E covente une sensibilitât particolâr, par jessi in stât di dâi vôs ae nestre tiere
La vôs di Alessandro Pozzetto, innomenât diretôr e fondadôr di côrs, a nivel nazionâl e no dome, e je une cjarece calme in stât di bonâ la agjitazion di une zornade vivude di presse.
◆ La sô e je une vite dedicade ae musiche, di sticeboris in grups nassûts par stâ in compagnie e fâ fieste (cui nol cognossial “‘Quella mezza sporca dozzina”), a vuide e mestri professionist par corâls, massime chês gospel, tant che la Italian Gospel Choir, ven a stâi il Côr Gospel Nazionâl.
◆ Inte sô cariere, al à vût colaborât cun Stevie Wonder, Adriano Celentano, Mario Biondi, Katia Ricciarelli e, intai ultins timps, ancje cun Andrea Boccelli.
◆ Di cualchi an, dut câs, in plui di jessi insegnant e diretôr, Alessandro si è svicinât aes teoriis de biomusiche e aes tecnichis dal sound healing (la musiche tant che cure), intun percors di ricercje dut personâl sul sunôr e sui siei efiets benefics su la nature e sul om, che cumò al met a disposizion di chei altris.
◆ Di li, chest Istât e je nassude ancje “La cjante pe Tor”, une cjançon par furlan che e je un invît a cjapâ cussience dal teritori che o vin e che o vin di difindi. La ispirazion pe opare, par dîle juste, e je rivade pôcs dîs prime dal conciert, organizât de associazion “Guardiani del Torre” inte suaze dal Festival di Land Art “Art in Tor 2023 a Lusevare”, cun chê di stiçâ lis aministrazions e i citadins a firmâ un “contrat di flum”.
◆ Ca di pôcs mês, pe Vierte, al saltarà fûr un CD gnûf, cun cjançons par talian, par inglês e par furlan, li che si tocjin temis tant che la pâs (ispirantsi a Martin Luther King), la energjie feminine e chê de aghe, la tiere, ancje intai avigniments plui crûts, tant che la tampieste Vaia, cuntun messaç di sperance e ancje di mission pal om “vuerîr”, che al à di puartâ fûr la proprie lûs e bielece.
◆ Dentri si cjatarà ancje un cjant dedicât al Friûl, che Alessandro al cjantarà adun cu la sô femine, intun omaç braurôs a cheste tiere, aes propriis lidrîs e ae nestre lenghe. ❚
