CULTURE. Il balon al è di ducj

Ogni joibe daspomisdì, des cuatri aes cinc, al va in onde su Radio Onde Furlane Il balon al è di ducj, il prin program sul mont dal balon pensât tant che contignidôr, cemût che si dîs in lengaç specialistic. In ogni pontade, dongje dai personaçs e dai intervents fis, al è cualchi ospit espert che al fevele, par furlan naturalmentri, dal mont dal balon. Si sintin cussì lis opinions di gjornaliscj, ex zuiadôrs, personaçs publics, ma ancje di un puestin opinionist, alternadis cun moments musicâi e intervents dal public. Al sucêt cussì di sintî no dome Dino Zof e Bruno Pizzul fevelâ par furlan, ma ancje Maurizio Zamparini, president dal Palermo, di divignince furlane. E un grum di voltis il balon al è il stimul par fevelâ di altris argoments, tant che la economie, dome par fâ un esempli.
UN SUCES CHE NO SI SPIETAVISI_ “La trasmission e je partide, cuasi par scherç, intal mês di Avost. Si pensave di fâ dome cuatri pontadis ma il sucès al è stât cussì grant che si à decidût di lâ indevant”, al spieghe il condutôr Enrico Turloni. La idee e je propit chê di fevelâ di balon cui scoltadôrs che, di fat, a puedin intervignî in direte sedi telefonant che doprant Internet. La relazion cu la rêt e je un dai valôrs zontâts de trasmission, in particolâr la colaborazion cui forum di balon di Sky, cun Fuarce Udin e cun chel de Associazione Udinese Calcio. “Fondamentâl però al è il rapuart cu la redazion di Udineseblog, il prin cuotidian online sul Udin e sul balon che ogni mês al conte 13 milions di contats” – al spieghe Enrico – “un numar pardabon impressionant”.
PAR DUT IL MONT_ In gracie de rêt, daspò la trasmission si pues scoltâ par dut. Di fat i file audio si puedin discjariâ dal sît di Radio Onde Furlane, e di Udineseblog, ma si pues ancje scoltâle in direte sul sît de radio in rêt Formatradio. Il rapuart cul forest al salte fûr in ogni pontade, propit in gracie dai intervents dai scoltadôrs che a rivin di dutis lis bandis di Italie e dal mont.
Il balon al è di ducj al à une vore di contats fûr dal Friûl e, nol è dit che in curt nol sedi ancje trasmetût di Rome. Enrico Turloni di fat al è un gjornalist professionist che al lavore pe Endemol Italia, la societât che e prodûs programs pe television. In curt al tornarà a vore a Rome e alore al è daûr a studiâ un progjet par rivâ a trasmeti ancje di là jù, e al sarès pardabon biel che un program in marilenghe al fos trasmetût di une altre regjon taliane.
FEDERICA ANGELI
__________________________________________
SÎTS INTERNET
www.friul.it
www.formatradio.it
www.udineseblog.it
www.fuarceudin.com
http://forum.sky.it/udinese-f18.html
http://udineseclub.net/
Cui che al vûl contatâ la trasmission, al pues clamâ il numar 0432/530614, o mandâ une mail a balonetifos@gmail.com