ATUALITÂT – La crisi sul istât des sagris

Il Friûl, tiere di sagre. Daûr des stimis dal sît sagrefriuli.com, che al tire dongje e al recensìs chescj events dentri dai confins de Patrie, in dut a son plui di 150. Di Març a Novembar, ma concetradis massime di istât. A son un pôc une tradizion peade ae cristianitât e ai patrons dai paîs. Il stes non «sagre» al ven di «sagrât», par vie che si davuelzevin fûr des Glesiis. Vuê il linçûl al è avonde larc: si va di chês plui piçulis, par esempli i paisuts che e a àn un çucul di aficionados, fintremai aes manifestazions grandis e storichis, cun indots e faturâts, za afermadis e un grum publicizadis.
FATÔR CRISI_ Il termometri de situazion lu à pes mans il president de Associazion fra lis Pro Loco de Regjon Friûl, Flavio Barbina. La crisi e à tocjât ancje la realtât plui insospetabil: «No regjistrìn lagnancis particolârs, ma zirant pes inaugurazions, si pues rindisi cont che ancje se i numars de partecipazion de int a son i stes, i consums no son come chei dal an prime». Colpe de crisi. La int, lis fameis, no jessin plui par mangjâ e bevi, tant che une volte. E il patiment al tocje ducj, cence distinzion. «Al va ancje sclarît – al zonte Barbina – che il nivel di sodisfazion, soredut te fase di organizazion, al è simpri une vore alt jenfri i adets. Al è chest entusiasim che al strope la crisi. Nissun al sierarà il prossim an».
SBURTÂ LA SPECIFICITÂT_ Par pocâ il turist si à di pontâ su la specificitât dal puest. «La sagre polente e cueste no tire plui. No baste. Ma se si propon cemût che a fasin a Vasinis alc di specific, la sagre des pomis di bosc, alore la int e rispuint», al dîs Barbina.
Dâts uficiâls, la Associazion fra lis Pro Loco no ju tire sù. Ma un bon indicadôr, rapresentatîf, al ven des royalties de Siae. Ciertis manifestazions a son stadis ridimensionadis, duncje cierts intrateniments a son stâts cjonçâts. E i prins a regjistrâ cheste crisi a son propit orchestrutis e musiche in gjenar.
A son diviers i fatôrs che a puedin determinâ il sucès di une manifestazion. Par esempli, pes piçulis sagris di pais, il fatôr dal timp (masse cjalt o masse brut) al pues jessi determinant. Come chel dai presits, che no àn di jessi sbarâts, in rapuart ae cualitât di ce che al ven siervît.
Oscar Puntel