Sfuei Mensîl Furlan Indipendent
Archivi de Patrie

Alessandra Primus Referente de Cjargne dai scampanotadôrs furlans

Marta Vezzi

Di cuant che e jere frute, Alessandra Primus e à vût simpri la passion pes cjampanis. “Finîti di servî messe, mi gjavavi daurman i vistîts di zagut e o levi sù di corse sul cjampanili. O disubidivi pre Attilio parcè che in chê volte il cjampanili nol jere a norme e al tocjave metii man par sistemâlu. Ma l’om al viodeve che o vevi passion e mi diseve “Va, ma sta atente!”. Muart pre Attilio, a son cambiâts diviers predis tal timp; jo no vevi plui coraç e no soi mai tornade sul tor. Ido Primus, il cjampanâr di Tamau, mi diseve di lâ, ma jo no soi tornade sù plui. Cuant che lui al è muart, mi soi domandade ce che o varessin fat cence di lui. Mi soi dite “cumò al va dut pierdût!”.
◆ Tal 2019 o soi lade a Sant Pieri di Zui ae bussade des crôs (propit in chel an, i tocjave ae mê famee puartâ la crôs) e mi è capitât in man il gjornalut de Polse di Cougnes, indulà che si scriveve ancje de scuele dai scampanotadôrs. Me sûr zimule mi à sburtade a lâ. La referente pe Cjargne e jere Gladis Craighero, che o cognòs benon, e cussì o ai tacât a frecuentâ i cors. Gladis mi à simpri coinvolte a lâ a sunâ intes diviersis ricorencis (cjaminade de pâs e altris manifestazions). Mi impensi che te ultime cjaminade de pâs al jere saltât l’implant eletric: o jerin trê feminis sul tor par dute la not, e Gladis e tirave la cjampane grande a man… A un ciert pont, Gladis mi à dit “Va jù a dî che a scurtin la robe, parcè che no rivi plui, o soi strache!”. Trê feminis suntun cjampanili, la ultime gnot dal an, invezit di jessi a cjase a fâ di mangjâ: esperience uniche!”


◆ Gladis si è dimetude e Alessandra Primus e à cjapât il so puest. Il desideri di pre Giordano Cracina, responsabil de Polse di Cougnes, al è chel di formâ un grup di scampanotadôrs cjargnei che al puedi zirâ e lâ intai paîs che a àn bisugne. In Friûl al esist za chest grup, ma achì di nô al stente a partî. “Cumò – e va indenant Alessandra – il gno compit al sarà chel di contatâ ducj i predis de Cjargne par viodi se a son personis interessadis a frecuentâ la scuele. Jo o continui simpri a lâ ai cors parcè che o ai simpri pôre di pierdi e di dismenteâ ce che o ai imparât. I maestris nus insegnin che no si à di vantâsi di savê sunâ lis cjampanis, ma si à di pensâ che o sunìn par che la tradizion e ledi indevant e no si pierdi.”
◆ Intun cors a son previodudis cuatri lezions indulà che, in plui de pratiche cu lis cjampanis, a vegnin fatis ancje lezions di teorie su diviers argoments (cemût che si fasin lis cjampanis, lis normativis di sigurece, metodis di sunâ, spiritualitât e valôrs dal sun des cjampanis inte culture furlane, ritmiche pal sun a slanç des cjampanis, e v.i.). Il prin cors al covente par fâ la orele, za cul secont si pues fevelâ di jentrâ tant che scampanotadôr… Ma, come che e dîs Alessandra, tocje tignîsi in alenament par no pierdi ce che si à imparât!
◆ Par iscrivisi e par cualsisei informazion, si pues viodi sul sît http://www.scampanotadors.org/ e ancje su la pagjine Facebook https://www.facebook.com/campanarifriulani
◆ “Jo o soi la uniche di cjase che e scampanote – e dîs Alessanda –. Chest an ae Sense mi son vignudis jù lis lagrimis pe grande emozion, e o ai ancje sbaliât (mê sûr si è inacuarte e dopo mal à pandût). Cuant che o suni mi si vierç il cûr! No sai cemût spiegâti. Pre Giordano al dîs che nô o sunìn pe glorie di Diu. Jo o dîs ancje par cui che nol è plui e par cui che al è lât cun Diu.
◆ Chest an ae Sense il gno pinsîr e la mê dediche a son stâts par pre Pierluigi Di Piazza. Ae cjaminade de pâs al vignive simpri a fânus i compliments.” ❚

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +