ATUALITÂT – Il Dylan Dog par furlan al vâl 250 euro

Stefano Prioni, di Cantù (Co), al è un apasionât di fumuts e di cines horror. Zontant chestis passions nol podeve no deventâ colezionist di Dylan Dog, il fumut horror talian par ecelence.
Sgarfant ator par cjatâ edizions particolârs, al è specializât in chês, al à savût de traduzion par furlan dal numar 9 intitulât «Alfa e Omega» fate intal 1995 di un grup di volontaris vuidât di pre Gjulio Ziralt e jessût come suplement dal nestri sfuei. «Lu ai savût uns sîs mês indaûr e mi soi interessât subit par cjatâlu, parcè che o soi colezionist, ma ancje par vie des origjins dai miei nonos, di Sacîl: al è un toc unic, massime parcè che al è fat in lenghe furlane. O ai savût de sô esistence midiant cognossints furlans», nus conte Stefano, che nol è nome colezionist, ma al scrîf ancje su sîts specializâts. Il mês stât al à fat un toc su cheste sô “scuvierte” sul sît Ddcomics.it, dediât ai fan dal fumet, subit ricjapât di altris sîts e blog di colezioniscj.
In pôcs dîs la notizie e à fat il zîr de Rêt, trop valie une copie dal Dylan Dog par furlan?
«Prin di dut o ai di ringraziâ chei che mi àn judât par cjatâlu, nol è stât facil, ma se mi met…  O vuei marcâ la gjentilece des personis contatadis, lis plui variis, e ancje des bibliotechis furlanis. Une copie in buinis condizions di “Alfa e Omega” e pues valê sui 250 euro. Des mês “indagjins” o ai podût stimâ che a ‘nd sedin stadis fatis uns centenâr, duncje la valutazion no à di someâ fûr dai semenâts: e je motivade dal numar piçul di copiis, dal fat che al sedi un prodot “uficiâl” cul permès dal editôr e ancje de sô cualitât. La cjarte e je di fat une otime patinade, chê che il stes Bonelli (l’editôr di Dylan Dog, ndr) al dopre pes edizions miôrs, tipo il “Dylandogon” dal Istât. Une cjarte che e reste blancje compagne par agnorums, no come chê des edizions normâls che e devente zale dopo di cualchi an»
E in gjenerâl il toc de tô colezion che al vâl di plui cuâl isal?
«Un numar speciâl jessût in zonte ae riviste des Feroviis “Amico treno”. In buinis condizions e cun la riviste dongje par dimostrânt la autenticitât (a son tantis trufis tal mont dal colezionisim, si à di stâ atents) al vâl 500 euro. Il prin numar di Dylan Dog origjinâl e in otimis cundizions – che oviementri o ai – al vâl sui 200-250 euro, ma za cul secont si cale a 40.»
Bonelli al à dât la autorizazion cence problemis: pensistu che si podarès fânt altris?
«Sigûr, magari! O marchi che il fat che Bonelli al vedi dât il permès no je robe di pôc, tancj altris progjets no lu àn vût. Al è par vignî fûr l’ultim film su DD: une sdrume di gadgets che si tachin a viodi ator no àn il permès dal editôr. Il lavôr par furlan al è di grande cualitât: un bon viatic par fânt altris.»
L’ARTICUL DI STEFANO
www.ddcomics.it/2010/04/05/dylan-dog-n-9-alfa-e-omega-in-lingua-friulana/
Dree Venier