Pieri Villotta, une des musis e des «paveutis» plui cognossudis de Tv regjonâl… parcè il «papillon»?
«Le veve Gian Maria Cojutti, il pari di Claudio, e jo o ai cjapât il so puest al Gazzettino. Lui mi à dit che mi steve ben e jo lu ai ubidît. E cuant che al è mancjât, i siei fîs mi àn regaladis lis sôs e cussì o continui a puartâ la «pavee» ancje par ricuardâlu».
Cemût ise la vite di pensionât?
«No ai inmò capît… no soi usât a no lavorâ. Dal sigûr si è plui libars e o pues fâ ancje «l’eretic» che fin che tu sês in Rai no tu puedis fâlu».
Alore tachìn: furlan in Rai?
«Simpri masse pôc, parcè che la aplicazion de leç in Rai e dipent dome de politiche: nol è nuie in Rai che no si môf se no lu decît la politiche».
E pal gnûf contrat di servizi, saraie la volte buine?
«No met la man sul fûc…»
Nus somee che la sede Rai di Udin e sedi sbandonade…
«Prin di dut no je une «sede», ma un «nuclei distacât de redazion». Secont, al dipent simpri de politiche».
Ce pensial de propueste di Citât metropolitane di Triest e zone dal Friûl autonomis?
«Magari! Ma o soi convint che e coventi une leç costituzionâl. Al sarès un ben pal Friûl, ma ancje par Triest. Parcè che lis dôs realtâts a son diviersis e al sarès un erôr confondilis».
E dentri dal Ordin, un asset dal gjenar?
«No pensi che si vedi di partî dal Ordin che al à funzions burocratichis e di control deontologjic professionâl. E par chest aspiet i nestri gjornaliscj no fasin tancj problemis di nature dissiplinâr: a son cuietuts… e o dîs «purtrop», parcè che o preferirès coleghis cuntun pôc di pevar di plui! A son masse omologâts».
Parcè in Rai no ise inmò une redazion in lenghe furlane come pal sloven a Triest o il todesc e il ladin in Trentin – Sudtirôl?
«La situazion e je difarente par vie che lis realtâts che tu ricuardis a àn leçs specifichis cun dotazions di pueste. Ma jo o pensi che pe redazion slovene cheste no sedi stade une sielte positive parcè che si son sierâts tra di lôr. Prime a jerin ancje tai tg talian, cumò nuie. Pal furlan o sin inmò plui indaûr e chel tic no lu fâs la redazion gjornalistiche, ma i programs… Cun di plui, il fat che la Rai e je gjestide a Triest al penalize inmò di plui il Friûl».
Si saltial fûr di chi?
«Se la politiche e decît, sì… se no…»
L’ordin ce fasial pai gjornaliscj plurilengâi?
«O sin stâts i prins a fâ i esams professionâi par furlan (mi visi che la prime e je stade Elisabetta Pozzetto). O vin simpri i comissaris a Rome (pal furlan al è Silvano Bertossi) e o garantìn chest dirit ancje pal sloven. Cun di plui, ancje se dome te intestazion, o sin i unics che o vin l’anuari par talian, furlan, sloven e todesc. E o tornarìn a fâ i cors di formazion di lenghe furlane pai gjornaliscj furlans. Jessi plurilengâi e je une necessitât, massime pal nestri mistîr».
Furlan a scuele, sì o no?
«Sì, o vin bisugne di cognossi ben la nestre lenghe. Ancje se o soi un tic critic cun cualchi sielte academiche, che però o rispieti. Ma no podìn dismenteâsi dal popul».
Il digjitâl terestri isal «la soluzion di ducj i mâi» o ise une bufule che e sarà za vecje?
«Al è un passaç e probabil che al sedi za passât. Tant al è vêr che cumò tante informazion e passe adiriture sui telefonins».
Ce pensial de informazion sul Web?
«La uniche pussibile tal timp. Chê sul web e je plui direte, plui imediade e plui economiche: al è inevitabil che si imponi. Jo o preferìs la «cjartute» in man, ma aromai la strade e je segnade e no si torne indaûr».
Leial «La Patrie dal Friûl»?
«Simpri lete! O ai vude la furtune di cognossi il grup di Risultive cuant che si cjatavin a la Tavernetta di Zebe De Zacinto: pre Marchet, ma ancje Dino Virgili, Pieri Piçul… ma il gno mestri al è stât Lelo Cjanton».
Ce ricuart aial di lui?
«Une persone di grande culture e grande modestie, parcè che dome chei che a san tantis robis, a san di no savênt avonde e si presentin simpri cun grande umiltât».
Di zovin si è batût pe universitât furlane e al jere dongje dai autonomiscj, e cumò?
«Jo o soi un dai fondadôrs dal Moviment Friûl inmò dal 1965, ancje se in chei agns no podevi nancje votâ parcè che no vevi 21 agns. La universitât e je stade une rivendicazion sacrosante: il Friûl o si ten dongje la sô universitât o nol varà plui une sô identitât».
E la universitât tegnie dongje il so Friûl?
«No sai ben, ancje se mi somee che e fasi. Ma no stin a dismenteâsi che e je simpri une istituzion statâl e duncje o tornìn sul teme de politiche».
Cui rapresential miôr lis istancis furlanistis vuê?
«Si à di dî che la Leghe che e sta dongje Fontanini e je une vore atente a chest. Però i furlans a àn di tignî ben presint che la autonomie no àn di spietâle ni de Rome «italiche» ni di Milan «padan». La autonomie si le costruìs chi. Cun di plui o scuen dî però la autonomie moderne no je mai «bessole». Il «di bessôi» nol va plui ben parcè che aromai il mont al è gambiât e tu âs di relazionâti cui chei altris, no isolâti. Po dopo se il «di bessôi» al significhe «fâ cont su lis tôs fuarcis», alore mi va ben, parcè che la tô autonomie no te dan chei altris».
Christian Romanini
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +