Sfuei Mensîl Furlan Indipendent
Archivi de Patrie

ATUALITÂT – I sindacâts de Sardegne a pro dal autoguvier dal popul-nazion

............

I sindacâts de Sardegne motôr di un manifest par l’autoguvier, in viste dal gnûf Statût de Regjon.
E je cheste la gnove che e à fat un grum di scjas par vie che Cgil, Cisl e Uil a son rivâts a tirâ adun une pluralitât di rapresentants di istituzions e organisims di difarents orientaments poltics, culturâi e sociâi intun seminari che al veve par teme «Autonomie, federalisim e sovranitât», davuelt ai 16 di Lui a Nuraghe. Su la fonde di chest apontament al è stât metût adun il «Manifest par un gnûf Statût de Sardegne», indreçât al «popul de Sardegne e a lis sôs Istituzions».
Un document che «al rapresente l’ambiziôs pont di riferiment che o proponìn ae atenzion e al confront di ducj i citadins de Sardegne, tant che sburt ae riflession, ae azion e promesse di impegn».
Lis fondis par il doman de lôr tiere i sindacâts lis metin a clâr in siet ponts.
LIS FONDIS DAL MANIFEST_ Il prin al dîs: «La Sardegne e je une nazion», tant a dî che il ricognossiment de sogjetivitât dal popul sart e «dal sô jessi nazion» al rimande a une «entitât coletive, a un popul che tal so codiç identitari – fat di storie, lenghe, tradizions, stât gjeo-teritoriâl – al à la titolaritât dal autoguvier».
Il secont principi al dîs che la Sardegne «e svilupe e e manten une posizion singolâr a rivuart di lenghe, culture e dirit civîl ae organizazion teritoriâl».
Il Manifest al dîs che la Italie e la Europe a àn di ricognossi ae Sardegne «il status di insularitât» e che la comunitât dai sarts e riten di «vê il dirit di decidi, oltri il pat di stabilitât e il federalisim fiscâl, su dirits essenziâi e fondamentâi: scuele, sanitât, mobilitât des personis e des robis, supuart a lis impresis, tassis, risorsis par finanziâ il lavôr e il svilup, e su trope ricjece di chê prodote chenti e vei di restâ in Sardegne».
Si propon po un «gnûf pat Costituzionâl, su la fonde dal ricognossiment dal popul-nazion». La Sardegne, po, «e partecipe cun siei rapresentants, progjets e programs ae Union europeane» e e ufrìs la sô colaborazion, a partî des regjons dal Mediterani, «par formâ une Euroregjon».
E IN FRIÛL?_ Un Manifest che in Friûl al è stât let cun atenzion. «O cjati ce tant positîf che i sindacâts e vedin convint i maiorents a fevelâ di autonomie, federalisim e sovranitât peant chescj concets al svilup sociâl e economic de lôr tiere», al dîs Roberto Muradore, segretari gjenerâl de Cisl Udinese e de Basse Furlane.
«O ai viodût – al continue – un grum di analogjiis cun ce che o stin cirint di fâ tant che Cgil, Cisl e Uil a nivel de provincie di Udin, ma ancje une grande diference cun ce che a disin e a fasin invezit i sindacâts a nivel regjonâl». Par dî la veretât, al ricognòs Muradore, «no vin mai fevelât di popul-nazion», ma «di timp in ca o sin convints che un gnûf svilup al vebi di partî dal bas, de int. Chest nus à puartât a svicinâsi al mont dal autonomisim furlan – al continue – e a lavorâ cjapant dentri dutis lis rapresentancis istituzionâls, dal mont economic e sociâl dal teritori». Nol è stât un câs, al zonte, che tal siopar dal 19 di març «tra lis nestris bandieris e fos ancje chê dal Friûl». In chescj dîs, par zonte, tal Comitât provinciâl pe economie e il lavôr, «sindacâts, rapresentants dai imprenditôrs e istituzions a stant preparant un document par tornâ a dâi sburt ae economie reâl». Lu presentaran ae Regjon, «come un imprest di un teritori che si môf e si autorapresente».
IDEIS CLARIS ANCJE PE ORGANIZAZION AMINISTRATIVE_ «Ce si spietial a fâ Triest citât metropolitane e a fâ sì che il Friûl al vedi vôs cu la Assemblee des provinciis furlanis», si domande di fat Muradore.
Une sgrimie avuâl le volarès te rapresentance regjonâl dai sindacâts. E invezit no à dât un biel esempli nancje cuant che si discutè de gnove leç regjonâl pe pupilance dal furlan, al dîs Muradore. «Cuant che i sindacâts a son stâts scoltâts de Comission dal Consei regjonâl – al ricuarde – o ai viodude une Cgil centraliste e paurose e une Uil mazziniane. L’unic che al à difindût il valôr dal insegnament dal furlan tes scuelis – al siere – al è stât il pugliês Giovanni Fania», vuê segretari regjonâl de Cisl.
Antonella Lanfrit

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +