Ivan Milocco al svole cul paremotôr – il «scooter dal cîl» – e al è un innomenât influencer tal so cjamp. Nus invide cun lui a viodi il panorame unic dal Friûl
Ivan Milocco, classe 1985 di Crauì («nô o disìn Crauè» mi dîs), maridât cuntun fi, al lavore intun implant di biogàs, ma il sô sium fin di piçul al jere chel di svolâ. Lu à realizât in gracie dal paremotôr: un motôr che si met sù pe schene tant che un russac, e une vele simile a chês dal plui cognossût parecleve. Cuntune piçule corse a pît intun moment si è sù par aiar, viers il cîl. Al è rivât tart a fâlu, ma cumò al è un dai plui famôs praticants di chest sport su internet: un vêr influencer tal cjamp.
_
Ivan, o scomet che tu âs fat il Malignani!
E invezit no, scomesse pierdude. O ai fat l’Ipsia a San Zuan cu la specializazion in furniduris, parcè che i miei a vevin une dite di cjadreis. E di fat o ai lavorât par 18 agns in chel cjamp. Duncje nuie che al jentràs cun motôrs o avions. Ancje par chel o ai tacât tart a svolâ.
_
Cemût âstu tacât a lâ in paremotôr, alore?
La passion pal svol le ai vude fin di piçul: cuant che al passave un avion o scjampavi fûr cjase a cjalâlu. Ma al è simpri stât un mont lontan, no cognossevi nissun che al ves contat, i miei no vevin passion… E alore o ai tacât a fâ lâ i acuilons e di plui grant i avions modei, i avionuts telecomandâts. Une dì o jeri li di un cjamp di svol par aviomodei e a son rivâts doi di lôr in machine. A àn scjamât i imprescj, ju àn metûts intor, e in mieze ore a jerin tal cîl. O soi restât inmagât! O ai contatât un dai doi, che al faseve part dal «Audace», un grup di paramotoriscj de Regjon, e cussì o ai tacât.
_
Covential un patentin? Coventino permès?
Si à di cjapâ il brevet VDS (Volo Diporto Sportivo). Di scuelis in Friûl no son, di solit i “nestris” a van tes Marcjis. Cumò, stant che no son tant difondudis sul teritori, lis scuelis a fasin cors intensîfs: e cussì cun uns dîs dîs di cors tu puedis vê il brevet. No coventin permès particolârs par svolâ: se tu partìs di un cjamp che nol è to, ti covente il permès dal paron e vonde. A son zonis vietadis al svol o cualchi regule di distance che tu imparis cul brevet, ma pal rest tu sês libar.
_
Isal un sport pericolôs?
E je la maniere plui sigure di dutis di svolâ. E la plui facile. Une volte cjamât su lis spalis il motôr e preparade la vele, tu partissis cjapant il svol cuntune corse a pît intun spazi curt, fâs cont la metât di un cjamp di balon. Ancje se par aiar ti si blocàs il motôr, la vele ti fâs di parecjadudis e tu vâs jù planc a planc. Tu sês a pît, duncje tu puedis rivâ jù li che tu vuelis in pôc spazi e in ogni cundizion: par esempli intun cjamp arât, li che se tu vessis ruedis tu ti ribaltaressis. Pal cîl tu vâs a une velocitât trancuile e costante (sui 90 km/h), no tu âs di bacilâ a viodi ce aiar che al è ator tant che cul parecleve, tu puedis svolâ plui bas che cun altris mieçs. Il paremotôr al è definît «il scooter dal cîl»: l’ideâl par viazâ facil e cjalâsi ator cence fastidis.
_
Trop costial lâ in paremotôr? A ce etât si puedial praticâlu?
Al è un sport a la puartade di ducj, sedi a nivel economic che fisic. Come etât dai 16 ai 80 agns, fin che tu rivis a fâ chê corsute par lançâti. Tant che coscj al è come vê une moto: cul materiâl gnûf tu spindarâs dai 7 ai 10 mil euros, cun 3.500 euros tu puedis cjoli un bon materiâl di seconde man che ti permet di svolâ ben.
_
Daûr di cheste passion, sui social tu tu sês deventât un influencer tal setôr: o ai viodût che in pôcs a àn i tiei numars, adiriture a nivel mondiâl! Un influencer vuadagnial, come che si sint dî ator?
I miei numars a son di mancul di chei dai americans, che a àn un bacin mondiâl par vie dal inglês e tant plui grant ancje come paîs. Però in Italie e Europe o soi dai prins, vere. Jessi influencer no ti fâs vuadagnâ, ma lis aziendis mi mandin materiâl di provâ o mi invidin a events. Un dai plui biei al è stât cuant che o soi stât invidât a svolâ parsore des piramidis in Egjit di une aziende che e gjestìs uficialmentri chê ativitât là vie. Ma la robe che mi plâs di plui di chest “rûl” al è il fat di coinvolzi la int, svicinâle a chest sport che al è ancjemò pôc cognossût (cuant che al fevele di chest si sint pardabon te vôs di Ivan la sô passion, ndr).
_
Ivan, ce si viodial di là sù? Il panorame bielon dal Friûl!
E je une tierce dimension, tu preseis dut in maniere divierse. In tancj paramotoriscj a vegnin dal forest a viodi i nestris paisaçs unics: la lagune di Maran, par esempli, e je un spetacul. Po dopo il Tiliment, preseât parcè che al à un svilup cu lis cuestis ancjemò salvadiis, naturâls, e ancje Palme. E po dopo i Cuei, il Cjars, lis monts: in Friûl, fasint 60 chilometris tu puedis viodi di dut, si sa. Pense che a son operadôrs turistics in Romanie che a organizin viaçs chenti par 2.000 euros. Bêçs che a podaressin restâ ca. Il paremotôr, come che si diseve, al è il mieç miôr e sigûr par gjoldisi il panorame: al podarès jessi un vetôr turistic ideâl.
_
Ti àno mai proponût alc par publicizâ il paremotôr tant che ativitât turistiche?
No, ma mi plasarès. Par cumò i forescj a vegnin cul passe peraule che o fâs jo cui miei videos su YouTube, ma e sarès une robe di sburtâ miôr. Mi plasarès organizâ ancje cualchi tour, o ai tacât a viodi di viodi: se o rivi a distrigâmi tai miei impegns, lu fasarai.
__
Cuâl isal stât il svol plui biel e cuâl chel plui pericolôs?
Mi ven iniment chel che o ai fat propit chest an ator de Mont Cjanine: trement e bielon. Trement parcè che o vevi un tic di pôre, no jessint usât a lâ in mont. Jo o soi de plane: tant che a pît, la mont e je bielone ma e va rispietade, e duncje si à di stâ atents. Però al è stât fantastic gjoldisi chel panorame imponent. No par nuie si clamilu il Massiç de Cjanine: al è propit maestôs. ❚
……………………………………………………………………….
FOCUS. Il paremotôr
Al è il mieç svolant plui economic e pratic, al permet la jevade e la rivade a tiere cuntune corsute semplice a pît. Il motôr al è montât suntun telâr metût tant che russac su lis spalis dal pilote. Al telâr e je tacade la veladure midiant doi moschetons colegâts aes tiracjis de vele. ❚
………………………………………………………………………..
LINK & LEAMS
La ativitât di Ivan si pues seguîle sul so cjanâl di YouTube www.youtube.com/@IvanMilocco, il so slogan al è «Achì si respire, si mangje e si vîf il paremotôr». Al è ancje su Instagram cul link @ivan_milocco. ❚
