Sfuei Mensîl Furlan Indipendent
Archivi de Patrie

ATUALITÂT – Letaris: Un imbroi clamât Italie

............

Chest an cu ven, 2011, al sarà marcât, par di plui, cun doi fats che nus rivuardin ancje nô tant che furlans, un che si podarès clamâlu plui di dut burocratic (ma che al devente ancje politic) e un plui politic: il censiment de int dal Stât Italie e l’inovâl dal stes Stât, che al tacà a vê chel implant che o viodìn inte plui part dal so teritori, propit intal an 1861.
Clarementri, cheste date no varès di rivuardâ il Friûl, che al è stât cjapât e ocupât in dôs butadis seguitivis: un toc, chel udinês, dal 1866 e chel altri, ven a stâi chel gurizan daspò dal flagjel de vuere 1915/18.
Jo, che no soi par nuie seneôs di fâ fieste par un cjadalan di chê fate, o speri che chi di nô, che se nol è altri che par rispiet de matematiche i 150 agns a varessin di colâ dal 2016, si vedi di lassâ di bande, almancul par cumò, e magari par simpri, lis celebrazions che a son magari cussì no bielzà programadis, e tacadis, ancje chenti vie.
(Ce che al vûl dî cuant che no si cognòs la storie!)
Che in Friûl no si vedi di fâ fieste par chest inovâl al varès di sei un fat logjic: cemût si fasial a fâ fieste esaltant un fat che nus viôt vitimis, tant che la plui part de int  cjapade dentri intun Stât che al è il risultât de prepotence e dal imbroi?
O varessin, impen, profitant di cheste ocasion di corot, di cirî di lâ a font sui fats de storie vere che nus à fats colâ inte vuate «taliane». A son stâts, in chescj agns, publicâts studis impuartants e documentâts che a puedin fânus lûs mostrantnus la storie vere, che chê che nus àn passûts cu la lôr scuele e je poiade su la falsetât, al pont che a son rivâts adore di convincinus che il diaul al è muart di frêt.
O fasaressin ben, o pensi, di fâ un tant: par nestre documentazion, par procurâ di colmâ cualchi grande concje che i sin colâts dentri midiant di une scuele bausarie e, salacor, nus zovarès ancje a nô par cjapâ il spirt che al covente par ripiâ a scombati cun plui cognizion e snait pe nestre vere nazion, che no je di sigûr no chê taliane. Mandi!
Rem Spicemei
Visepente,
ai 19 di Lui dal 2010

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +