Sfuei Mensîl Furlan Indipendent
Archivi de Patrie

ATUALITÂT. Fevelâ di mancul, fâ di plui e fevelâ par furlan

............

Adriano Luci, President di Confindustrie di Udin, al ven di une famee che 6 fradis une vore leâts a la ativitât fondade dal pari Francesco, calabrês che al à maridât une furlane: 3 fradis e un sûr a son restâts a vore in aziende. A chescj si zontin ancje 4 nevôts che a garantissin l’avignî de ativitât. Il grup Luci, cun sede a Paulêt, al lavore tal setôr de lavorazion de glerie, edilizie e tal setôr ambientâl, no dome in Friûl: e je stade di pôc screade ancje une sede a Pechin (Adriano Luci al è ancje soci dal gnûf Fogolâr furlan nassût te capitâl cinese, n.d.r.), dopo altris sedis in Pulie e Albanie. La aziende e da lavôr a uns 150 personis cuntun faturât dongje dai 30 milions di euros ogni an. Dal 2007 Adriano Luci al è President de Confindustrie di Udin, dopo jessi stât il vicepresident de Associazion.
Intant de Assemblee di Setembar al à fat un fuart riclam ai valôrs de identitât furlane come element di fuarce ancje pe economie. Ce intindial?
“Ducj nô o vin bisugne di rivalutâ un sens di apartignince: nus covente di podê ricognossisi intune “bandiere”, intune identitât. La serietât, la professionalitât, la imprenditorialitât a son elements che a fasin part dal nestri jessi e chest al è confermât dai risultâts che tancj furlans a àn vût ator pal mont, li che i nestris emigrants a àn fat la lôr furtune, ma ancje chê dai paîs li che a son lâts a vore”.
In particolâr al à riclamât il “Sisteme Friûl” come leam tra ducj i furlans pal mont… cemût viodie la gjestion dai rapuarts vude fin cumò?
“Secont me e je pôc sfrutade. O vin bisugne di incentivâ chescj rapuarts e fâ “rêt”. Ente Friuli nel Mondo al è daûr a fâ un bon lavôr, però probabilmentri a àn dibisugne di vê daûr un sisteme che al sostegni chescj rapuarts cence lassâju dome a la lôr volontât”.
Ise une cuistion ancje gjenerazionâl?
“O crôt che al sedi ancje chel. I furlans che a son espatriâts a àn vût fîs e vuê chescj zovins a sintin la necessitât di cognossi e capî miôr lis lôr lidrîs”.
O vês vût ospit il ministri Sandra Pupatello dal Ontario, cemût viodial par esempli il rapuart cul Canadà, ce puedial dâ il Friûl al Ontario e vicevierse?
“O pensi che lis relazions a son une element fondamentâl: dut si disvilupe sul rapuart tra lis personis. Duncje nô vin bisugne di incressi i contats e su chescj costruî un resonament di insieme li che la fuarce dai furlans che a son ator pal mont e podedi judâ il mont dal lavôr e de economie”.
Furlans dal Canadà come la Pupatello (che no à vût problemis a fevelâ par furlan), furlans di Argjentine, Brasîl, Belgjiche, Francie, furlans de Italie e magari de Cine: la lenghe furlane no podaressie deventâ la “lenghe francje” dai rapuarts jenfri i furlans se e “je finide la ore dome dal folclôr”? Laressie potenziade? (In cheste otiche e in gracie a gnovis tecnologjis saressial pussibil creâ une television/radio/sît/gjornâl comun jenfri lis comunitâts furlanis pal mont?)
“O pensi propit di sì! La lenghe e pues jessi un element di fuarce. Ancje la ministre Pupatello e je stade ecezionâl: midiant di jê ancje nô o vin capît ce che al significhe il valôr di une lenghe”.
Par lui personalmentri ce aial significât?
“Al è stât un episodi iluminant! O volarès ancje ricuardâ cuant che o sin stâts a Toronto cualchi mês indaûr cu la mission di Ente Friuli nel Mondo e le ai cognossude… dopo dîs minûts le vevi za invidade a la nestre assemblee anuâl che o varessin fat a Setembar: il fat di fevelâ furlan nus à metût bot e sclop in sintonie. Grazie a jê o ai capît che la lenghe e pues jessi chel element di fidelizazion imediade e come che mi è sucedût a mi, o pensi che al podedi sucedi ancje in altris situazions: par chest al è impuartant sburtâ su la cuistion di valorizazion de lenghe furlane (ma al è un discors aplicabil a dutis lis lenghis locâls)”.
Un biel sugjeriment ancje pai nestris politics…
“Sigûr! Su cheste cuistion si varès di fevelâ di mancul, fâ di plui e fevelâ par furlan! La tutele e je juste come principi in se, ma, come che nus è sucedût in Confindustrie, al è dimostrabil che e pues vê un contignût concret, rapresentant une oportunitât positive: o vin imbastît un rapuart internazionâl cul Ontario grazie a la lenghe furlane”.
I zovins impreditôrs, cemût sintino il leam des lidrîs furlanis?
“Chei de mê gjenerazion a presein chescj argoments: la lenghe furlane tra di nô, tes nestris discussions e tai nestris discors e je doprade. Forsit chei plui zovins a son daûr a pierdi chest contat cu la lenghe. Ancje i gambiaments sociâi o pensi che a puartedin conseguencis. Par esempli, jo o soi l’unic dai fradis che al fevele par furlan parcè che lu fevelavi cun mê mari. Chei altris fradis no e duncje cumò a fevelin dome par talian. E je impuartante ancje la “palestre familiâr” li che la lenghe locâl, la lenghe de nestre Patrie e cjate il prin contest dulà jessi doprade”.
In chest dut chest discors cuale ise la funzion de Universitât? Ce prospetivis viodial?
“Al è un discors impuartant ancje parcè che chest an a son i 30 agns di nassite dal nestri ateneu e une riflession e va fate. La Universitât e je un element une vore impuartant, anzit, o disarès fondamentâl! O crôt però che al sedi necessari ancje di bande de Universitât intensificâ l’impegn leât a la promozion de lenghe furlane. Se pardabon e vûl jessi la Universitât dal teritori, bisugne che e vedi une conotazion che i permeti di dî che e je propit la Universitât dal Friûl. E no si trate di tirâ sù confins e sierâsi, anzit, al à di jessi un element in plui, li che la valorizazion dal nestri jessi nus permet di vierzisi intun confront cun chei altris”.
I furlans a àn dât tant ai industriâi e chest al è ancje il risultât di valôrs e culture furlanis. I industriâi ritegnial che a vedin restituît alc di chest patrimoni? A nô nus pâr di viodi posizions debulis su la lenghe, su la unitât dal Friûl, su tantis robis part integrante di chel spirt furlan. Isal cussì o par lui al è stât fat avonde?
“O pensi che tantis voltis si cor il pericul di fâ un pocje di confusion, parcè che la strumentalizazion politiche e ruvine i percors che ancje nô o fasìn par puartâ indevant une linie, ancje tai confronts dal argoment de lenghe furlane. Noaltris o vin di sgomberâ il cjamp da la strumentalizazion politiche e recuperâ un discors in tiermins di leam cul teritori, cu la culture, cu lis nestris lidrîs. La politiche e à di jessi un corononament e no un cjamp di bataie par altris fins. Pal passât cualchidun, mi ven tal cjâf Alessandra Guerra, si è ocupât di lenghe furlane, ma mi è someât che ciertis azions no sedi stadis fatis tal interès vêr de lenghe, ma dome “pro domo sua”, par une forme di pure autopromozion…”.
A proposit di unitât dal Friûl, cemût sono i rapuarts cun Pordenon, simpri plui morosât dal Venit, ma che al à ce tancj imprenditôrs che a sintin di jessi furlans? I industriâi àno chê di reagjî a lis sburtadis (a art) pe separazion des dôs provinciis plui produtivis de regjon?
“Ancje chi o tornìn al discors a pene fat: ognidun al à bisugne di une cierte visibilitât e par chest al à di montâ sù suntun cjaval. Ta chest câs cierts politics a doprin la polemiche sul furlan par cirî di fâ une spacadure par podê puartâ a cjase un pocje di notorietât. Jo personalmentri, ma ancje a nivel di rapresentant dai imprenditôrs, o pensi che il probleme dal dialic cun Pordenon, Gurize, adiriture Triest, nol esist: noaltris o dialoghìn cence problemis cun ducj. Par esempli, il gno coleghe di Pordenon Cini al è une persone de massime vierzidure e disponibilitât par programs e progjets comuns”.
I gjornâi dal setôr a àn ricuardât l’esempli dal sisteme bancjari islamic che nol à patît la crisi mondiâl par vie che la Sharia, la leç islamiche, no amet “finance virtuâl” (viôt nestri articul a pagjine 16 di cheste Patrie, li che si fevele dai bond islamics, i “sukuk”). Il sisteme bancjari furlan aial o podaressial vê elements par salvâsi di cheste situazion finanziarie globâl derivade di agns di economie fondade su la virtualitât?
“Noaltris o vin simpri dit che il furlan al vedi il mâl dal madon, ma jo o dîs “par furtune che e je cussì!”. Chest al significhe che te nestre identitât e à ancje chest element di concretece. Par chest pensi che la nestre regjon, e soredut il Friûl, e podarà patî di mancul cheste crisi finanziarie, ancje se cheste situazion e je talmentri grande che o varìn in ogni câs di paiâ ducj.
Jessint ancje vicepresident de Bancje di Cividât o ai vût la ocasion di cognossi une realtât che grazie a la abilitât dal President Pelizzo e je cressude sul marcjât come dimension e ufierte, ma e à savût restâ locâl. La bancje “dal teritori” e fâs part ancje chê di une culture, di une identitât. Il nestri mont al è daûr a dismenteâsi des lidrîs, ancje tal cjamp bancjari: cemût sono nassûts i credits comperatîfs o la stesse Bancje popolâr di Cividât? Parcè che e jere une domande dal teritori e a chest i è stade dade une rispueste di chi, restant dal teritori.
Il so discors al somee lâ in cuintritindince rispiet a une cierte idee di globalizazion che ducj si jemplin la bocje…
No je vere che al covente deventâ “grancj a ogni cost”: jo o dîs che si à di mantignî un ecuilibri. Mi permet ancje di ricuardâ il discors de multiutility regjonâl che cumò al somee che ducj a voledin vê: al larà a finî che noaltris par discuti dal nestri gas o de nestre scovacis o varìn di lâ cuissà dulà, parcè che o sarìn comprâts di altris. E cussì nol va ben. Secont me al va ben dut ce che al funzione: o vin za a Udin une multiutility che e funzione e no viôt parcè che si à di gambiâ sisteme e passâle in man a cualchidun altri: a mi mi va ben che si vedi di fâ un discors di colaborazion e sinergjie, cirint di economizâ, ma simpri a pro dal citadin. Une aziende che e ven cuotade in Borse e à l’oblic statutari di fâ vuadagn, ma cussì al è il pericul di pierdi di viste l’interès dal citadin. Cuant che tu âs cedût la tô aziende energjetiche locâl, cuant che la rêt idriche che ti puarte la aghe cjalde no je tô, cuant che chel che te comede nol è di chenti, ce vino fat? O vin pierdût la anime! La nestre politiche no à di colâ te vuate di chei che a disin che “al just jessi grancj e vonde par jessi cualchidun”, parcè che al è il pericul di tornâ a fâ “economie virtuâl”. O vin invezit di jessi concrets interpretant lis necessitâts dal nestri teritori!”
Christian Romanini

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +