ATUALITÂT – Geronimo, storie di un vuerîr apache

UN ZOVIN VUERÎR APACHE_ Ai 17 di Fevrâr dal 1909, a Fort Sill in Oklaoma, al murive Goyathlay, il vuerîr apache che i blancs a vevin batiât cul non spagnûl di “Geronimo”. Goyathlay al jere nassût intal Jugn dal 1829 in chê che e jere ancjemò la tiere dai Apache Bedonkohe e che vuê e fâs part dal stât dal Arizona. Cuant che al veve 22 agns, la sô tribù (i Apache Chiricahua) e fo atacade dal esercit messican e in chel atac a muririn sô mari, la sô prime femine, Alope, e i siei fîs.
RESISTENCE ARMADE_ Goyathlay al scomençà alore une vuere cuintri dal esercit messican e po cuintri dal esercit dai Stâts Unîts deventant, cui siei vuerîrs, une des ultimis fuarcis indipendentis di natîfs americans a oponisi ae politiche colonialiste dal guvier dai Stâts Unîts. Dopo plui di 30 agns di resistence armade, tal 1886 Goyathlay cui siei vuerîrs e lis lôr fameis si rindè al gjenerâl Nelson Miles. Ducj a forin depuartâts a Fort Pickens (Florida). Intal 1894 Goyathlay cu la sô famee al fo puartât a Fort Sill (Oklaoma) dulà che al murì 15 agns daspò. Nol tornà mai plui inte sô tiere.
UNE NAZION DEPUARTADE_ Vuê la nazion Apache e je formade di cirche 30.000 personis che a vivin pal plui intes risiervis. Inte sô vite Goyathlay al a viodût il gjenocidi fisic dal so popul par gjavâi la tiere e par depuartâlu intes risiervis. Ma ancje dopo di chescj acjadiments al è lât indevant il gjenocidi culturâl che al à cirût di gjavâi ae nazion Apache la sô lenghe, la sô identitât, la sô autocussience e la sô anime, cuntun procès di assimilazion fuarçade che al è simil par ducj i popui piçui e tibiâts. Sot chest aspiet la storie dal popul apache no je tant diferente di chê dai popui minorizâts de Europe e duncje no je masse lontane di chê dal popul furlan.
MATTEO FOGALE