Trê apontaments vie pal mês di Lui, cuatri in Avost e un in Setembar. E va indevant la programazion cetant siore di “Suns Europe Istât”, calendari di concierts estîfs di Suns Europe – il festival des arts intes lenghis minorizadis di Europe, in program a Udin e in tantis altris bandis dal Friûl – che si sierarà te metât di Otubar cul concierton finâl intal Teatri Gnûf “Giovanni da Udine”.
◆ I apontaments in program par Lui a àn vût grant sucès: ai 20 te Aziende agricule Adele Barbieri di Cormons si son esibîts i Rivocs, i za Drumlanduo, Marco D’Orlando aes percussions e al bas, e Laura Giavon ae vôs. Trê dîs dopo, Lavarian al à dât acet al conciert dal galizian Lontras, sul palc de cort de Canoniche adun cul furlan Franco Giordani, acompagnât pe ocasion dal violoncelist Alessandro Turchet. Vinars ai 28 la caravane di “Suns Europe Istât” e je rivade a Romans dal Lusinç, li che, te cort de Biblioteche, si è davuelt il conciert dai bascs Ziztada & Rlantz, duet reggae-dub in vore dal 2017.
◆ Ancje il mês di Avost al sbrovarà benon e al sarà dedicât ai sunôrs furlans e catalans. Prin apontament di segnâsi al è chel dai 10 di Avost, aes 9 di sere, cu la vincidore de decime cuarte edizion dal concors “Sons de la Mediterrània”, Mar Grimalt, che e montarà sul palc dal fuart di Sante Margarite, intal comun di Murùs.
◆ La dì dopo, ai 11 di Avost, inmò aes 9 di sere, la zovine cjantautore di lenghe catalane, un dai nons plui impuartants de sene musicâl di Maiorche, e rivarà a Udin e si esibirà te cort Morpurgo adun cul furlan Massimo Silverio, intun conciert te suaze ancje dal cartelon di UdinEstate. Domenie ai 13 di Avost, aes 9 di sere, i tocjarà a di un altri catalan: Arnau Obiols in conciert te vecje miniere di Cludini di Davâr, in colaborazion cu la associazion culturâl Inniò, te suaze dal festival omonim che al larà a tocjâ i puescj plui evocatîfs de Cjargne. L’ultin apontament al è chel cun Urtie, il gnûf progjet animât di Marta Savorgnan e Margherita Cogoi, ospitadis ai 25 di Avost, aes 9 di sere, simpri te cort Morpurgo, par UdinEstate.
◆ A sierâ la programazion estive al sarà invezit il grup ocitan Dje Baleti che si esibirà ai 9 di Setembar, aes 9 di sere, a San Vît dal Tiliment, te place di Ligugnane.
◆ La rassegne – organizade ogni an de Cooperative di Informazion Furlane, editore di Radio Onde Furlane, cu la poie finanziarie dal Ministeri de Culture, de Regjon Friûl-Vignesie Julie, de ARLeF – Agjenzie Regjonâl pe Lenghe Furlane e dal Comun di Udin, e cu la poie dal Istitût Basc Etxepare, dai Comuns di Murùs, Mortean e Romans dal Lusinç, de associazion “Amîs da Mont Quarine” di Cormons, dal “Liberatorio d’Arte Fulvio Zonch” di Romans dal Lusinç e dal circul ARCI CRAL “Ciliti” di San Vît dal Tiliment e di cetancj altris sogjets publics e privâts – e à il merit di tramudâ il Friûl intune crosere di lenghis, culturis e artiscj, creant une ocasion uniche di visibilitât par produzions artistichis di alte cualitât ma che masse dispès a faturin a rivâ al grant public. ❚
Artiscj bascs, galizians e catalans ator pai paîs furlans cun “Suns Europe Istât”
