ATUALITÂT – Al è miôr fâ invidie che no pietât

“Al è miôr fâ invidie che no pietât”. Al è chest il sproc di Miss Fvj, Valentina Vidal, 22 agns di Strassolt. E dite di une miss al sune propit ben, «viodût che dispès o sint coments no masse ninins tai miei confronts», e conte jê. E à scrit cheste frase propit par furlan ancje ta la vôs “Citazioni preferite” sul profîl di muselibri tant par meti in vuardie ducj (e soredut dutis) chei che a àn alc ce dî.
E al è di dî che Valentina e je une biele cu lis ideis claris: rivade 12esime al concors di “Miss Italia”, no i è lât jù il fat che su 30 finalistis dome 4 a jerin dal Nord. «Masse pocjis, sumo», e veve comentât a cjalt. Isal alc di sporc tal concors? «Chel no, semplicementri al Sud i tegnin di plui ai programs di bielece e a supuartin lis fantatis. Ancje i morôs, tu vevis di viodi che di là jù a levin ator a promovi lis lôr zovinis, i nestris oms invezit a jerin tun cjanton gjelôs e sustâts». E je vignude fûr, però, ancje une altre spiegazion. «Cuasi dute la jurie e je fate di personaçs che a vivin di Rome in jù e un pôc di campanilisim al è».
Dut câs la biele da la Basse no si è mangjade il fiât par chestis robis: «O soi contentone dal gno risultât, e cui sal spietavial!». E cumò e torne a pensâ al studi e al volley, lis sôs passions. Laureade in Economie Aziendâl, e je iscrite a la specialistiche e tal timp libar e zuie in serie C ta la scuadre dal Talmassons. La altece (1,79) e je da la sô bande, «ancje se a fuarce di alenâmi o ai lis cuessis avonde gruessis e tal mont da la mode no van ben, però mi àn puartat furtune a Miss Italia». Valentina e je nassude a Savone, la sô mame e je piemontese, ma e je simpri stade a stâ a Strassolt. «Mi sint furlane al cent par cent, no larès mai vie di ca». E fevele furlan abitualmentri, cui amîs e cui parincj di bande dal pari, e cuant che e deventarà mari e à sigurât che i insegnarà la marilenghe a so fi. «O soi une tradizionaliste e i ten une vore a chestis robis ancje se il gno morôs atuâl al è di Belun e cun lui no pues fevelâ furlan». Secont la Miss al è just che il furlan al vegni insegnât ta lis scuelis, «une pussibilitat che no à di mancjâ par ducj chei che lu desiderin, di fat e je une lenghe vere e proprie e no à di murî».
Valentina Pagani