Sfuei Mensîl Furlan Indipendent
Archivi de Patrie

ATUALITÂT – Ancje in Cine si fevele par furlan

............

A son a pene nassûts in vie uficiâl ma a son bielzà cetant atîfs: o stin fevelant dai doi Fogolârs furlans cinês, screâts ae fin dal mês di Avrîl in ocasion de vignude a Pechin e a Shanghai di une delegazion dal Ent Friûl tal mont vuidade dal president Giorgio Santuz dal president del Consei regionâl Edouard Ballaman.
Il president dal Fogolâr furlan di Pechin al è un zovin di 34 agns di Cividât, Alessandro Fatovic, che al rivà pe prime volte tal “paîs di mieç” (chest il significât di Cine inte lôr lenghe) uns cinc agns indaûr. Cumò al lavore tun studi di architeture a Shanghai.
President, cemût ise lade la schirie di events inmaneade pe scree dal Fogolâr di Pechin?
E je stade une grande fieste lade indelunc par plui dîs ancje par fâ cognossi il made in Friûl in Cine. La ocasion e je stade valide par fevelâ di sgambis culturâi e di leams economics di svilupâ jenfri lis dôs realtâts. Di là de capitâl o vin visitât ancje Qingdao, citât sul mâr innomenade pai cantîrs navâi.
Cuant âstu vût la idee di tirâ dongje i furlans che a vivin in chest grant paîs de Asie di Soreli jevât?
O lei a fevelâ di cheste iniziative un pâr di agns indaûr cui responsabii dal Ent Friûl tal mont, e daurman mi metei sot par clamâ dongje i furlans di Pechin e di Shanghai. Lis robis a lerin ben subit, cussì o sin rivâts a meti adun lis fuarcis necessariis. Dopo un periodi di convivence, tai dîs passâts o vin screât i doi Fogolârs gnûfs creis.
Trops sono i socis?
Cjapant dentri ancje i amîs di Shanghai, cumò o sin plui di 50. La nestre volontât e je chê di rivâ a cuote cent di chi a pôc.
Cemût ise stade la rispueste di bande
dai “furlans cinês”?
Pardabon positive: l’entusiasim nol è mai mancjât soredut di bande dai zovins, sei che a sedin students di cinês a Pechin o a Shanghai, sei che a sedin zovins imprenditôrs. La etât medie dai membris e je pluitost basse, tor dai 40 agns. Si pues dî che il nestri al sedi un Fogolâr un pôc particolâr, diviers di chei altris che si cjatin ator pal mont.
Ce ativitâts puartaitso indevant tal vuestri Fogolâr?
O vin tal cjâf di fâ un grum di robis, tacant cul creâ e rinfuartî i rapuarts cu lis impresis furlanis che a pandin interès viers il marcjât cinês, il plui grant dal mont: il nestri obietîf al è chel di promovi il Friûl e la int furlane in Cine. E po di meti in pîts ancje un Udinese club, stant che i cinês a van mats pal balon.
Secont te cemût larano i rapuarts, soredut di un pont di viste culturâl, cul Friûl?
O crôt simpri miôr. La maniere juste par vê leams economics cu la Cine e je chê che e partìs di une fonde culturâl. Ai cinês ur interesse un grum dut ce che al ven de Italie e duncje ancje dal Friûl. La culture e je, cumò come cumò, l’imprest plui potent par jentrâ dentri in chel marcjât.
Crodistu che i cinês rivedino a capî lis carataristichis tipichis dai Furlans, tacant dal fat che nô o vin une lenghe dute nestre?
Chest al è un tic plui dificil. Prin di dut nô si presentin come Talians, par vie che chest al è l’element plui identificatîf. Podopo, o cirin di spiegâur dulà che si cjate il Friûl, ur fevelìn dal nestri teritori, de lenghe, de culture, de mentalitât e ancje de nestre mangjative.
ALESSIO POTOCCO
________________________________
LA CINE, IL «PAÎS DI MIEÇ» 中国  – Zhōngguó
Superficie: 9 milions 671 mil chilometris cuadrâts
Popolazion: un miliart 330 milions
Capitâl: Pechin (Beijing – par cinês
al vûl dî “capitâl dal nord”)
Provinciis: 22; in plui a son 5 regjons autonomis, 4 citâts metropolitanis
e 2 regjons aministrativis speciâls (Hong Kong e Macao)
Grups etnics ricognossûts: 56
(il plui grant, i Han, al cjape dentri
il 92% de popolazion)
Tas di cressite economiche: 6,1% (prins trê mês dal 2009)

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +