Al è un progjet in Friûl che al vûl promovi i lengaçs artistics contemporanis, sostignint la ativitât di artiscj nassûts o che a vivin in regjon. Si clame ManinFesto e al è rivât ae tierce edizion. Daspò chês dedicadis ae piture e ae fotografie, il Centri di art contemporanie di Vile Manin, che al puarte indevant il progjet, al à decidût di meti chest an in prin plan la sculture e la instalazion.
Fin ai 18 di Zenâr si puedin viodi a Passarian i lavôrs dai 8 finaliscj, selezionâts tra 146 partecipants de zurie, che e à sielt artiscj che a proponin progjets instalatîfs traviers une ricercje gnove e inovative e che, lavorant cun tecnichis difarentis, a àn savût jessi testemonis origjinâls de cuotidianitât. In pratiche, a àn premiât chei lavôrs che no si limitin ae idee di ogjet, ma che a comunichin un concet e, tal stes timp, a ufrissin al visitadôr une esperience gnove dal spazi.
A vinci il concors al è stât Federico Maddalozzo. 30 agns, pordenonês, al vîf e al lavore a Berlin e a Pordenon. Al partìs de osservazion dal mont par sezionâlu tes sôs components formâls e cromatichis e catalogâlu traviers di codiçs artificiâi di valôr universâl.
Al secont puest, Stefano Calligaro, nassût tal 1976 a Cividât, al lavore a Padue e a Rotterdam. Al dopre materiâi sempliçs par creâ gjeometriis astratis e essenziâls. La sô sculture, che e salte fûr di un dialic tra ogjet e ambient, e tradûs imagjinis tiradis fûr de realtât intun andament scuasi grafic e liniâr, puartantlis intun spazi che al somee a doi dimensions. Ogni composizion, di fat, al è un insiemit di segns, plui o mancul complès, che a tegnin, ancje te lôr forme plui finide, il caratar provisori di studi, tra ordin e casualitât.
Tierce la gurizane Anna Pontel. 34 agns, e vîf e e lavore a Triest. La sô ricercje e ironize sul podê de publicitât e de mode, su la dipendence e sul gust, ma ancje sul sisteme de art e dal marcjât. Tal so imagjinari, un univiers fat di travestiments, formis abitabilis e cuarps fûr di usance. Ogjets grandonons e, ae aparence, sore plui a deventin metaforis dai sintiments umans, che a sugjerissin une evasion de omologazion viers la creativitât dal mont de infanzie e de feminilitât.
Infin, al cuart puest, a pâr, Matteo Attruia, Michele Bazzana, Ludovico Bomben, Nicola Toffolini e Verde Olivia. Une menzon speciâl la zurie le à dade a altris 5 artiscj pal lavôr interessant e significatîf: Alberto Barazzutti, Emiliano Bazzanella, Alessandra Ghiraldelli, Francesca Martinelli e Lorenzo Missoni.
Tant che i agns passâts, la Galarie comunâl di art contemporanie di Monfalcon e darà acet ai artiscj «under 30», che si son distints pe origjinalitât dal lôr lavôr. Selezionâts dal diretôr artistic de galarie, Andrea Bruciati, a parteciparan a «Fruz 03: una nuova generazione di artisti in regione», dai 19 di Dicembar ai 18 di Zenâr dal 2009: Eva Geatti, Andrea Kvas, Francesca Martinelli, Lucia Soramel, Michele Spanghero e Diego Tonus.
Erika Adami
___________________________________________
CE FÂ
Si cumbine ben cu la coletive «Fruz 03: una nuova generazione di artisti in regione» la personâl di Michele Bazzana, «Robota». Lis sôs oparis a son rapresentazions straniantis che a partissin di ogjets di ûs cuotidian e industriâl. Instalazions fatis di materiâi montâts in assemblaments pôc probabii, che a vegnin mots di procès fisics o mecanics. La funzionalitât dal mecanisim si trasforme intune azion che e ironize sul rûl e il rapuart tra l’om e la machine. «Fruz 03» e la mostre di Bazzana a saran screadis vinars ai 19 di Dicembar, aes 7 sot sere, li de Galarie comunâl di art contemporanie di Monfalcon. A restaran viertis fin ai 18 di Zenâr dal 2009 dal martars ae domenie des 4 daspomisdì aes 7 sot sere; tai dîs di fieste e in chel prime ancje di matine: des 10 a une. Jentrade libare. Informazions al numar 0481/494360.
E. A.
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +