ART-Â. Ce fâ di Vile Manin?

In vot agns lis robis a Vile Manin a son cambiadis un grum, tant che lis aministrazions regjonâls che a àn segnât il cors dai programs de residence di Passarian. Tal 2004, cun Riccardo Illy governadôr, Vile Manin e devente Centri di art contemporanie sot di Francesco Bonami, tra i critics e i curadôrs di art contemporanie plui autorevui tal mont. Po, tal 2008, il cambi. Enzo Cainero, nomenât comissari straordenari, al cîr Marco Goldin, critic manager a cjâf di «Linea d’ombra», e i afide Vile Manin. In program cuatri agns di esposizions sul troi de art moderne. Ma, daspò dal tierç an, la gjestion Goldin si siere e Cainero – e o sin in dì di vuê – al cjape in man la situazion. In mostre il realisim socialist cecoslovac (fin ai 8 di Lui) e lis voris di Matteo Bergamasco, milanês, e William Marc Zanghi, italoamerican (fin ai 23 di Mai). E dai 15 di Dicembar, a 42 agns de mostre inmaneade di Aldo Rizzi, in vile al tornarà Giambattista Tiepolo.
In mert a chel che al è stât fat e al avignî di Vile Manin, «la Patrie dal Friûl» e à sintût doi operadôrs dal setôr, atîfs sul teritori regjonâl di cetancj agns: Andrea Bruciati, diretôr artistic de Galarie comunâl di art contemporanie di Monfalcon e curadôr dal progjet «Painting Detours» tal gnûf centri culturâl «Vile Gorgo “Guado dell’Arciduca”» a Noiarêt de Tor, e Paolo Toffolutti, diretôr artistic dai Spazis publics di art contemporanie Friûl-Vignesie Julie.
«Bisugne dâi une identitât a Vile Manin»_ «Bonami al veve progjets di interès, ma cence lidrîs tal teritori. Po si è passâts a sieltis, chês di Goldin, “blockbuster”, populistis. Tes propuestis transnazionâls o ai viodût dome paradis di oparis cence un progjet daûr».
Ce coventaressial alore par Vile Manin? «Un progjet sientific bon di dâ une fuarte identitât al spazi, che al è stât, cun Bonami, une vitrine, e, cun Goldin, un contignidôr. Si à di vê grande atenzion ae didatiche, si àn di dâ struments ae comunitât par lei ce che si dâ acet».
Par Bruciati Vile Manin e à «grandis potenzialitâts par chel che al inten la formazion, la residence di artiscj. Ancje in gracie dal fat che e je fûr man». Un ben, ma ancje un mâl. «L’isolament al è un limit se no si svicine il public, par esempli cun spuelis de stazion di Codroip». Robis semplicis, al marche Bruciati, ma che no son stadis fatis fin cumò, a dispiet des declarazions sintudis ae vignude di Goldin.
Di une bande, duncje, un non internazionâl e la sô programazion autoreferenziâl, di chê altre, un manager de culture e lis sôs propuestis indreçadis a fâ numars. Dôs figuris dal dut contrariis, ma, dutis e dôs, cence l’interès di une ricjadude sul teritori. Clâr che «a rimetii e je la struture e la comunitât, che no je cressude dal pont di viste culturâl». «Si pues vê un aflùs di public cuntune programazion articolade, diversificade, ma serie e continuative», al dîs Bruciati. «Jo o fasarès grandis mostris, ma ancje des focalizazions in spazis plui piçui e o lavorarès su plui plans – internazionâl, nazionâl e regjonâl –, tignint fer un progjet sientific di fonde». A Vile Manin «e covente une identitât fuarte, o speri che Cainero al rivi a dâje». Segnâi in cheste direzion? «Masse adore par dîlu».
«Progjets che a àn dismenteât il public»_ Di Bonami a Goldin, chel che al è mancjât par Paolo Toffolutti al è un progjet culturâl che al vedi in bon acet il public. Tal câs di Bonami, «al jere indreçât a esperts tal setôr, te suaze di un colezionisim ristret». Tal câs di Goldin, «si resonave dome in tiermins di biliets stacâts». In comun propit la «distrazion» viers i fruitôrs de art. Sedi dal pont di viste logjistic («Vile Manin e je decentrade, si àn di previodi mieçs che i rivin dongje») sedi dal pont di viste educatîf («E je mancjade la formazion di un public bon di esprimi un sens critic rispiet aes arts visivis»).
E il leam cu la art dal teritori? «Bonami e Goldin si son dismenteâts de produzion regjonâl e taliane». A dî la veretât, cun Bonami al jere stât inviât il progjet «Spazio Fvg» par promovi i artiscj di chenti (che al à dât acet ancje a une personâl di Toffolutti, ndr). «Un piçul ghet – al dîs il diretôr artistic dai Spazis publics di art contemporanie –. E je stade une operazion di façade, plui che di sostance». E lis mostris di Goldin dedicadis a Ciol, a Zigaina? «A son stâts omaçs a artiscj che a àn vût e dât dut chel che a podevin dâ. Ancje se a son vîfs, a son distants dal dibatit de contemporaneitât. E sì che vuê al è tant ce discuti e di fâ cognossi».
La esposizion sul realisim socialist in Cecoslovachie? «A Rome e je une esposizion su lis avanguardiis russis – al marche Toffolutti –. Fasìnsi vignî ideis diferentis! E po chescj a son progjets par museus. Se propit o vin voie di seguî un profîl storic artistic a son tancj artiscj talians di dedicâur une mostre e che a podaressin clamâ un public larc. O pensi al periodi che al va di Fontana, Manzoni de fin dai agns Cincuante ae art puare, ae art processuâl, indevant». Se, invezit, si fevele di ricercje presinte, «in regjon a son tancj artiscj brâfs. Nol covente spietâ che a rivin a 80 agns par fâur une mostre». E chê sul Tiepolo? «No ’nt capìs propit il sens». ■
Erika Adami –  Par segnalâ iniziativis o par contats scrivêt ae direzion mail: erika.adami [at] libero.it