ATUALITÂT – INCHIESTE. 3. Publicitât par furlan: a ce pont sino?

Vêso mai sintût un purcit fevelâ par furlan? Chel comercializât  de aziende Uanetto al è bon di fâlu, e di fat al declare: «Jo ‘o feveli furlan». La iniziative e je di cheste dite di Cjasteons di Strade che di cuasi 70 agns e lavore lis cjars di purcit. Par garantî ae clientele la bontât e la divignince dai lôr prodots, frontant la pôre pe influence suine, i titolârs Lilia e Oscar Uanetto si son metûts tes mans de Agenzia di Publicità e Comunicazione Gianfranco Angelico Benvenuto, che e à pensât di fâ «fevelâ» la bestie par furlan. Po dopo, e je nassude ancje la Cjarte di identitât 100% purcit furlan cun dutis lis carateristichis de cjar che si vent tes siet becjariis sparniçadis ator pal Friûl. La campagne, publicade sui cuotidians e setemanâi locâi tal unvier passât e à vût interessaments ancje di bande di media nazionâi. La prioritât de aziende e je che di fâ viodi che il prodot al è sigûr e nol ven di arlevaments forescj; di fat, un purcit che al «cognòs» la marilenghe al scuen vignî di chenti. La lenghe in chest e rinfuarce la garanzie di provignince e di control, corint te direzion locâl cuintri de tindince globâl.
UN ZUCAR PLUI DOLÇ_ De cjar, passìn al zucar. Fevelìn des bustutis ricercjadis, ideadis dai Fantats Furlans cu la colaborazion de Friûlpoint: chês cu lis musis che a piturin vincj stâts di umôr difarents, rispuindint a la domande «Cemût sêstu vuê?», prodotis de Scarbolo Zuccheri s.r.l. di Remanzâs. Eleonora Scarbolo, contitolâr de aziende, nus à dât dâts interessants: «Fin cumò o vin jemplât 600 scjatis cun 1.800 tocs ognidune; lis vin dadis a distributôrs di Darte fin a Lignan e indi vin za fate la stampe plui di une volte, stant che a rivin gnûfs ordins». Sì che, 1.080.000 cafês a saran zucarâts intun teritori larc, cuntun impat su la popolazion – stant chescj numars – che nol è di sotvalutâ. La idee e je buine parcè che ae part grafiche, une vore simpatiche, si zonte l’ûs de lenghe che al è chel dongje de int, te comunicazion di ogni dì. Il sucès de serie al è stât grandon, rivant fintremai a vê la publicazion su la riviste semestrâl dai colezioniscj talians. Ta cheste suaze o ricuardìn ancje lis bustutis de ASS. N. 5 Basse Furlane «Cjape a pet la tô salût – Tu puedis fâ tant pe tô salût. No stâ pierdi timp ven a controlâti», indreçadis aes feminis tai programs gratuits di screening. No jentrin tal discors de economie, ma distès a mertin une promozion speciâl pe azion di prevenzion che a fasin.
UN BON BEVI_ Tornant aes nestris cuestions, nus àn segnalât che a Aquilee si fâs la Sgnape dal Checo – riserve speciâl pai amîs, che e je nassude 40 agns indaûr di un scherç fat a Francesco Scuz di bande di un trop di amîs. La etichete e je fisse di scritis par furlan e Alessandro Comar, il titolâr de Distilleria Aquileia nus à dit braurôs: «Fintremai il scritôr catalan Miquel de Palol, tal so romanç «Il giardino dei sette crepuscoli», a ’ndi à fevelât». Un catalan… ise une coincidence? Di lôr al sarà simpri di imparâ!
IL PAIAMENT_ Par comprâ dutis chestis robis e podarès coventâ une cjarte di credit… la Bancje di Cividât di pôc indi à prontade une cul sproc «Valôrs de nestre tiere» e la acuile dal Patriarcjât. Cuissà se cualchi altre bancje, magari i credits cooperatîfs che a son nassûts tal teritori par sostignî ancje lis aziendis locâls, no pensarà di fâ une robe dal gjenar e – parcè no – di sponsorizâ i imprenditôrs che a sielzin la strade dal marketing par furlan?
CUALCHI SUGJERIMENT_ La Universitât dal Friûl che e varès di promovi la lenghe furlane, stant ancje al articul de leç che a ’ndi à marcât la nassite, e à prodot di pôc tal dipartiment di Siencis dai aliments, l’ultin di une schirie di amârs e licôrs cul non furlan: si clame Lusôr e al è fat cu la gjenziane. E se la Universitât, che e à di lavorâ pal teritori, e pensàs a inviâ un cors di pueste par meti dongje economie e marilenghe?
Laudant ducj chei che a son stâts pionîrs in chest setôr e che o vin contât di lôr in chestis trê pontadis, si permetin di dâ un altri sugjeriment: e se la Union Industriâi, la Cjamare di Cumierç e lis associazions di categorie si metessin ator di une taule adun cun esperts di politiche linguistiche e di comunicazion par lavorâ insieme? No saressin i prins a fâlu, ma si riscje di restâ i ultins se no si ponte sui valôrs zontâts che nus caraterizin! E la lenghe no ise un di chescj?
LA ULTIME_ Biel colp di sene: intant che o sin daûr a studâ il computer, dopo vê finît di scrivi il toc, pensant di jessi rivâts insom de inchieste e di sierâ, almancul par cumò, chest monitorament, nus rive la segnalazion di spots radiofonics che a promovin par furlan il IAL dal Friûl-Vignesie Julie, istitût di formazion professionâl. O sin denant di une iniziative cuntun valôr di comunicazion sociâl fuart che e à efiets, cence dubi, ancje sul status de lenghe. Dut chest al merte dal sigûr un aprofondiment e alore o pensavin di dâus l’a riviodisi a cuissà cuant… e invezit ca di un mês o leiarês ancjemò alc in mert!
Elena Zanussi