Sfuei Mensîl Furlan Indipendent
Archivi de Patrie

Doro Gjat al cjante des prospetivis fûr dai barcons di cjase, di ducj i cuatri i cjantons de Tiere, ae COP26

Moira Pezzetta
Doro Gjat

“Da casa mia, qui lungo il confine / sotto il cielo di nord est tagliato dalle scie chimiche / nuvole bianche di combustibile / mentre il mondo gira e si avvolge in orbite ellittiche”
◆ Ancje il rapper furlan Doro Gjat al a partecipât ae conference des Nazions Unidis sui cambiaments climatics di Glasgow. Te serade de UN Global Climate Action Award Ceremony, dai 10 di Novembar, Müller e Makaroff dai Gotan Project si son esibîts in direte sul canâl dal ONU e a àn fat viodi il video de cjançon di Doro Gjat “Da casa mia”:
https://www.youtube.com/watch?v=SV4xkvo3y28
◆ “Da Casa Mia”, al è il toc che Luca Dorotea, in art Doro Gjat, al à scrit e publicât ai 15 di Zenâr dal 2021.
«Dut al à scomençât cuant che Christoph H. Müller e Eduardo Makaroff, che ancje lôr a sunavin al “No Borders Music Festival 2019”, mi àn scrit une mail e mi àn domandât di cjatâsi. Jo mi impensavi di lôr e dal lôr non, parcè che tai agns ’90 a jerin un dai riferiments musicâi de sene eletroniche europeane.
Si sin cjatâts a Tarvis, e tra une bire e un te cjalt o vin fevelât di musiche, clime e teritori. Ae fin, mi àn dit che a son restâts tant maraveâts des cjançons che o vevi publicât e che a volevin colaborâ cun me.
Cualchi setemane dopo o jeri insiemi al gno ghitarist Luca Moreale, e dopo pôc o vin tacât a scrivi il toc, tacant dal ritornel, che di subit nus à plasût.»
“Dalla finestra vedo il cambiamento in corso / vedo la mia terra farsi scura in volto / le chiedo come stai / non mi risponde mai / mentre il sole cala e chiude gli occhi al giorno”
«I barcons, a son chei che denant dai lôr veris o vin passât grant part dal nestri timp tai ultins 16 mês. O vin ducj cjalât il mont ralentâ, fin che si è cuasi fermât, par daspò tornâ a metisi in moviment, e po fermâsi di gnûf. O vin cjalât lis stagjons cambiâ in sincronie cui colôrs dal bosc. O vin viodût il cîl slusî di blu cuasi artificiâl, e daspò intenzisi di grîs e fâ colâ lagrimis di nêf.»
◆ “Da casa mia”, al fâs part dal progjet “Antropoceno” e al conte dai efiets dai cambiaments climatics, viodûts dal barcon di cjase.
In particolâr, al conte ancje di cemût che la tampieste Vaia de fin di Otubar dal 2018 e vedi stravuelzût il paisaç e i boscs dal Friûl de Alte.
◆ Doro Gjat al fevele dal cambiament climatic, contant la sô esperience personâl: «O soi nassût e cressût tra lis monts de Cjargne e tai miei 38 agns di vite o ai vût mût di sperimentâ in prime persone une schirie di cambiaments avonde radicâi dal compuartament dal clime tes mês vals.»
◆ Cheste cjançon e rapresente pal artist une version riviodude di ce che, za plui di trê agns indaûr, al voleve contânus cul so secont disc “Orizzonti verticali”, jessût ai 20 di Avrîl dal 2018.
Dopo l’album “Vai Fradi” dal 2015 (La Patrie e à scrit di lui tal numar di Zenâr-Fevrâr dal 2016: https://www.lapatriedalfriul.org/?p=16210), Doro al à lavorât a diviersis cjançons. O ’nt ricuardìn cualchidune: “Zenit”, dulà che nus puarte sul Mataiûr; “Aprile”, zirât tai boscs de Cjargne e jessût par anunziâ la publicazion dal so secont album; “Blu” come lis prospetivis che nus da la mont, dulà che il blu al è il cîl, e la voglade e je indreçade insù par evadi de realtât; e infin “Fuoristagione”, un singul che al fevele juste ben des stagjons e dal cambiament climatic. Parcè che, come che al dîs Doro «al è un argoment che o vin di tabaiâ e di confrontâsi.»
◆ Cun simpri plui decision, il cjantautôr furlan si fas puartevôs di cui che al vîf lontan des citâts, a ribati che la musiche no à confins e che cun jê o podìn fâ cognossi lis realtâts locâls, esprimisi e fevelâ ancje di chei argoments che plui di ducj nus àn di svicinâ e di fânus agjîi tant che comunitât. Al prin puest, il cambiament climatic.
◆ Par fâ sintî il vuestri calôr a Doro Gjat e par savê di plui sui prossims progjets e concierts, stait daûr sui social e sul so sît: https://www.facebook.com/dorogjat/ http://www.dorogjat.com/ ❚

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +