ARG! SIGH! SPLASH! GULP! FIUMETTOPOLIX: fumuts a Flum!

Tai ultins agns, te nestre regjon, lis manifestazions leâdis al mont dai letôrs e dai autôrs di fumuts a àn cjapât simpri
plui pît e no mancjin cunvignis e mostris di risonance e interès nazionâl.
In chescj ambits la province di Pordenon e je une vore vivarose e ative tant che il numer di fumetiscj e ilustratôrs al è in cressite e, cul jutori des amistrazions publichis, si fasin ancje une vore di iniziativis par imparâ a disegnâ, a butâ jù senegjaduris e piturâ strichis. Chest an, chei autôrs e chei passionâts che a puartin indenant di tant timp il moviment dai “comics”, a àn inmaneât chê che e vûl jessi une rassegne fisse par fâ cressi e coordenâ il mont dai fumuts in Friûl. FIUMETTOPOLIX.
Par savê di plui su cheste gnove manifestazion o domandìn alc a Marco Dabbà, coordenadôr logjistic, espert di instalazions e grant “fan” dai fumuts made in Friûl.
D: Ce ise FIUMETTOPOLIX?
R: Une grande manifestazion che si davuelç in comun di Flum (PN) dai 21 ai 23 di Setembar e che e vûl dâ ai fumetiscj furlans la pussibilitât di metisi in mostre e di confrontâ lis esperiencis personâls cun chês di autôrs di livel statâl. La nestre regjon e je une vore siore di disegnadôrs tant che Toffolo, Altan, Barison, Toffanetti, Costa, Campaner e tancj altris ilustradôrs di lustri che a àn la pussibilitât di cjatâsi ator pe mostre e fevelâ di fumuts. La mê volontât e je chê di fâ nassi, pal doman, un pont di riferiment regjonâl dai fumuts coordenât e incentivât e, se al è pussibil, cun altris sedis leadis ator pe regjon. Partint di Flum, o volìn fâle deventâ itinerant te nestre regjon par segnalâ gnûfs disegnadôrs, gnûfs personâçs e gnovis situazions e par fâ nassi une culture furlane dai fumuts.
D: Cui aial vût la idee di fâ FIUMETTOPOLIX?
R: Dut al è nassût di une idee di Emanuele Barison (dis. di Diabolik) e Romeo Toffanetti (dis. di Nathan Never) doi fumetiscj professioniscj, za protagoniscj di manifestazions di fumuts tal pordenonês, cun tantis ideis, cognossincis tal mont dai fumuts regjonâl e statâl, che a àn dât ae scjalute de manifestazion un aproç sientific e une vore critic. FIUMETTOPOLIX al è nassût da lis cinisis di un apontament che za si devuelzeve a Flum tai agns indaûr che però di chest an, cul jutori de aministrazion publiche e di professioniscj dal setôr, al vûl montâ di livel e deventâ plui impuartant. Jo, par vie di une mê passion pai fumuts e ancje par vie dal gno mistîr di alestidôr di mostris, o ai preseât subite la iniziative e mi sei ufrît par coordenâ il dut a livel logjistic e pratic. Barison e Toffanetti, pe ocasion a àn ancje creât ICS, il gjat fumetât mascotte de manifestazion che al compagnarà dute la cunvigne. Par chest “numar zero” o varìn ancje il sostegn di firmis impuartantis dal gjornalisim di setôr.
D: Cemût si davuelzaraial il program?
R: Tai trê dîs di manifestazion o varìn incuintris scambis e mostris cun autôrs come Giorgio Cavazzano (disegnadôr de Walt Disney), Massino Giacon (fumetist e insegnant dal IED), Andrea Venturi (disegnadôr di Tex) e cun personâçs nostrans come l’udinês Paolo Paron (espert di tradizions locâls e president de societât Tolkeniane), il spilimberghês Francesco Bisaro e cul pordenonês Ugo Furlan (poliedric autôr autodidate).
In zonte o varìn proiezions di cartoons, mostris marcjât, mostris personâls dai autôrs ospits, incuintris a teme, concors di dissen, la mostre “I PRIMI EROI” (mostre dai prins erois a fumuts americans) e tant altri.
D: Ce vuelistu dî cu la frase… valorizâ i autôrs furlans?
R: In Friûl o vin un grant numar di disegnadôrs pardabon brâfs e talentuôs che a lavorin cun editôrs internazionâi e un grum di lôr a publichin continuementri ancje strichis in marilenghe. Parcè no radunâju e metju in contat par un disvilup in otiche furlane dai fumuts! Pal an che al ven o vin za tante cjar sul fûc e o volìn dedicâ un spazi ai fumetiscj pordenonês, in spiete che tancj altris si fasedin sintî e cognossi. Doprìn FIUMETTOPOLIX par coordenâsi e fâ nassi une rêt regjonâl dal fumut.
Mi clami Don Rosa e o cognòs ben Paperon de Paperoni!
Di Manià a Paperopoli dilunc la vie de emigrazion furlane: Jacum “Keno” Don Rosa, al è un dai plui grancj autôrs e disegnadôrs di fumuts de Disney. Specializât in storis di Zio Paperone (Uncle Scrooge), Paperino (Donald Duck) e dute la famee dai razuts al à ereditât il nom dal nono Jacumin Chino Rosa (keno par comoditât…), emigrât in Americhe di Manià tai prins dal 900. L’artist al è simpri stât braurôs da lis sôs lidrîs furlanis tant che il baûl doprât di so nono pal viaç al è deventât un simbul plui voltis plaçât tes sôs storiis (chel cui tacons e i ricuarts di Zio Paperone). Inventôr de saghe di Paperon de Paperoni, al à simpri vût passion pal dissen e prime di jessi fumetist a timp plen, al è stât ancje a vore te buteghe di famee.