ATUALITÂT – Lenghe: aleance cu la Sardegne

Friûl-Vignesie Julie e Sardegne a costituiran une taule permanent di coordenament pe metude in vore des politichis di tutele des lenghis minoritariis. Al è ce che a àn concuardât ai 13 di Lui a Orosei (Nùgoro) l’assessôr regjonâl a la culture Roberto Molinaro intun incuintri cun Maria Lucia Baire, assessôr a la culture de regjon autonome de Sardegne. L’incuintri al è stât in ocasion dal seminari internazionâl «Nùmenes de logu (i nons di lûc de Sardegne) tra toponomastiche storiche e politiche linguistiche». La cunvigne e je stade promovude de Regjon Sardegne cu la colaborazion des Univesitâts di Casteddu e Tàthari, in prevision de redazion di un grant «Atlant toponomastic sart», publicazion patrocinade e finanziade de stesse aministrazion regjonâl.
DOPLE FINALITÂT SU 3 PONTS_ Il coordenament permanent cu la Sardegne, che al sarà uficializât cuntun Protocol di definî tes prossimis setemanis, al à une dople finalitât: agjî insiemit viers il Stât par che a sedin mantignûts i nivei di trasferiments dai agns passâts a pro des lenghis minoritariis e studiâ «buinis pratichis» in materie. Par chest la atenzion e sarà concentrade su 3 argoments: l’ûs des lenghis minoritariis tes istituzions; l’ûs tai mieçs di comunicazion di masse; l’ûs tes scuelis, «un teme – al à dit Molinaro – che Friûl-Vignesie Julie e Sardegne a condividin tai problemis e tes aspetativis». La aleance tra lis dôs regjons e cjate aliment de constatazion che par dutis dôs la autonomie speciâl e je inlidrisade te presince di minorancis che, pal F-VJ, e cjape dentri cuasit dut il teritori regjonâl (215 su 218 comuns).
SEGNALETICHE BILENGÂL_ Vie pe prime zornade dal seminari di Orosei al è intervignût ancje Marco Stolfo, diretôr dal servizi Identitâts linguistichis de Regjon F-VJ che al à puartât un contribût pe riflession su «Problemis e criticitâts te realizazion di une segnaletiche e cartelonistiche bilengâl».
ARC / Redazion