ART TAL TAC. “Cui voi sierâts e a braçs vierts” al è nassût il piçul Noè

La mame Angelica Lubian e cjante
une dediche plene di amôr e di sperance
I l 26 di Jugn dal 2021, Angelica Ai 26 di Jugn dal 2021, Angelica Lubian e à publicât il singul “Il tuo nome (oggi è per sempre)” dedicât a so fi Noè, a un an che al è nassût. Une date particolâr pe artiste udinese, che di un sium e di cualchi note scrite sul telefonut e à metût dongje une cjançon che no si pues dismenteâ, plene di sperance e di amôr.
◆ La artiste e à condividût la novitât de jessude dal singul su lis sôs pagjinis social, publicant tocs di video estrapolâts dal videoclip de cjançon e scrivint: «Une sabide di Invier, intant che tu mi cressevis dentri, une onde di peraulis mi à savoltade tal cûr de gnot. O ai subit cjapât note, tal cjalt sot des cuviertis, cu la lûs frede dal telefonut.
◆ Po, une dì il mont al è cambiât. E tal mieç di une pandemie globâl, chês peraulis a son deventadis musiche.
◆ Il to papà e jo, cuntun butulut tal panzon, o vin metût dongje e regjistrât tal salot di cjase un aboç di chê che e sarès deventade “Il tuo nome (oggi è per sempre)”, la cjançon che e je une fotografie dal spietâ un frut e de maravee de nassite, o ben “… ad occhi chiusi e braccia aperte”, cuant che si da acet a une gnove vite. Ai 26 di Jugn dal 2020 tu âs sielzût che al jere il moment di vignî al mont, e la dì dal to prin complean e je la date che o sielç jo par fâ cognossi al mont la mê cjançon par te, Noè.»
◆ Insiemi al singul, che za al comôf, Angelica e il so om à an produsût un video cun dentri un collage di fotografiis e di filmins de famee, dal piçul Noè e de artiste cul panzon.
◆ No stait a pierdi i apontaments cun Angelica Lubian, cui siei progjets Peekaboom e Orsetti Chiacchieroni. Tantis novitâts e un gnûf album à son prossims. Intant stait daûr sul so sît AngelicaLubian.com, su la pagjine Facebook facebook.com/AngelicaLubian e cjalait i videos su Youtube youtube.com/AngelicaLubian. ❚
::::::::::::::::::::::::::::::::::::::::::::::::::::
Biografie
Angelica Lubian, cjantautore, musiciste e insegnante di cjant, fin di piçule e vîf di e pe musiche. Si è fate cognossi su la sene musicâl ai 24 di Otubar dal 2008, cuant che e à publicât l’album “Conservare in luogo fresco e asciutto”. Di chel moment, la artiste no smet di stupî il so public pe so vôs e pe musicalitât carateristiche, ma ancje pe sô presince e pal so traspuart sul palc. Si è esibide in plui di cuatricent concierts in dute Italie, condividint la sene e vierzint i spetacui di artiscj talians e internazionâi. Par nomenânt cualchidun: Gianni Morandi, Ron, Niccolò Fabi, Edoardo Bennato, Eugenio Finardi, Peppe Barra, Biagio Antonacci, Anastacia, Tom Verlaine, e Kaki King.
◆ E à puartat lis sôs cjançons intes arenis, intai teatris nostrans e tal forest, e tra i siei singui plui impuartants o ricuardìn i tocs “Nosferatu”, “L’oroscopo del giorno”, “Pur che se ne parli” e par inglês “Counting sheep” e la live-cover di “Always on the run” di Lenny Kravitz. I albums che a puartin la sô firme a son “Conservare in luogo fresco e asciutto”, dal 2008, “Morso dopo morso”, dal 2011, e “E che Dio ce la mandi buona”, dal 2016.
◆ Te sô cariere e je stade finaliste e e à ancje vinçût ricognossiments preseâts tant che il Premi Pigro, il Premi Fabrizio De André e il TEDx Music&Art Project.
◆ Tal 2014 al nas il progjet Peekaboom, che al cumbine la vôs esplosive di Angelica cul liron e cu la eletroniche di Simone Masina. Tal 2016, la artiste e zonte a ducj chescj impegns un gnûf progjet – insiemi cul cjantautôr e so om, Matteo Canciani – dal non Orsetti Chiacchieroni, cun tocs dai doi artiscj intun mix pop eletronic acustic. ❚