Sfuei Mensîl Furlan Indipendent
Archivi de Patrie

ATUALITÂT – Libri vert pe Sanitât-3

............

Dotôr Beppino Colle, diretôr sanitari de Ass3, aial let il gnûf Libri vert su la sanitât regjonâl?
Sì, lis mês osservazions lis ai za mandadis al assessôr, doprant la vie istituzionâl, ancjemò un mês za fa.
E ce pensial?
Che e je dal sigûr une iniziative gnove, che e à dât la pussibilitât di tirâ dongje parês e judizis. L’impuartant al è cumò che su chest materiâl e sedi fate une opare di programazion, che e tegni cont de maiorance dai intervents.
E lui, cuâi rilêfs aial fat?
No ju volarès rindi publics. Apont, o ai vût miôr cjaminâ sul troi istituzionâl e inviâ a Kosi? il gno pont di viste, traviers i mieçs indicâts. Spietìn e viodìn ce che al burìs fûr.
Po ben, Colle: si sarà fat une sô idee sul stât di salût dal sisteme sanitari regjonâl?
Dal sigûr nol à la fiere. Mi pâr anzit che al deti buinis rispuestis aes esigjencis dai utents: al è ben furnît e al da la juste atenzion aes tecnologjiis avanzadis. Si à di cressi ancjemò, invezit, tai rapuarts inter personâi fra operadôrs e cui pazients.
Ven a stâi?
Tal nestri lavôr o varìn di recuperâ chê sensibilitât che nus distingueve tal passât, viers i malâts. Mi spieghi: infermîrs e miedis a jerin assistents, prin che dipendents. Cumò al somee che o setin plui dipendents che assistents. Dal ciert, chest al vâl a ducj i nivei. Al covente recuperâ l’aspiet uman, tal nestri lavôr. La tecnologjie e à sburtât cheste rivoluzion che paradossalmentri si metin tes mans de sience, lassant de bande il fatôr uman. La organizazion de sanitât e à di cirî l’ecuilibri just fra aziendalisim e umanizazion, ma cence restâ indaûr cu la tecnologjie. E sarà cheste le gnove sfide. Anzit: il gnûf teren di coltâ.
Lui al lavore pe Ass numar 3. Apont, le aziende socio sanitarie dal Friûl de Alte: realtât di mont, par di plui. Cuâl saraial il destin dai piçui ospedâi?
A varan di vê e di rispietâ «standards» minims. E su chescj si scuen jessi «di fier», par vie che e va sostignude prin di dut la sigurece dai pazients. A àn di funzionâ par fâ front aes necessitâts de utence e a àn di deventâ un riferiment ancje di un pont di viste sientific e tecnologjic. No si pues no tignî cont de lôr funzion. E la nestre Regjon no pues fâ di mancul di lôr, se ben organizâts.
Cemût viodial l’ûs des nestris lenghis te sanitât taliane?
Si sin dâts un grum da fâ. Cjapìn il furlan: il rapuart jenfri miedi e pazient al ven sburtât, al è plui clâr, plui comprensibil. Saial trops che mi fevelin par furlan cuant che a àn bisugne dal diretôr sanitari? E je propit une cuistion antropologjiche: in marilenghe a cjatin espression ancje i sintiments.
E par chês altris lenghis de nestre regjon?
O vin situazion autoctonis, là che o vin cirût di dâ rispuestis, traviers cors di formazion dai nestris operadôrs. Une volte che a cognossin la lenghe, cheste situazion e podarès rapresentâ un pont di fuarce soredut pe liberalizazion dai flus dai utents. Chest al vâl pal sclâf, plui che pal todesc. O pensi a la int che e jentre in Friûl de Europe a soreli jevât, plui che de Austrie.
Ma cussì a son rivâts ancje i lôr infermîrs. Un pôc tant che il vencul dal idraulic polac.
No lu ai viodût positivementri, il lôr inseriment, ancje se al è stât un pas obleât par vie de carence dai nestris. Al è un fat che la introduzion dai operadôrs extracomunitaris tai nestris ricoveris al à complicât propit i rapuarts umans cui nestris vielis. La comunicazion e je un pont centrâl te cure. Cemût che o ai dit prime: par furlan si esprimin ancje i sintiments.
OSCAR PUNTEL

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +