Sfuei Mensîl Furlan Indipendent
Archivi de Patrie

A Nadâl al è jessût “Buere Lontane” il prin album di Cristian Mauro

Moira Pezzetta

“O sin moments tra mieç di siums, sin i pas tra mieç di nô. O sin ta buere libare, sin paveis tra îr e vuê… ” . Come une buere che a ven di lontan e che a fas cambiâ l’an, al è rivât il prin album di Cristian Mauro, artist che in dute la sô art al rapresente la sô tiere, il Friûl, e la marilenghe.
◆ Par chest, intun an plen di peripeziis, te setemane di Nadâl, al à publicat il so prin album, cun 12 tocs ducj par furlan.
◆ Nus conte «O jeri plen di emozion… », cuant che cinc agns fa Cristian al à tacât a frecuentâ il Folk club la Girada di Udin «…mi soi fat coraç e o ai partecipât ae mê prime serade. A pene rivât, o ai ricognossût il mestri Lino e mi soi metût in bande par scoltâ ce che a contavin tal taulin. Mi impensi che a stavin criticant Amy Winehouse e o ai pensât ‘pues crodi a ce nivel che a sunin chei chi, se le critichin cussì’. Invezit Lino si volte e mi cimie, al rît e si svicine, disintmi ‘lasse che a cjacarin’. Di chest moment, mi soi sintût a cjase».
◆ E al è cussì, che di cinc agns incà Cristian al sune a la Girada, in concierts e events tant che il Busker Festival e che al acompagne cu la sô ghitare e cu la sunete i zovins nons dal cjantautorât furlan, tant che Nicole Coceancig. Tal 2018 al rive tierç al Festival dai Fruts Furlans, cul toc “Tal gno cûr e je une rose”. Tal 2019 invezit al vinç il premi de jurie e di miôr cjançon, partecipant al 37m Festival In arte Buri cun “Conte le lune lusin lis stelis”.
◆ Il disc “Buere Lontane” al è jessût a Nadâl parcè che «chel di cumò al è il moment dulà che o ai bisugne di tornâ a cjatâ me stes, e mi plâs pensâ che Buere lontane e sedi une storie di contâ, un alc di lassâ di me tant che olme dal gno passaç ta chest mont». Di fat, il toc che plui lu rapresente al è “Cirìnsi li”, dulà che al fevele al spieli e si fâs domandis su la vite.
◆ Tal disc al è acompagnât di doi zovins cjantautôrs e amîs, che l’artist al ringracie di cûr: Alvise Nodale e Nicole Coceancig. Biel viodi che il cjantautorât in Friûl al è tant che une grande famee. Al baste savût che la detule di Cristian e je “Happiness only real when shared”, di Christopher McCandless (“Into the Wild”). Sul biel CD e je la imagjin di une fuee di aiar, che e rapresente il Canadà, paîs adorât di Cristian.
◆ Par lassâsi traspuartâ di melodiis folk e svolâ come l’aiar, comprait l’album. Par savê dulà cjatâ Cristian in conciert, stait daûr de sô pagjine Facebook o scrivêt un messaç a maurocristian75@gmail.com  ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +