ATUALITÂT. Eletrodot dome sot tiere

«Dî che la ultime peraule e spiete ae Regjon nol baste». Il president dal Comitât pe vite dal Friûl rurâl Aldevis Tibaldi al da jù pesant, ancje dopo che de bande de zonte regjonâl e je buride fûr la posizion dal eletrodot sot tiere. Duncje, su la tant contestade linie Redipulie – Udin Ovest (che stant al stes Comitât e sarès un “Super Grid”, ven a stâ un implant ispirât ai interès e ae funzionalitât di un “distributôr” / paron che nol cjale in muse nissun) la soluzion indicade dal governadôr Renzo Tondo e je chê di metile sot tiere. Il progjet origjinari di Terna al proviodeve la vie par aiar. In Consei, il dibatiment si è indreçât daspò la presentazion incrosade di mozions e ordins dal dì. Ae fin, Tondo al à declarât che «se no si fasarà chê sot tiere, o lavorarìn almancul par une soluzion  parziâl sot tiere. Se chest nol sarà pussibil, o cjaparìn lis nestris responsabilitâts e o lavorarìn par miorâ la soluzion par aiar, e dut câs par fâ in mût che la eventuâl linie si realizi su as viaris za esistents».
NEGLIGJENCIS_  Il cjapitul su chel eletrodot al somee dut altri che sierât. Ae posizion de Zonte, Aldevis Tibaldi al à plui voltis e in diviersis assembleis publichis rimarcât la criticitât e lis sfuarçaduris di dute la vicende, cun reticencis e negligjencis di cui che in Regjon e tai uficis dal ministeri al varès vût di esercitâ lis funzions di tutele e di vigjilance. Tibaldi al sclarìs che se in Regjon dut al taseve, il Comitât al à rapresentât la uniche fuarce credibile e “fisiche”, plui de stesse politiche, tai confronts dai sorestants di Terna. “La veretât – al à dite Tibaldi – e je che intant, une leç dal Stât e à gjavât fûr des competencis de Regjon ogni prerogative in materie di centrâls nucleârs, rigassificadôrs, eletrodots, tant che i sorestants de Regjon – unic câs tal panorame talian – a son restâts a cjalâ cence oponi la incostituzionalitât di une norme che a ducj i efiets e scjafoie la specialitât di une regjon autonome. Aromai o sin devant di un tren in corse, e par salvâ il teritori e la sô int dal inelutabil e covente une iniziative politiche ferme e tempestive”.
CIDINÔRS_  Fevelant di eletrodots, no si sa plui nuie de contestade interconession fra Wurmlach e Somplât, che e sledrosarès fûr par fûr il Cjanâl di Sant Pieri. Il “Comitât pe difese dal teritori”, vuidât di Renato Garibaldi, si è dât apontament sabide ai 13 di Març. Obietîf: alçâ il vêl di cidinôr che intant al è colât sul progjet.
Di segnalâ, po dopo, che su la autostrade energjetiche Redipulie – Udin Ovest a son rivadis lis declarazions dal assessôrs aes infrastruturis Riccardo Riccardi, che al veve cjapât l’impegn di sostignî in Zonte la posizion di soterâ la stesse infrastruture. Il Comitât pe vite dal Friûl rurâl al sburte par une iniziative bipartisan, par vê il bon acet di dutis lis fuarcis dal emicicli di plaçâl Oberdan a Triest. “E sarà la ocasion – al rimarche Tibaldi – par sancî une volontât inderogabile e no un sempliç auspici, che al pues lassâ il timp che al cjate”. Par chest, nol baste dî che la ultime peraule e spiete ae Regjon.
Oscar Puntel