ATUALITÂT – La Universitât dal Friûl simpri plui internazionâl

La mascare dal secont mileni p.d.C. e je deventade un pôc il so simbul, ma dal 1999, an che si scomençarin i lavôrs, il sgjâf di Qatna (www.qatna.org) al à tornât dal polvar sirian cetancj ogjets e informazions preziosis suntune grande civiltât orientâl di 4000 agns indaûr. Protagoniste in chescj agns de intense ativitât di riscuvierte dal passât e je la Universitât dal Friûl che, in colaborazion cul ateneu di Tübingen e de capitâl siriane Damasco, e je daûr a puartâ in lûs impuartantis tessaris tal mosaic de storie orientâl.
Chest an di fat, cul finanziament de Provincie di Udin, l’ateneu furlan al à podût tornâ a tacâ i lavôrs te vaste aree a pôcs chilometris de citât di Homs, te Sirie centrâl, otignint une licence par cinc agns di lavôrs e ricercje. Ae inaugurazion uficiâl dal acuardi e jere presinte ancje la retore Cristiana Compagno devant di Asma al-Assad, femine dal president sirian, dal ministri de Culture de Sirie e tantis altris autoritâts.
RESTAUR DAL PALAÇ REÂL_ Direzude dal prof. Daniele Morandi Bonacossi e da Michel Al-Maqdissi de Direzion gjenerâl des antichitâts e dai museus de Sirie, la campagne e sarà impegnade intun progjet di restaur dal palaç reâl di Qatna, cûr de capitâl siriane che e tignive sù il grant ream orientâl e che e veve une posizion centrâl tai cumierçs des carovanis di chei timps.
Chest sgjâf al è dal sigûr impuartant parcè che al da un respîr internazionâl a la ricercje archeologjiche in gjenerâl ma soredut, in face ai ultins disvilups de politiche nostrane, al mostre cemût che in chescj agns di intense ativitât e impegn la «nestre» Universitât e à savût colocâsi ai plui alts nivei de culture e de ricercje. Une reputazion internazionâl, e spieghe ancje la retore Compagno che «si trasforme in efiet positîf par dut il nestri teritori».
Venusia Dominici