Sfuei Mensîl Furlan Indipendent
Archivi de Patrie

La Scozie su la strade pe autodeterminazion

Gaia Baracetti

Mr. Kenneth Gibson, a ce pont sêso cul referendum su la indipendence, une des vuestris prioritâts pandudis vie pe campagne eletorâl?
O larìn a presentâ une propueste di leç par che il referendum si davuelzi ai 25 di Zenâr dal 2010. Cheste date e je stade sielzude par vie che al è l’inovâl de nassite dal poete nazionâl scozês Robert Burns.
Dal moment che la nestre politiche e il guvier vuidât dal SNP a van une vore ben intai sondaçs, il plui grues partît de oposizion, ven a dî i laburiscj, al à cirût di obleânus a imbastî il referendum prime de ore, ma cheste strategjie no à funzionât. Dut câs, i laburiscj a àn ancje dite in maniere publiche che no votaran cuintri de propueste di referendum. Duncje, dal moment che tra nô e lôr o vin intal Parlament scozês un numar di membris plui alt di ducj chei altris partîts adun, o varessin di jessi in stât di imbastî il referendum, almancul che i laburiscj no cambiin idee.
Parcè pensaiso che la idee de indipendence che o puartais indenant e vedi cuistât cussì tancj consens tai ultins agns?
Ogni paîs che al decît in maniere autonome al è in stât di operâ pal interès de sô int miôr che no se lis decisions a fossin cjapadis inaltrò. No crôt che i svuizars a staressin miôr se lis decisions a fossin cjapadis a Parîs o a Rome! Se si decît a nivel locâl i risultâts a son miôr. Cun di plui, la Scozie e je siore di prodots naturâi tant che il petroli e il gas, e dal moment che e à une popolazion cetant cualificade e cun nivei alts di istruzion e je dal sigûr buine di doprâ pal miôr lis nestris cualitâts. Al è daûr di chescj resonaments che personis che ancje dome cualchi an indaûr no nus varessin votât, cumò nus dan la lôr poie.
Ce vuelial dî jessi scozês in dì di vuê? La lenghe jentrie alc? L’SNP cemût le pensie?
Al è alc che al è dificil di definî. Di fat, no vin une lenghe divierse di chê dai inglês. Clâr, o vin il gaelic scozês, ma chel al è fevelât juste dal 1-2% de popolazion. O crôt che al sedi alc che tu ti sintis intai vues… Il nestri partît, l’SNP, al è un moviment multietnic. Intal nestri grup parlamentâr o vin doi talians, siet inglês, un pachistan, altris a son di divignince irlandese… il nestri nol è un nazionalisim etnic, ma un nazionalisim civic. Ven a dî, o crodìn che ducj chei che a vivin in Scozie a vedin di gjoldi dai vantaçs de indipendence e che ducj a vedin jessi calcolâts di scozês daspò de indipendence.
Cemût judichial la esperience scozese cu la devoluzion?
O pensi che la devoluzion e sedi stade une esperience un grum positive. Par agnorums il guvier di Londre al dite al popul scozês che al jere masse puar, masse stupit, o che il paîs al jere masse piçul par jessi indipendent… Cun dut che par gjenerazions i scozês a vedin contribuît al progrès sientific, tecnologjic e educatîf in Europe. Par esempli, i scozês a àn inventât la television, il radar, la peniciline. O vin simpri vût tant di dâ ae Europe e al mont intîr! E pûr si sin sintûts a dî che no fevelìn l’inglês come che Diu al comande, che no jerin bogns di fâ nuie cence di Londre… Cumò, invezit, o vin il nestri Parlament, o podìn fâ lis robis cun plui sigurece tes nestris capacitâts, o podìn gjestî di bessôi cetantis competencis. La plui part des personis, ancje tra chei che no poin la indipendence, si sintin al pâr dai inglês come popul e, duncje, a vuelin che la Scozie e vedi inmò plui podês.
No vêso pôre che cu la indipendence si tirin sù dai mûrs che us disseparin di chei altris?
Nol sucederà. Il cumierç al va daûr de cualitât e dai presits dai prodots, dai timps che a van par consegnâ lis marcjanziis: i confins no àn impuartance. Po o sarìn ancjemò influençâts de culture, de mode, de musiche a nivel globâl… No vin dal sigûr nissune voie di tirâ sù bariduris ae circolazion di ideis gnovis. O pensi, chest sì, che si varà un sflurî de culture scozese. O crôt che la int e cirarà di recuperâ lis sôs tradizions e la sô culture.
Pensial che la Scozie e rivarà pardabon a deventâ indipendente e che l’SNP al podarà vuidâle ta chest percors?
Metìnle cussì: cuant che o soi nassût jo, l’SNP nol veve nancje l’1% de poie popolâr. O vevin juste 2 conseîrs locâi e cumò o ‘nt vin cuasi 400. Vuê o vin 47 membris intal Parlament scozês e un conses che al rive al 45%. Tal arc de mê vite, o sin passâts dal nuie a jessi la plui impuartante fuarce politiche scozese come consens. Duncje, o crôt propit che la indipendence e rivarà.

___________________________________________

Scozie: de devoluzion e indipendence?
Daspò de union dai Parlaments di Scozie e Ingletiere tal 1707, a ‘nd è stât plui di un tentatîf de bande dai scozês par tornâ a vê une cualchi forme di autoguvier. Une propueste legjislative e jere stade fate indenant inmò tal 1913, ma si à di spietâ i agns ’70 par che la cuestion dal autoguvier scozês e torni a jentrâ te agjende politiche britaniche. Dut câs, al è dome tal 1998, cuant che al guvier al è il laburist Tony Blair, che il Parlament di Westminster al fâs buine une leç che e met sù il Parlament scozês e che e invie il procès di devoluzion dai podês di Londre ae Scozie. A domandâ un tant, e jere stade la maiorance dai scozês cuntun referendum che si veve davuelt l’an prime. Daûr di chest procès al è ancje l’aument dai consens pal Scottish National Party che, tes elezions scozesis dal 2007, al à otignût la maiorance relative e che cumò al vuide la Scozie cuntun guvier di minorance. Il prin ministri scozês, Alex Salmond (SNP), al lavore cumò par imbastî un referendum su la indipendence. Daûr dai ultins scandais, la linie indipendentiste e je inmò minoritarie, ma e je daûr a cressi simpri di plui.
Carli Pup

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +