te part introdutive si àn indiment lis responsabilitâts dal Stât talian in mert al sotsvilup atuâl de Sardegne. Tal dispositîf si impegne la Zonte regjonâl a inviâ un procès di disimpegn istituzionâl de struture statâl atuâl de Republiche taliane. La novitât e je che la part introdutive no je rievocative di responsabilitâts storichis pregressis, ma di chês resintis, ben cognossudis e presints te cussience dai sarts (par esempli, l’incuinament dai sîts industriâi plui impuartants de Sardegne; la desertificazion dal setôr manifaturîr; l’ecès di pression fiscâl e tarifarie su lis impresis e sui citadins; il sisteme di regulis e di privileçs che al sta dant in man la Sardegne a pocjis impresis dominants, aromai prossimis a configurâsi tant che oligopoli; il tentatîf di discjariâ sul belanç regjonâl i coscj dal welfare, de scuele e dai ents locâi, in plui di chei za a caric de Regjon, dai traspuarts e de sanitât e v.i.). La part dispositive no configure ni e evoche un percors rivoluzionari eversîf, ma un procès di disimpegn a pats, mai configurât fintremai vuê.
Ce riscuintris vêso vût?
Grande difidence des fuarcis politichis, grande atenzion dai citadins.
Sul vuestri sît, a son regjistrâts cetancj consens di bande de int. Ce rilêf aie vût la notizie in Sardegne?
Sui media, la notizie e je stade dal sigûr valorizade, ma cence entusiasim particolâr.
Cuale ise la situazion dal autonomisim e indipendentisim sart tal 2009, ancje a pet dal risultât eletorâl?
Par noaltris, l’autonomisim nol è sinonim di indipendentisim. Anzit! L’autonomisim e je la tombe de indipendence. I risultâts eletorâi des regjonâls dal 2009 nus rinfrancjin, e inmò di plui su la fonde dal insucès des europeanis. Nô o sin convints che la Italie e je intune decjadence ireversibile. E je fraide dal pont di viste istituzionâl, finanziari e morâl.
Se la Italie e à un avignî, chest nol è tal pseudofederalisim di Bossi, che invezit te sostance al rapresente dome une architeture istituzionâl, buine di stabilizâ la egjemonie dal Nord dentri dal Stât centralist di memorie napoleoniche. Se e à un avignî, al sarà tal contest di un implant confederâl, cu lis regjons o lis macroregjons che si compuartin di stâts tai lôr teritoris, e che si federin pes funzions sorenazionâls.
Ce pensial dai tais resints ai finanziaments de 482 di bande dal Guvier?
Il Stât talian nol à par nuie interiorizade la impuartance e la ricjece des lenghis minoritariis. Il Stât talian al à une cussience istituzionâl che e je fie, di une bande, di Napoleon (passant pai Savoia, che al pensi lui!), e di chê altre dal dogmatisim papist.
Pensaiso di fâ cualchi azion ancje rivuart a cheste situazion?
Noaltris o vin une idee des politichis di planificazion linguistiche e culturâl come di une part rispiet al dut. O intint dî che il teme de lenghe al è par nô dome un toc de cuistion dal Stât sart, e cussì lu tratìn.
Vêso savût de sentence de Cort Costituzionâl cuintri il test de gnove leç regjonâl dal Friûl-Vignesie Julie, che e à acetât 5 dai 6 ponts contestâts dal Guvier?
Sì, e le vin ancje comentade une vore. La Cort Costituzionâl e je daûr a man a man a cambiâ piel, e e reagjìs al cambiament dal contest politic cirint di frenâ i mudaments reâi. Chest, par evitâ che la Cjarte e sedi sorpassade de realtât. Si à di lâ indevant a fâ deventâ vecje la Costituzion.
Vêso vût o isal ipotizabil cualchi colegament cui autonomiscj furlans?
Noaltris no sin autonomiscj, o sin indipendentiscj. Dit chest, jo di persone no, ma il Partît Sart al à une salde e consolidade politiche foreste che e passe pe Alleanza Libera Europea (Ale).
Vêso colegaments cun altris nazions cence stât?
Sì, par mieç de Ale, ma no nus plâs fevelant.
Ivo Murgia, Dree Venier
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +