Sêstu restade mâl par Sanremo? In gjenerâl, o dîs…
“No disarès che o soi restade mâl… ciertis dinamichis a son prevedibilis. La ocasion e je coventade par fâ cognossi la mê musiche, a difondi il fat che a son zovins che a riscjin proponint une cualitât difarente, pôc “sanremese”. Nol è sempliç cirî di proponi di fûr dai confins regjonâi une cjançon in lenghe minoritarie. Il furlan però al è une vore musicâl e al merte di jessi scoltât e cognossût”.
Cuant che tu mi âs fevelât dal to progjet, doi agns indaûr, tu mi parevis “dome” convinte. Cumò la convinzion si è trasformade in determinazion. Isal sucedût alc?
“O ai cjatât personis par strade che cun me a crodin ta chest progjet, investint parsore, e po ancje i riscuintris dal public e la poie di chei dal setôr. Zonte il fat che o soi cjargnele, e alore no ti sarà dificil di capî la mê determinazion!”
Mi soi inacuart che, fevelant di te, mi scjampe di dî “talent”. Ce isal par te il talent?
“Duncje, se o ai di dâ une definizion, o pensi che al sedi la capacitât di otignî un risultât cence sfuarçs e intune maniere otime. Tal cjamp musicâl specific, e je chê robe che e fâs meti dacuardi ducj i scoltadôrs tal judizi, e se tu lu incuintris, no tu puedis no fermâti a scoltâ parcè che ti rapìs. Al è un privileç di coltivâ e manifestâ cence gjelosie”.
Di subit tu mi âs domandât di scriviti cualchi test par furlan, che tra l’altri no je nancje la tô marilenghe. Ce si provial, “dentri” a cjantâ par furlan?
“Jo no ai intents ideologjics. Cjantâ par furlan nol significhe rivendicâ une partignince. O cjanti ta cheste lenghe parcè che mi plasin i siei suns e la sô musicalitât e parcè che o crôt che e sedi plui versatile dal talian (puar di peraulis cjonçadis e consonantichis). E je ritmiche e dentri di peraulis singulis e à concets profonts. Cjale Dentrifûr, par esempli: une melodie che e riclamave un ciert gjenar di sonoritât tes peraulis, che dome il furlan al varès podût sodisfâ. Par chel che al rivuarde il cjantâ tocs de tradizion furlane, ta chest câs ce che plui mi cjape dentri e je la voie di capî cemût che si doprave la vôs ta chê volte. Tantis melodiis a son plenis di vere bielece ancje se a son semplicis ma cuntun fuart podê evocatîf”.
Ta chescj doi agns tu ti sês svicinade a chel mignestron che e je la “musiche Furlane”. Ce ti parie?
“In dute sinceritât nol è che al sedi alc di particolâr che mi è jentrât tal cûr. Mi àn maraveât lis personis che a lavorin: tantis mi àn fat di vuide, sostegn e risultive di cognossince. A crodin pardabon in ce che a fasin: a vegnin fûr a clâr la autenticitât e la veretât dal lôr agjî, in ogni moment.
O viôt però masse dispès pocje cure, une sorte di pressapochisim, che se zontât a un ecès di autostime, al pues deventât sieradure. La modestie e je un recuisît fondamentât par incressisi, crodi di jessi za rivâts al siere la strade a gnovis pussibilitâts e aprendiments. Chest al gjenere pôc spirt di condivision, scjaipulis fatis di distancis e invidiis. In Friûl o riscuintri dificoltât a creâ grups di vore e a partecipâ ai events di chei altris… Mancul individualisim al rindarès pussibilis gnovis progjetualitâts origjinâls”.
Tu no tu cjantis e vonde, tu sês ancje composidore des tôs musichis. Duncje, la tô musiche e je une musiche rafinade, e je tantis robis insieme, no da ponts di riferiment. Me descrivistu tu?
“E je une musiche che e cres in continuazion… al è dificil dâi une classificazion precise. Jo o tachi a scrivi stant leade plui al sunôr che a lis peraulis. La ricercje su la espressivitât dai suns, che a fondin lis lidrîs in gjenars difarents, e devente il fîl condutôr. I tescj a deventin funzion di cheste ricercje.
Il risultât e je forsit une musiche “rafinade” come che tu disis tu, salacor mancul direte… cuissà. Il continuâ a “zuiâ”, esplorant pussibilitâts gnovis, al reste a la fonde dal nestri fâ musiche!”
Ca di pôc al vignarà fûr il to cd. Disimi dulà, cun cui, cuant e cemût.
“Il cd al varà tocs de tradizion furlane e tocs origjinâi sedi par furlan, sedi par talian, scrits di me adun cun altris autôrs (Marco Bianchi pes musichis, Stefano Montello pai tescj). Lu ai regjistrât pe plui part li di Marco Melchior de Groove Factory music Academy. E sarà une etichete di Milan a supuartâ il prodot e al significhe che un lavôr in lenghe minoritarie al è rivât tai cûrs di altris personis. Cuant che al sarà pront o fasarai un conciert di presentazion e po mi auguri di rivâ a sunâ ancje fûr di regjon. I musiciscj une vore brâfs che mi compagnin a son: Marco Bianchi ghitaris, Alessandro Turchet cuintribàs, Emanuel Donadelli batarie e percussions, Lucia Clonfero violins e Francesco Socal clarinets. Il cd al va adun cul progjet “Dentrifûr: musiche che o jeri, musiche che o soi”, sonoritâts dal Friûl de antichitât ae contemporaneitât, che o sin daûr a promovi cun concierts che o puartarìn tes scuelis. Une sorte di lezion-conciert che e passe pes tapis plui impuartantis dal cjant popolâr furlan, dal 400 fin vuê proponint a la fin cualchi gno toc origjinâl par furlan”.
___________________________________________
BIO_ELSA MARTIN. Cjantautore furlane, 27 agns, e studie li dal conservatori di musiche jazz di Claufurt e ta chel di Adrie (RO). E cjante in formazions musicâls jazz-blues. E je impegnade tal so progjet “Dentrifûr: musiche che o jeri, musiche che o soi” – sonoritâts dal Friûl de antighitât ae contemporaneitât”. E à cjantât tal “Festival jazz” des Canariis, e partecipât a: “Premio Bianca D’Aponte”, “Premi Friûl”, “Tra Musica e Parole”, “Suona la Poesia”, “Aie d’Italia”e “Sanremo Nuova generazione”, a la cunvigne dedicade a la diviersitât culturâl (Rome), rapresentant il Friûl. E à cjantât in direte su Rai2 te trasmission Rai.it.
____________________________________________
Stefano Montello
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +