ATUALITÂT – Alessandro Ortis premiât a Bertiûl

Bertiûl al à celebrade la sô pome plui nobile cu la edizion numar 62 de Fieste dal Vin, organizade de Pro Loco dal puest in colaborazion cu la Regjon Autonome Friûl Vignesie Julie, cu la Provincie di Udin, cul E.R.S.A. e cun altris Ents e Associazions come “La Patrie dal Friul” che e à preparât il so “bancut” dongje de Enoteche centrâl.
VINS DOC PAR UN FURLAN DOC_Ancje chest an, pes viis dal paîs, a jerin barachins colorâts par dâ fûr e par promovi vins e prodots agrialimentârs, intratigniments, mostris, cunvignis e musiche, che a àn fat “tipichementri furlane” la manifestazion nassude intal 1950 a cjaval de ricorence religjose di Sant Josef, il “pai” par antonomasie. Propit tancj paris, in chei agns dûrs, a àn lassât il Friûl cirint ocupazion. I emigrants intai agns a son deventâts rapresentants naturâi de enogastronomie furlane in milions di cjasis di Camberra a Colonie Caroya, dal Canada ae Svuizare. A un furlan celebri intal Mont al è stât cussì dedicât il premi 2011: “Vins DOC par un furlan DOC”. La Comission – vuidade dal President dal Ente Fiuli nel Mondo, Piero Pittaro – e à individuât tant che “Persone che si è distinte tra chês altris pal contribût ae cognossince dal vin e de culture furlane e par un afiet particolâr ae nestre tiere”, Alessandro Ortis.
ALESSANDRO ORTIS_ Nassût a Udin intal 1943, al è un Inzegnîr Nucleâr che al à vût rûi clâf in aziendis tant che Zanussi, Pirelli, ENI, Enel, e v.i. Dal Dicembar dal 2003 al 2010 al è stât President de Autoritât pe energjie eletriche e il gas, favorint la liberalizazion dal marcjât e promovint une miôr eficience dal marcjât eletric. La impuartante incarghe inte Autority no lu à dut câs puartât lontan dal Friûl: a son stâts numerôs in chescj agns i incuintris istituzionâi e tecnics par potenziâ la rêt energjetiche regjonâl intune vision europeane.
A son stâts desenis ancje i ricognossiments assegnâts al dirigjent (il Fogolar Furlan di Rome intal 2004 lu à onorât dal “Premi Giovanni da Udine – Presince Furlane a Rome”) ma chel di Bertiûl par Ortis al è stât un moment comovent: «Cheste enoteche e jere une cjase di contadins, cheste sale une stale. Par un furlan ator pal mont come me ricevi intun puest cussì, e dai furlans, un premi al è une grande emozion. Nô o rapresentìn cui fats e cul lavôr la nestre int».
Daniele Martina