ATUALITÂT – Al Popul de Sardegne e aes sôs istituzions

Noaltris, citadins, oms e feminis de culture, dal sociâl, de politiche e des istituzions de nestre tiere amade, che o vignìn di dutis lis bandis de Isule e che o partecipìn a espressions politichis difarentis, orientaments culturâi difarents, tantis incarghis politichis e sociâls, dâts dongje alì dal Nuraghe (Losa, in Abbasanta) par rifleti su lis condizions, i progjets e i dovês viers il nestri presint dificil e in viste di un miôr avignî comun, cussients des tantis motivazions che fint cumò nus àn viodûts dispès diferenziâts e metûts in maniere reciproche in conflit tes decisions istituzionâls e ta chês politichis, decidûts però a lavorâ insiemit midiant di ce che nus ten dongje, nus dâ fuarce e nus fâs libars, partecipant dai miôr valôrs dal nestri popul cun chê di costruî lis rispuestis a lis necessitâts di vuê e a lis prospetivis positivis de nestre int, o vin insiemit decidût di puartâ la atenzion dal nestri Popul i principis ispiradôrs che a fondin il nestri impegn tal fâ sù gnûfs istitûts di autoguvier.
A son chei ca sot:
1 – La Sardegne e je une nazion;
2 – La Sardegne e disvilupe e e manten une posizion singolâr par chel che si riferìs a la lenghe, a la culture, al dirit civîl e a la organizazion teritoriâl;
3 – La Sardegne e je une isule siore di teritori e di biodiversitâts ancje se puare di popolazion. Cheste origjinalitât le definìs e le podarès insiorâ, danti fuarce pal avignî;
4 – Al Stât talian lis istituzions de Sardegne a son peadis di un pat costituzionâl che i siei contignûts, lis manieris e lis condizions a son di verificâ daûr dai propris dirits storics, lis conveniencis e lis condizions storichis che a son gambiadis.
5 – La Sardegne e convîf in maniere fraterne e e je solidâl cun chei altris popui dal mont.
6 – La Sardegne, fuarte di une tradizion politiche democratiche, e marche la impuartance dai dirits e dai dovês, dal savê, de educazion, de coesion sociâl e de paritât.
7 – La Sardegne e partecipe cun siei rapresentants, progjets e programs a la Union Europeane, in coerence cui valôrs e il model di benstâ e di progrès europeans.
Chest manifest pal Statût de Sardegne – che adun o individuìn tant che «il Manifest dai 16 di Lui dal 2010 – al rapresente l’ambiziôs pont di riferiment che, tacant di vuê vinars ai 16 di Lui dal 2010, o proponìn a la atenzion e al confront di ducj i citadins de Sardegne, tant che direzion pe riflession e pe azion e tant che promesse di impegn.
I Sindacâts Cigl, Cils e Uil