ART TAL TAC. Eliana Cargnelutti, la fantate di “Aur” dal rock furlan che al viaze ator par dut il mont

A l è za un mes che o scoltìn Who is the monster?, gnûf singul di une des raris “front woman” de sene rock e blues rock taliane e internazionâl: Eliana Cargnelutti. Dai 7 di Mai o vin l’onôr di scoltâ il gnûf album, tierç de artiste di Spilimberc, che ancje se al è par inglês, al puarte il titul par furlan Aur.
◆ «O vevi 9 agns cuant che o ai tacât a sunâ la ghitare. Vuê invezit, di ghitaris o ‘nd ai 9!.» Cussì si presente la rocker furlane Eliana Cargnelutti, che a 23 agns, dopo dai studis al Conservatori di Ferare, e je jentrade tal circul musicâl blues rock european, fasint tape ancje tai Stâts Unîts e in Gjapon. Eliana nus conte di vê cognossût tancj musiciscj, dai ghitariscj di Ike e Tina Turner al iconic Scott Henderson, de splendide Ana Popovìc a Eric Steckel di Los Angeles.
◆ Al è doi agns che, in plui di jessi dentri de sô band tant che soliste, Eliana e à fondât lis “Strange Kind of Women” uniche “tribute band” dute al feminîl pai magjics “Deep Purple”.  «Cul grup o vin vût la ocasion di sunâ cul baterist Ian Paice, e di partecipâ a festivals musicâi impuartants. O vin vût grant sucès e tant interès dal public e de critiche internazionâl. Graciis ae oportunitât di creâ rêt sul web o vin ancje viodût a nassi video colaborazions, come chê cun “Female Rockers”».
Il 2020 al è stât un pôc par ducj un an di polse e di cambiament tal mont musicâl. Eliana invezit si è butade tai braçs des notis par componi e par dâ vite al so album. «Un percors di resilience, ma ancje di liberazion».
◆ La cjançon Who is the monster? e conte une biele storie di amôr, ma ancje complicade e tossiche, che al è dificil distacâsi di chê. No si gjestìs plui ben la situazion cuant che no si rive plui a capîsi e soredut cuant che – tra i doi – si domandisi “cui isal il mostri?”. Il messaç che la artiste e vûl passâ cun chest toc, e in gjenerâl cul sô gnûf album Aur, al è chel di continuâ a lavorâ su la armonie individuâl di ognidun, sul miorâsi personalmentri. «O vin di lâ indenant a cirî l’aur dentri di nô, e di fâlu vignî fûr. Il neri nol podarà mai scjafoiâ il lusôr dal aur».
◆ Tal album si puedin scoltâ diviers gjenars musicâi. La energjie e densitât di ogni toc a crein un leam pal album intîr. «Il gno toc favorît al è Alone. La cjançon e à tancj significâts par me, e e presente une varietât di stâts di anim, vitalizade però di une sperimentazion sonore che par me e je gnove».
◆ Cun jê, a componi l’album a son stâts i siei grancj amîs de band, il fonic Francesco Marzona, Ronnie Grace par judâle cu la traduzion dai tescj, il grafic Giuliano Michelini e il regjist Simone Vrech.
◆ Par chest 2021, Eliana e veve programade une tournée in Gjermanie, che purtrop e je saltade. In program però a sono ancje concierts di Istât e une lungje tournée in Ingletiere par chest Autun e Invier.  «Insiemi ae “Eliana Cargnelutti band” o ai simpri l’obietîf di puartâ al public la nestre energjie e positivitât, ancje tai palcs fûr dal Friûl e de Italie. Dopo chest periodi di pandemie, o pensi che il desideri di condivision des personis al sedi simpri plui grant e no o sarìn vulintîr il mieç di traspuart par gnûfs “viaçs” e par fâ vignî fûr des personis l’aur che al è dentri di ognidun».
◆ L’album Aur, jessût ai 7 di Mai su dutis lis plateformis in rêt, si pues scoltâ in streaming, comprâ su BandCamp, Amazon, iTunes, o li di “Angolo della musica” di Udin. Chest Istât al jessarà ancje il vinîl, che al sarà di colôr aur. Stait daur a Eliana sui siei profîi social e sul sît www.elianacargnelutti.com par scoltâ il miôr dal rock nostran.  ❚