ATUALITÂT. Ducj managers di balon, cun Hattrick

In principi al fo Manager, il prin zûc par ordenadôr sul balon, seguît daspò di tancj altris zûcs clamâts di in chê volte “manazeriâi”. Si cjape sù une scuadre cun tant di alenadôr e di zuiadôrs, tignint di voli la tatiche ma ancje il cost des paiis, la manutenzion dal stadi e il numar dai tifôs. Undis agns fa, in Svezie, al è nassût Hattrick (triplete, par furlan), un manazeriâl online che di chê volte, cu la cressite di internet, al è deventât il plui grant zûc dal mont. Lis lenghis uficiâls fin a Setembar a jerin 44, ma di chê volte indi àn zontade une. Savêso cuale?
TRIPLETE DUTE PAR FURLAN_ Par merit di un grup di apassionâts dal zûc, il furlan al è deventât une des lenghis uficiâls di Hattrick. Personis che si platin daûr dai nicknames, ma noaltris – sgarfant – o vin disvelât la identitât di un di lôr. Matteo Piasenzotto, 28 agns di Bicinins, nol è ni un linguist ni un informatic: parcè aial decidût di voltâ par furlan dut Hattrick? “Doi agns fa – al spieghe – o vevi viodût tra lis lenghis uficiâls il Flamant. O ai pensât che ancje il furlan al podeve jessi une des lenghis di Hattrick, un mût par un grum di zovins furlans par vê un contat diret cu la marilenghe scrite. Insiemit a altris cuatri zuiadôrs furlans, o vin domandât al grup di vore talian dal zûc di podê tradusi il programe. Nus àn rispuindût di sì, parcè che il furlan – insiemit al sart – al è une des lenghis minoritariis ricognossudis de Italie, e o vin scomençât a lavorâ”. Doi agns daspò, ve la traduzion online. Nol è stât un troi facil. “O vin vût di doprâ il cjâf – al à zontât Matteo –, par esempli browser al è deventât “sgarfadôr”, e server “servidôr”. Po a son dutis lis peraulis leadis al balon, des tatichis ae posizion in cjamp dal zuiadôr”.
UNE LEGHE FURLANE?_ Pal moment a son uns otante i utents di Hattrick che a àn sielzût il furlan tant che lenghe di navigazion. “Cualchidun al domande se si pues fâ un campionât dut furlan – al dîs Matteo –, ma lis seriis, de XI fin ae serie A, a son leadis ae nazion di apartignince. Però, si podarès fâ une serie di partidis amichevulis e creâ un torneu no uficiâl dut pai furlans”. La scuadre di Matteo, la Shugo Telshi, e zuie in serie VII.536 (il secont numar al mostre il ziron di apartignince). Il so obietîf al è clarementri chel di rivâ in serie A. “A bastin dôs oris par setemane par gjestî il zûc – al siere –, ma se tu vuelis, tu podaressis passâ ancje zornadis interiis”.
No ducj a vuelin la marilenghe
Bon, Matteo nus à cunvinçûts a provâ il zûc. O creìn la “Fc Cjasarsa”, ma o vin di spietâ une setemane par vê dal webmaster la scuadre. Nol è probleme, Matteo nus al veve dite. Però o podìn lassâ messaçs a chei altris zuiadôrs. O scrivìn:
La Fc Cjasarsa dal balon a Hattrick
“Nassude chest an, la Fc Cjasarsa e zuie intun campionât reâl di Futsal (balon al cuviert). La dirigjence e à decidût di creâ ancje une formazion “virtuâl” tal manazeriâl Hattrick. Si sta spietant di ricevi la uficializazion de iscrizion.”
A passin doi dîs, e il messaç nol ven ancjemò publicât tal sît. Alfin, cualchidun mi scrîf:
Da bischhoffshausen (nickname dal zuiadôr)
“Caro Davide, ti prego di riscrivere il tuo contributo in italiano, in quanto, allo stato attuale, non è possibile effettuarne une valutazione. In bocca al lupo per la tua stagione, e a presto.”
Eh? Une valutazion? A è dome furlan, baby:  une lenghe, no une arme.
Davide Francescutti
_________________________
Hattrick par furlan: l’identikit
Hattrick al è il zûc di balon online plui grant e popolâr, e al è dal dût a gratis. Tu âs di vuidâ la tô scuadre di balon e competi cuintri 937.606 altris zuiadôrs umans di dut il mont. Tu gjestissis la tô scuadre cuntun navigadôr internet. Lis partidis si zuin un pâr di voltis ae setemane. Tu puedis jentrâ cuant che tu vuelis par controlâ la tô scuadre, par dâ ordins, par vendi zuiadôrs, o ancje dome par fâ une fevelade cun altris utents. Tu âs lis funzions tant di president che di dirigjent. Tu podarâs comprâ o vendi zuiadôrs, investî i bêçs de scuadre par slargjâ il stadi o pe scuadre zovanîl. Tu varâs di sielzi i zuiadôrs plui in forme di meti in cjamp, sielzi lis tatichis pes partidis, decidi cemût alenâ i zuiadôrs e tantis, tantis altris robis. Par rivâ al sucès, une buine idee e je che di formâ une buine strategjie e plans a lunc tiermin. Cuant che tu ti cjapis a caric la tô scuadre, tu jentris in zûc intune des dôs divisions plui bassis de seriis di Hattrick. Par scomençâ la tô scjalade, tu âs a disposizion une scuadre di zuiadôrs (cualchidun cun talent, cualchidun altri no…), un stadi e cualchi franc par judâti. Par iscrivisi: www.hattrick.org
Davide Francescutti