ATUALITÂT – 150 agns de nassite di bonsignôr Faidutti, “deputât furlan al Parlament di Viene”

INOVÂL_Cjapâts masse de fieste pai 150 agns pe proclamazion dal Ream di Italie, il Friûl al à riscjât di dismenteâsi dal inovâl de nassite, colade juste tal 1861, di un dai siei fîs che al fo protagonist jenfri Votcent e Nûfcent tal Friûl di Soreli jevât. O stin fevelant di Luigi Faidutti, nassût ai 11 di Avrîl di 150 agns indaûr a Scrut di San Lenart, in Sclavanie, in chei agns te Contee di Gurize e Gradiscje, sot dal Imperi asburgjic. Di bon che no si son dismenteâts di lui l’Istitût di Storie Sociâl e Religjose di Gurize e la Societât Filologjiche Furlane, che ai 7 di Avrîl stâts i àn dedicât une cunvigne li dal Consei provinciâl di Gurize.
STUDIS_Cressût tun ambient plurinazionâl e plurilengâl come che al jere il Gurizan prime de Vuere Grande, Faidutti (bon di fevelâ furlan, talian, todesc e sloven) al fo predi, politic, diplomatic, operadôr culturâl. Al studià prime li dal ’Seminari di Udin po in chel di Gurize, tal 1884 al vignì ordenât predi. Li de Universitât di Viene al cjapà la lauree in Teologjie, po al studià li dal Augustineum, il centri di ecelence pe formazion dal clericam par dut l’Imperi. Tornât a Gurize, al fo insegnant di Scriture sacre tal Centralseminar, al fondà societâts economichis catolichis, al deventà aministradôr public impegnantsi te culture e te scuele. Tal 1896, a Caprive, Faidutti al tirà sù la prime Casse rurâl furlane de Contee, tal 1900 al fasè nassi invezit la Banca friulana.
DEPUTÂT_Une vore impegnât tal sociâl, Luigi Faidutti al jentrà in politiche, deventant promotôr dal Moviment cristian sociâl tal Friûl di Soreli jevât. Tal 1907 e tal 1911 al rivà a fâsi elei deputât a Viene, tal 1913 al fo nomenât dal Imperadôr Cjapitani de Contee di Gurize e di Gradiscje. Dopo de Vuere Grande, al fo impegnât in Lituanie par cont dal Vatican, cjapant un puest di prin plan tes istituzions eclesiastichis di lenti vie. Muart a Königsberg, in Prussie, tal 1931 a 70 agns, al fo sepulît, dopo funerâi di stât, te cripte de catedrâl di Kaunas, chê volte capitâl de Lituanie, li che il so cuarp si cjate ancjemò in dì di vuê jenfri i grancj dal paîs ex sovietic.
POLIEDRIC_Come che nus à dit Ferruccio Tassin, membri de Deputazion di Storie Patrie dal Friûl, «Faidutti al è stât un personaç poliedric che al mertarès di jessi cognossût di plui di bande dai furlans. Al jere cussient di fâ part di une aree li che e viveve int di nazionalitâts e lenghis diviersis: par chest», al zonte Tassin, «al sintive il dovê di valorizâ ognidun te sô identitât, evitant in cualsisei mût la esaltazion di une partignince pluitost che di une altre par no zontâ nazionalisim a nazionalisim, tignût tant che cancar de societât». Par memoreâ bonsignôr Faidutti e je stade inmaneade une mostre fotografiche itinerant; plui indevant si tignarà une cunvigne di studis a Rome e une manifestazion e je in calendari in Dicembar a Scrut, li che al nassè.
Alessio Potocco