ATUALITÂT. I dialets F-VJ, patrimoni di protezi di buride?

Ai cuatri di Fevrâr dal 2010 e je stade fate buine ae unanimitât la propueste di leç regjonâl pe valorizazion di diviers dialets di divignince venite dal Friûl – Vignesie Julie, elaborât de VI Comission dal Consei Regjonâl partint di variis propuestis di leç, caraterizadis de origjin politiche plui diferente.
A proposit di leçs di tutele, nus ven indiment cualchi declarazion di politics regjonâi. Par Piero Camber «la legge costa troppo mentre i corregionali attendono mesi e mesi per le visite specialistiche, le scuole crollano, le povertà striscianti avanzano», par Luca Ciriani «la legge tende a (…) moltiplicare burocrazia e assistenzialismo regionale», Piermario Ciani «nell’era della conoscenza planetaria, la nostra Regione, anziché puntare sull’eccellenza nelle lingue straniere, con queste leggi si richiude in se stessa e si allontana dal resto dell’Europa e del mondo», par Renzo Tondo «non serve buttare via risorse così, la “marilenghe” ha valore se viene coltivata all’interno della famiglia». Chestis declarazion, intindìnsi ben, no son a proposit dal gnûf provediment, ma a son i coments che a àn fat a proposit de aprovazion de leç pal furlan.
LA VIRADE_ Nol pues che fâ plasê che i politics dal F-VJ a sedin passâts di chescj dubis al sburtâ il valôr culturâl adiriture dai dialets, e in plene crisi economiche, che chest an e à puartât a un tai gjeneralizât dal 20% pai fonts de culture. Une virade a 180° che a cualchidun i à semeât un atac cuintri dal furlan, ancje se, daûr dai comunicâts stampe burîts fûr sul sît dal Consei Regjonâl daspò de aprovazion de leç, tancj conseîrs regjonâi a àn marcât che il provediment nol varès mai podût pandi une menace tai confronts des trê minorancis linguistichis regjonâls.
Si à di dî che lis declarazions dal conseîr de Lega Nord Federico Razzini, prin firmatari de leç, a samein dâi mani a cui che al à cualchi suspiet, stant che lui al insuaze la leç «come intervento di pari organicità alle leggi dedicate allo sloveno e al friulano» (ACON, ai 4 di Fevrâr dal 2010). Une robe che no rispiete la Costituzion: di fat, no je pussibil la ecuiparazion jenfri lenghis e dialets.
Al è ben facil capî cemût che, di fat, a une lenghe minoritarie i coventi une tutele specifiche. Par fâ l’esempli in Regjon, dispès nus domandin di no fevelâ par furlan parcè che il nestri interlocutôr no lu capìs o pûr, tal cjamp de lenghe scrite, i stes furlans a fasin un pocje di fature a leile, mentri invezit no vin cuissà ce problemis a leisi lis bielis pirulis par triestin de rubriche «Quel de la quela» sul blog Bora.la, o a capî lis simpatichis trasmissions radio par triestin, o cuant che – rivolzintsi a un ufici public di Triest – si sintìn rispuindi par triestin, come che dispès al capite.
Par chest, la nestre Costituzion e à disparselât lis cuistions relativis ae tutele dal patrimoni culturâl che si riferìs ae lenghe uficiâl (art. 9) di chês che a rivuardin la tutele des minorancis linguistichis storichis alofonis (art. 6) e e à diferenziât i lôr ambits e nivei di tutele, su la fonde de divierse autonomie glotologjiche dai varis idiomis rispiet al sisteme linguistic propri de lenghe taliane uficializade.
CUALCHI DUBI_ Al di là di chestis polemichis, nol pues che fânus plasê cheste conversion. No podìn no proponi, par coretece e par judâ sedi la nestre Regjon che il Stât Talian a lavorâ te miôr maniere, cualchi rilêf su ponts de leç che a somein pluitost azions di politiche linguistiche (duncje plui dal articul 6 de Costituzion, fat pes minorancis linguistichis tant che il furlan) impen che culturâl (articul 9 de costituzion, che al fevele dai dialets dal sisteme linguistic talian).
Tal provediment si fevele di fat di «trasmissioni radiofoniche e televisive realizzate da emittenti pubbliche e private» (art. 6 co. 1); «giornali e periodici editi nei dialetti di origine veneta» (art. 6 co. 2), «progetti didattici», ancje cu la finalitât dal «apprendimento linguistico» (l’art. 7) e cence specificazion dal sisteme di sielte des fameis de Regjon che magari a vegnin di altris bandis de Italie; e di «realizzazione di insegne pubbliche, anche stradali» (l’art. 8 co. 2).
LA INDIVIDUAZION DES “ZONIS”_ Un altri cantin problematic al è chel de individuazion des “zonis” di tutele: il Stât Talian, stant che lis lenghis minoritariis a son une ecezion rispiet al principi di uficialitât de lenghe taliane, al previôt di stabilî la teritorialitât di aplicazion de leç 482. Al reste il dubi se si varès di fâ cussì ancje pai dialets: te leç, il Consei si è dismenteât di frontâ la cuestion e cussì al samearès scuasit che lis disposizions legjislativis a podaressin jessi fatis buinis su dut il teritori regjonâl. Il triestin, par fâ un esempli, al podarès jessi aplicât in Bisiacarie, o il Venit ae zone di Grau.
LA LEÇ PIEMONTESE_ Un altri erôr al podarès jessi stât ancje chel di no vê spietade la pronuncie aromai prossime de Cort Costituzionâl su la leç regjonâl pe valorizazion dal piemontês, che e varès podût dâ indicazions utilis pe amissibilitât di chestis normis introdusudis un pôc ae svelte, scuasit di scuindon, cence vê sburtât un dibatit te Comunitât Regjonâl come che al è stât fat tal câs de leç pal furlan.
Luca Campanotto, Dree Venier