Sfuei Mensîl Furlan Indipendent
Archivi de Patrie

«O vin cambiât un tic la mentalitât dal Friûl: une grande sodisfazion»

Dree Venier

Interviste cun Nicola Masolini, puartebandiere de economie circolâr tal cjamp des scarpis in Friûl.
Mode cuntun voli (e ancje doi) viers dal ambient

Nicola Masolini, classe 1972 di Gonârs, al è un dai titulârs de dite di scarpis Re49 che e dopre pe produzion dome materiâi di ricicli. Une realtât nassude cualchi an fa in Italie, e massime in Friûl, pioniere dal setôr che cumò e je daûr a ricevi cetancj ricognossiments a nivel mondiâl e che, biadelore, si sta consolidant.
__
Nicola, la storie des scarpis Re49 e ven di lontan, no mo?
La nestre e je une dite familiâr inviade di gno nono dopo de vuere. In chê volte, passade la grande distruzion, no jere materie prime e duncje lui al doprave di dut, tant che lis gomis des machinis o des bicicletis o i materiâi plui diferents, bogns par fâ sù un prodot valit di meti tai pîts. Di li, la dite si è ingrandide daûr dal boom economic.

__
No ducj a san che une volte al jere un distret des scarpis grandonon in Friûl, nus contistu alc?
Vulintîr, di fat ancje la nestre imprese di famee e ven di in chê volte, come che o disevi. Intune fasse che e leve di Gonârs a San Denêl, a jerin passe 50 fabrichis cun in medie 20-30 dipendents e cun pontis di 300. E jere une fabriche che e tratave lis piels tant che la Cogolo, che duncje e servive dute cheste realtât.
__
Viodio nome jo un paralêl cul Triangul de cjadree, che di grant che al jere si è ridusût cetant? Si fasino simpri i stes erôrs?
Sigûr che al è un paralêl. Passade la prime butade cun grancj ordins, no si à cirût di creâ un vêr distret, cun scuelis par insegnâ il lavôr e par fâlu cressi di cualitât; no si à creât un indot di components, o fasint un cartel par sfidâ il marcjât. Propit cemût che al è sucedût in altris puescj tant che la Toscane, la Lombardie, lis Marchis, il Venit. Si è lâts indevant a combatisi sul presit, un cuintri chel altri, e cussì al è finît dut.

Nicola Masolini

__
Tornant a fevelâ di scarpis, mi pâr che tu vevis cirût une vie locâl ancje tal cjatâ i materiâi, che però no à menât tant, ise vere?
Al inizi al è stât cussì: nô cumò o doprìn materiâi tant che la tele dai ombrenons o des sdraiis di splaze, velis, gome e plastiche riciclade. Sul imprin o vin vût plui disponibilitât e curiositât di fûr dal Friûl, ma cumò nol è plui cussì. Salacor il discors al jere masse indevant, in chel moment. Cumò i timps a son cambiâts e o cjatìn tant entusiasim ancje chenti, tant che aromai il 90% e passe de robe e ven dute dal Friûl. O vin cambiât un tic la mentalitât: une grande sodisfazion. Mai molâ, in sumis.
__
Aromai il progjet al à cualchi an, cemût si staial evolvint? Al è stât ancje un cambi di non.
Prime al veve un non che o vin scuviert che al jere za regjistrât. Sul tacâ no vevin esperience e o vin vût di fâ tante ricercje. Ancje il marketing al clopave un pôc parcè che o vevi di fâ dut di bessôl. Cumò cul gno gnûf soci Alberto Ciani o vin dât un biel sburt ancje a chel, parcè che, si sa, fâ robis bielis e di cualitât nol baste, bisugne fâlis cognossi. Cun chel a son vignûts ancje tancj ricognossiments internazionâi pal nestri lavôr, a son rivâts dongje invistidôrs e negozis. Cumò, ultime gnove, o sarìn a Dallas e in Gjapon. Come premis, propit chê altre dì o vin vût la notizie che o sin in finâl te categorie Circular Economy dai 2022 Luxury Innovation Awards di Gjinevre.
__
Fevelant di chest, mi pâr che la imprese si sta rivolzint plui al setôr dal lus: no ise pussibile par cumò une mode plui a bon presit tal cjamp dal ricicli?
Come che ti disevi, daûr al è un grant lavôr di ricercje di materiâi, par testâju, par lavâju e sielzi chei bogns di doprâ. In pratiche, si spint il dopli. E dut câs, une scarpe fate a regola d’arte in Italie no pues costâ pôc. Ma il discors nol è tant chel dal presit bas: bisugne dâ ancje valôr a une robe fate ben. E che e à biei risultâts ambientâi: si calcole che par fâ un pâr di scarpis si produsin 20-40 chilograms di anidride carboniche, nô o sin sot zero, adiriture mancul 10-20 Kg.
__
Te tô storie, ancje aziendâl, e jentre ancje la Afriche. Continus…
A un ciert pont de vite o ai decidût di lâ a fâ une esperience tal forest, o volevi slargjâ i miei orizonts. Avonde par câs o soi capitât in Etiopie, prime par une vacance, dopo parcè che o ai scuviert une realtât une vore vivarose. Ancje li par câs mi soi cjatât a lavorâ tal cjamp de mode locâl. Li che si dopravin une vore di materiâi riciclâts, ma par sante scugne, no vint tantis materiis primis, come che al sucedeve a gno nono daspò de vuere. Di li o soi vignût in contat cun realtâts tal cjamp de mode “circolâr” che a vignivin dai Stât Unîts, e o ai tacât a lavorâ ancje cun chei. E dopo mi è vignude la idee di puartâ chês cognossincis in Friûl, te vecje dite di famee.

__
In cjamp artistic no tu inventis dome mode, tu sês ancje musicist. Une passion che ti ven simpri di chel continent.
Musicist e je une peraule masse gruesse (al rît, ndr). O sunavi, e li mi soi incuintrât cu la grande tradizion dal Reggae. Une musiche che mi è simpri plasude. Par dî, mi visi che di piçul, lant in machine cun gno pari, al veve lis cassetis di Celentano e di Bob Marley, e a mi mi plaseve tant di plui il secont. La Etiopie e je la tiere promesse dai rasta de Gjamaiche, che a van là par ricjatâ lis origjins, e a son tancj a stâ là, almancul par un periodi. E cussì o soi stât in contat cun grancj nons di chê musiche, e o ai vût fintremai il plasê di sunâ cun lôr. Un gno grant sium al sarès chel di organizâ e di seguî un tour di un trop di chescj grancj artiscj in Europe. Ma par cumò o soi masse impegnât cul rest (al rît, ndr) ❚

:::::::::::::::::::::::::::::::::::::::::::::::::::::::::::::::

FOCUS. Mode e incuinament a van sot braç

La industrie de mode e je une industrie globâl dal valôr di 2,4 miliarts di dolars, che e da lavôr a plui o mancul 50 milions di personis e che e je calcolade une des industriis plui incuinantis tal mont. Il setôr al è responsabil dal 10% des emissions mondiâls di anidride carboniche. Al è stât calcolât che lis emissions di CO2 produsudis de mode a cressaran dal 60% intai prossims 12 agns. Al baste pensâ che dome il traspuart de industrie dai jeans al prodûs il 13% des emissions anuâls totâls di CO2. Par produsi tocs di vistiari, ancje l’ûs di aghe al è tant grant: si stime che e sedi cheste la cause dal 20% de straçarie globâl di aghe. Dome pe realizazion di une maiute si doprin 2.700 litris di aghe, dute chê che i coventarès a une persone par trê agns. Un altri dam ecologjic grandonon colegât aes risorsis idrichis al è chel dal smaltiment di dutis lis sostancis tossichis che cu chês a vegnin tratâts i tocs di vistiari. Di fat, lis culturis di coton dispès a doprin inseticidis e pesticidis, e la lavorazion dai pielams e je pericolose in potence par vie dal ûs di diviers prodots chimics. Ancje lis abitudins intal consum di vistiari a incidin tal fiscâ l’ambient: in ocident o comprìn vistîts 400 voltis di plui che vincj agns indaûr. In chescj vincj agns, i vistîts a son deventâts simpri plui economics e di cualitât plui basse, in chest  mût lis personis a son indusudis a comprâ simpri plui prodots che a vegnin conservâts par periodis cetant curts, ancje di dome une stagjon. ❚

:::::::::::::::::::::::::::::::::::::::::::::::::::::::::::::::

LINK & LEAMS

Si pues lâ a viodi lis scarpis “Re49”, e ancje comprâlis, sul sît www.re49.it. La dite e à la pagjine Facebook e chê LinkedIn li che e publiche lis gnovis de aziende: www.facebook.com/re49.it, www.linkedin.com/company/re49. Al è atîf ancje il profîl Instagram: www.instagram.com/re49_shoes. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +