Sfuei Mensîl Furlan Indipendent
Archivi de Patrie

Insiemi te diversitât, cjantant par Furlan e Galês

Moira Pezzetta
Silverio
Silverio

Intun inizi 2021, dulà che o sin ancjemò dividûts dai confins, al è un alc che nus fâs sintî plui dongje, insiemi te diversitât, condividint une lenghe che e je par ducj compagne: la musiche. Al è cussì che, intun instreçâsi di sonoritâts svoladiis e intimistichis, cun riclams al rock e ae eletroniche, al nas “Yn y Swˆn  – Nijo”, un toc musicâl inconfondibil.
◆ “Yn y Swˆn – Nijo” e je une cjançon bilengâl inmagante, par furlan e par galês, che e salte fûr de colaborazion tra il cjantautôr cjargnel Massimo Silverio e il grup galês indie-rock des Adwaith.
La colaborazion tra Massimo Silverio e lis Adwaith e je nassude de edizion 2020 dal festival european des arts in lenghe minorizade “Suns Europe”, e dal progjet comun furlan – galês nassût de agregazion tra “Suns Europe” e l’“Eisteddfod Genedlaethol Cymru”, festival galês e vetrine artistiche e culturâl principâl dal Gales.
◆ Il toc, publicât de etichete galese Libertino al è compagnât di un video dal regjist Johnny Reed, che si pues viodi su https://www.youtube.com/watch?v=h_uhk7l_PYk. La cjançon e je evocative e introspetive. «Come che mi diseve gno nono – al conte Massimo – “Nijo” al fâs riferiment ae vecje espression furlane “Nio”, che a vûl dî “dapardut e di nissune bande”, invezit “Yn y Swˆn” si riferìs a un “rumôr interiôr”
◆ Il singul “Yn y Swˆn – Nijo” al è stât screât juste inte Zornade Internazionâl de Lenghe Mari, ai 21 di Fevrâr, propit par rapresentâ une Europe di là des divisions. Une Europe buine di esprimi la sô diversitât, condividint il podê des lenghis e di culturis, passant parsore dai confins. A dispiet de pandemie e de distance, i artiscj a àn lavorât insiemi: Massimo al à prin regjistrât ghitare, vôs e violoncel cui siei coleghis in Friûl, e il tercet galês lu àn fat a Cardiff, curant daspò il rangjament.
Par scuvierzi di plui su chest toc, o podês cjatâlu su lis plateformis digjitâls. Scoltait ancje la interviste di Pauli Cantarutti ai artiscj, te pontade di “La Crame” di Radio Onde Furlane: https://www.spreaker.com/show/la-crame_1
◆ Intant, ai 11 di Març Massimo Silverio al à ancje publicât il so gnûf EP intitulât ‘O’, sierant cusì il percors tacat un an fa, cul so prin EP ‘Ø’. [Patrie dal Friûl dai 14 Març 2020]
Chest album al è nassût dal lavôr dal cjantautôr insiemi cul diretôr artistic di Suns Europe Leo Virgili e cul musicist Nicholas Remondino, che a volevin meti dongje dutis lis cjançons anime dal percors musicâl che ju à puartâts ator pe Europe. Percors partît l’an passât, in Fevrâr, e che – come che al scrîf Massimo, riferìnsi ai siei coleghis e amîs, “Chest ‘O’ nol è plui vueit, e al è dut merit vuestri”.
◆ L’album, cun dentri i 5 tocs Criure, I, II, Nijo e O, al è disponibil su lis plateformis musicâls digjitâls https://massimosilverio.bandcamp.com/
Par supuartâ Massimo in chest 2021 tal segn de musiche che e scjavalgje ducj i confins, stait daûr sui siei profîi in rêt: https://www.instagram.com/massimosilverio/ e https://www.facebook.com/massimo.silverio  ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +