Sfuei Mensîl Furlan Indipendent
Archivi de Patrie

ATUALITÂT. La defurlanizazion di Gurize

............

Vuê si fevele spes di une aree furlane che si strenç simpri di plui. Une di chestis zonis e je chê di Gurize e dal gurizan. Cualchidun al sosten che e sedi une realtât che no à plui nuie a ce fâ cul Friûl furlan. E je une des vôs de politiche, che e preferìs rimarcâ di no vê particolaritâts e di jessi  taliane o europeane, pluitost che inacuarzisi di vê plui lidrîs te storie passade e resinte. No larai tant in là, al bastarès meti adun cualchi element e personaç gurizan.
UN TOC DI FRIÛL MULTIETNIC_ Gurize e à un peam profont cu la realtât culturâl furlane, un puint che al à continuât a jessi presint ancje cuant che il Friûl al jere taiât in doi di Vignesie prime e da la Italie dopo, a miezis cul Imperi Asburgjic. Par jessi corets, si podarès fevelâ di une Gurize pardabon multietiche, li che fin no trop timp fa e viveve int che e fevelave il todesc, il furlan e il sloven, insieme dal talian. Dut intun. Ma la voie di piturâ dut di un colôr e je fuarte, une volte come cumò. Al fâs impression, par esempli, che tal parc fûr dal cjistiel a sedin pins maritims, che tal prin dopovuere a jerin stâts plantâts tal puest dai peçs che a jerin prin. Il motîf? Il peç al ricuardave la mont, ven a stâi la Austrie, i vecjos parons; i pins maritims a puartavin tal cjâf il mâr, ven a stâi la Italie. Dût – al è clâr – ignorant la realtât culturâl de int di Gurize.
GRANDIS PERSONALITÂTS_ Tancj ancje i personaçs preseâts, peâts a Gurize e ae sô realtât. Mi pâr di just citâju, almancul doi: il vescul Borgia Sedej e monsignôr Luîs Faidut. Il prin, vescul di Gurize dal 1906, al à vût simpri une sensibilitât dongje de sô int, fevelant e difindint lis minorancis de sô diocesi. In particolâr, cuant che a jerin rivâts i fassiscj cu la lôr voie di italianizâ dut e ducj. Luîs Faidut al veve cjapât in man la politiche sociâl de glesie tal gurizan dopo la encicliche di pape Leon XIII (Rerum Novarum), che e auspicave une Glesie che vignìs fûr des sagristiis/isolament. Un rûl che lu veve puartât a jessi elezût tal parlament di Viene insieme cun Bugatto. Famôs al fo il discors al parlament vienês, ai 25 di Otubar dal 1918, cuant che sul ôr de fin al veve domandât il dirit ae autodeterminazion pal Friûl, par dut il Friûl, doprant la lenghe furlane pe prime e ultime volte, cun chest sproc, denant di dut il parlament: «Se ducj nus bandonin, nus judarìn bessôi. Dio che fedi il rest. No uarìn che nissun disponi di nô, sensa di nô».
LA INVENZION «VJ»_ Al sarès parimentri interessant fevelâ de invenzion de Vignesie Julie, come une realtât semplificade. Une definizion dal studiôs Isaie Ascoli, cjapade sù di corse dal clime prefassist par «judâ» la italianizazion di une zone di confin.
Dut câs, ducj i potagoniscj citâts a àn vût mût di paiâ, e une vore salade, la lôr posizion, la lôr leture de realtât gurizane. A ‘nd è tancj altris, e ancje di çocje slave e taliane, che a àn vût spessôr, ma citâ chei doi di cumò al è come meti l’acent su une peraule che e je esistude e che e esist, parcè che no je une astrazion – o feveli de realtât furlane, zontant ancje chê slave -. Se tai timps dal vescul Borgia e di monsignôr Faidut si veve a ce fâ cuntune realtât cetant nazionalistiche (di plui bandis), cun grues problemis di armonizâ lis realtâts culturâls e etnichis di chê volte, vuê si cjatisi cu la ereditât di îr, zontant la presince di une globalizazion che e splane jù dut intune specie di no culture. La partignice culturâl e chê linguistiche sono pardabon un pês tal vierzisi al mont? Gurize multietniche, le stimi un riferiment di grande civiltât, une potenzialitât no dome culturâl ma ancje economiche, e une situazion cussì no pues jessi astrate, ma e à di vê un peam cu la sô int e la int cu la sô storie. Gurize e je, o crôt, il paradigme ancje dal nestri Friûl di ca dal Lusinç, dulà che jessi se stes al pâr jessi fûr dal mont. Li che al pâr plui facil dî di jessi fîs dal mont in tiermins gjenerics, pluitost che no fîs di un mont in tiermins specifics, cun storie, lenghis e culturis unichis.
Mauro Della Schiava

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +