Sfuei Mensîl Furlan Indipendent
Archivi de Patrie

Tutele linguistiche in Austrie

Lorenzo Marchiori, © Il Gazzettino, par concession dal autôr

Lis minorancis a son in Austrie tuteladis dal tratât di pâs di Saint Germain (1919) e di Viene (1955). Dirits particolârs a gjoldin i cravuats dal Burgenland, ongjârs, slovens de Carintie e Stirie, slovacs, cecs e dal 1993 ancje i sinti e roms, cence tutele e reste dome la comunitât dai jenisch. Il tratât di Saint Germain (1919), cjap. V. al ricognòs la paritât di dirits e di tratament par ducj i citadins austriacs di cualsisei grup lenghistic, l’ûs des lenghis di minorance tant che lenghis judiziariis, la istruzion elementâr inte lenghe mari e il finanziament des ativitâts sociâls e culturâls de minorance.
TUTELE MIÔR_Dopo la seconde vuere mondiâl tal 1955 il tratât di Viene al impon une tutele plui detaiade che e rivuarde dome la minorance slovene e cravuate in Carintie, Stirie e Burgenland. L’innomenât articul 7 al proviôt il dirit di meti sù organizazions, riunions e stampe, la istruzion elementâr e secondarie inte lenghe di minorance, l’ûs uficiâl dal sloven o dal cravuat, la segnaletiche bilengâl e la improibizion des ativitâts di caratar cuintriminorance. La cuestion de segnaletiche si movè tal Burgenland dome 45 (!) agns dopo il tratât di Viene, viert ancjemò il probleme dal insegnament opzionâl e la adozion dal criteri teritoriâl, almancul un cuart dai cravuats al vîf a Viene fûr dal teritori tutelât. Plui grâf ancjemò la situazion in Stirie, fin al 2004 lis autoritâts responsabilis no vevin nancje ricognossût la esistence de minorance slovene.
LA SITUAZION CARINTIANE_In Carintie lis robis lavin miôr sot il regjim di ocupazion, l’insegnament dal sloven al jere deventât tes areis di minorance obligatori ancje pe maiorance todescje. Dome trê agns dopo la firme dal tratât di Viene a pararin jù il sloven obligatori, dai 12.000 fruts 10.000 si disnotarin de scuele bilengâl. Tal 1957 a permeterin di gnûf lis ativitâts de organizazion nazionaltodescje Heimatdienst. Azions di zovins che a vevin tacât a meti sù cartei bilengâi a constrenzerin tal 1972 il guviêr Kreisky a aplicâ la leç e a meti sù i cartei bilengâi. Lis „fuarcis patriotichis” a rispuinderin cu la azion militante ”l’assalt ai cartei” (Ortstafelsturm). La serie di atacs e finì cu la dimission dal governadôr Sima, però cence consecuencis judiziariis pai protagoniscj.
FUARTS CUI DEBUI_Dopo che l’avocat sloven Rudi Vouk al veve mostrât la ilegjitimitât de segnaletiche monolengâl, la Cort constituzionâl e imponè tal 2001 la instalazion dai cartei mancjants. Haider e il cjamp patriotic todesc convints di vinci la lote pal monolenghisim si preparin a parâ la maiorance todescje di… une minorance che e clope?
Janez Erat
Assise dal Friûl
Fin cumò a difese de lenghe furlane si son jevadi dome vôs singulis, plui o mancul autorevulis. Cumò il front furlanist si mobilite e al da apontament a ducj chei che a crodin tal valôr de indentitât di un popul, ancje piçul, te Gnove Europe che e cres di an in an, si da apontament pai 11 di Setembar aes 17.30 te Aula magna de Universitât dal Friûl in plaçâl Kolbe. Promotôrs dal incuintri a son il stes ateneu, il comitât 482, il comitât pe autonomie e pal rilanç dal Friûl, i media de diocesi di Udin Vite Catoliche e Radio Spazio 103 e la emitent radiofoniche Onde Furlane. Argoment, la poie dai previodiments che il Consei regjonâl al esaminarà in autun par fissâ lis normis di tutele e valorizazion des lenghis minoritariis presintis in Regjon. Previodiments che a àn dividût il mont politic cuant che si è tratât di tacâ a discuti de maniere di aplicazion de leç statâl sul furlan a scuele. «Si à di evitâ, massime pai zovins, i risis de dispersion e scancelazion di une identitât storiche, linguistiche e culturâl dal Fril siore e preziose che e va mantignude parcè che il so popul – si ricuarde tal apel indreçât aes istituzions publichis dal Friûl, ma ancje aes associazions culturâls e sociâls – al podedi presentâsi cui siei valôrs e la sô muse su la sene taliane e internazionâl».
Lis comunitâts linguistichis storichis, si fâs presint, a son ae fonde de concession e de esigjence che ae Regjon Friûl – Vignesie Julie i è stât dât il regjim juridic di Regjon autonome a statût speciâl. Refudâ cheste specialitât deneant la pussibilitât di une scuele li che il furlan al sedi ancje doprât come lenghe par insegnâ altris materiis, al sarès un erôr che i promotôrs dal apontament di Setembar a intindin evitâ cun fuarce. Si à di ricuardâ che intant che il Consei regjonâl cualchi fuarce politiche, dal Centriçampe in particolâr, si è esprimude za cuintri di une leç masse furlaniste, ai 29 di Avost si son dâts dongje i Conseis provinciâi di Udin e Pordenon, tes lôr sedis, par dâ il vie libare al alt costitutîf e al regolament de prossime associazion des Provinciis furlanis. Iniziative che come che al à precisât il president de provincie di Udin Marzio Strassoldo «e je condividude cun fuarce e in maniere trasversâl di maiorance e minorance. L’obietîf al è prin di dut chel di costituî un lûc di incuitri e di verifiche des istancis che a vegnin dal teritori e di valorizâ i tancj progjets di colaborazion interistituzionâl che lis provinciis furlanis a promovin pal disvilup economic, sociâl, culturâl dal teritori».
:::::::::::::::::::::::::::::::::::::::::::::::::::::::::::::::::::::::::::::::::::::

ULTIME ORE: Vie a la associazion tra lis provinciis furlanis
Miercus ai 29 di Avost, aes 9 e mieze di matine i conseis provinciâi di Udin e Pordenon – li des rispetivis sedis – si son dâts dongje par dâ il vie ai doi documents che a fasaran operative la colaborazion: l’at costitutîf e il regolament di funzionament. Une riunion tal stes moment par rapresentâ, ancje simbolichementri, la unitâts di intents te diviersitât des dôs istituzions.
La associazion si clamarà Comunitât des Provinciis furlanis e i ats aprovâts dai conseis a saran sotscrits uficialmentri dai presidents Marzio Strassoldo e Elio De Anna. I obietîfs: utilizazion dal teritori, disvilup economic, servizis sociâi e culturâi. La Comunitât di fat, daûr di chel che al dîs il regolament, e à intenzion di deventâ une forme stabile di valorizazion teritoriâl, sociâl e economiche des diviersis comunitâts provinciâls dal Friûl, promovint «la eficacie e la eficience tal esercizi des funzions e dai servizis erogâts ai citadins tal teritori intîr des Provinciis e il miorament de economicitât tal ûs des risorsis finanziaris, umanis e strumentâls par fâ cressi la cualitât dai servizis ai citadins».
Par definî forme e contignûts de associazion i membris si son zovâts dal jutori di juriscj de Universitât dal Friûl.
La note stonade e ven dal consei provinciâl di Pordenon che al à aderît dome cui vôts de maiorance di Centridrete cence i vôts dal Centriçampe, a diference di Udin li che invezit la delibare e à vût la unanimitât cu la votazion a pro trasversâl sedi dal Centridrete sedi dal Centriçampe.

Redazion

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +