Sfuei Mensîl Furlan Indipendent
Archivi de Patrie

L’alcol inteligjent

Mara Piccoli

“No sta mostrati omenon cul bevi
Parcè che il vin a ‘nd à ruvinâts tancj…
Il vin, pai oms, al vâl compagn de vite,
ma dome se tu lu bevis te misure juste.
Ce vite ise mo chê di chel che i ven gjavât il vin?
Al è stât creât sul imprin par dâ ligrie.
Al è gjonde dal cûr e ligrie dal spirt
Il vin bevut tal moment just.
Bevi masse vin al cope il spirt
Al dismôf il convuls e al fâs colâ.”
Siracide 31,25-30
Al samee scrit îr, ma chest test al è dal 180 prin di Crist, parcè che la cuistion dal abûs di alcol e je vecje come il mont. In Italie il 69.7% de popolazion al dopre bevandis alcolichis ogni dì, ma in Friûl chiste percentuâl e je dal 73.7% (an 2005) e il 15% de popolazion al à problemis cul alcol e si son vudis 5964 muarts in 3 agns par malatiis leadis al alcol. Confrontantsi cu la Europe, in Italie e je plui basse la dose in dì, ma e je tant plui basse la etât che si scomence a bevi (Italie 12.2 agns vs 14.6 in Europe). Intai ultins agns, il consum dal vin al è costant, ma a son aumentâts, specie te zoventût, superalcolics, apetitîfs e bire. Come che e à evidenziât Elisa Simeoni di Gurize inta tesi di lauree dal titul “La culture dal risi e lis abitudins cul alcol in adolescence”, cumò al va di mode bevi tant tal fin setemane fint a sturdîsi (5-6 tacis propit par incjocâsi) par provâ plasê e gnovis emozions, par divertîsi, par dismenteâ i problemis.
L’ALCOL NOL E’ UN ALIMENT_ L’alcol al furnìs 7 caloriis par gram, plui des proteinis (4.5 caloriis) e mancul dai gras (9 caloriis). Al ven assorbît subit dal organisim, sin de bocje, ma al ven doprât dome par produzi calôr, che al ven dispierdût par colpe de contemporanie vasodilatazion de piel. L’alcol nol ven mai doprât par formâ muscui o altris tiessûts dal cuarp. Il 10% al ven eliminât cu lis urinis, ma il 90% al ven “lavorât” dal fiât. Dopo 12 oris al è ancjemò in circolazion il 30% dal alcol assorbît, e si à di spietâ 24 oris par che al sedi eliminât dut. L’alcol nol è duncje un aliment e il fiât al è chel che i tocje lavorâ di plui par eliminâlu.
L’ALCOL FASIAL BEN AL CÛR?_ E esist une impuartante produzion sientifiche che e considere une modeste assunzion di alcol come protetive dai events cardiovascolârs, invezit, l’abûs al compuarte un aument de mortalitât par cardiomiopatie, aritmiis e pression alte. Tant che si dîs che “l’alcol , doprât in maniere responsabile, al è un impuartant component de diete mediteranie” (Rimm EB, Am J Clin Nutr. 1995). Ma la cuestion e je leade a la cuantitât: moderât al significhe 30 gr di alcol in dì, ven a stâi 2 tais di vin in dì. Cence imbroiâ!
LA EUFORIE DAL VIN_ Te assunzion, la prime reazion e je di euforie e di pierdite di inibizions. Par cheste motivazion si dîs che il vin al jude lis personis timidis, al fâs vignî la ispirazion ai artiscj, al fâs sintî miôr. Dopo, cul aumentâ dal nivel tal sanc si deprimin lis funzions dal cerviel, e scomence la incordinazion, lis dificoltâts a fevelâ, iritazion e sium. Al pues puartâ al coma e a la muart se i nivei dal sanc a son masse alts.
Spes, di front ae dipendence dal alcol, si cjate une grande insicurece, une fuarte insodisfazion, isolament. Tai zovins e je ancje sensazion di sintîsi grancj, di sintîsi impuartants, come che se bevi tant al fos une sorte di rît di iniziazion pe etât adulte. In chestis situazions, e je dute la famee che e à di cambiâ par recuperâ dialic, fiducie e tornâ a costruî leams afetîfs.

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +