
“Coniugâ logjistiche e manifature e jessi un sburt no dome pai trafics, ma ancje pe industrie di une aree largje”. Sintetizât di Zeno D’Agostino, president de Autoritât di sisteme portuâl dal mâr Adriatic orientâl che al guvierne il puart di Triest e in curt ancje chel di Monfalcon, al è chest l’obietîf che si met cumò il puart triestin: prin in Italie par tonelaç totâl movimentât, prin puart talian par trafic feroviari e prin puart petrolifar intal Mediterani. Une prestazion di primât, che e vierç gnovis prospetivis ancje pes zonis industriâls furlanis dilunc dal coridôr Adriatic-Baltic.
President D’Agostino, pontaiso a gnûfs records?
“Za cui numars in man al principi dal an, o pensìn di passâ i 10 mil trens, intal 2017 a son stâts 8 mil 681, cuntun aument dal 13,76% sul 2016 e dal 45,17% a pet dal 2015. La componente feroviarie si inricjìs simpri di plui cun modalitâts diviersis di traspuart. Cjalant la mape dai colegaments intermodâi dal puart, e risulte une gnove rêt di destinazions feroviariis che intal ultin trieni e je lade slargjantsi, cjapant ducj i grops principâi dal continent, che tancj di chei no si jerin podûts programâ fin a cualchi an fa”.
Par esempli?
“Il Kiel-Göteborg sul as Adriatic-Baltic e il colegament resint viers Zeebrugge in Belgjiche che al permet di rivâ ae Gran Bretagne di Triest. La destinazion finâl des marcjanziis che a passin pal puart di Triest e je simpri plui a Nord, ancje in Scandinavie. Al è un disvilup sorprendent e unic tra i puarts dal Mediterani. Sul as Est european, invezit, il servizi viers Budapest al è tra chei a plui alte prestazion cu lis atuâls 10 cubiis di trens a setemane. Lu potenziarìn e o cirarìn di sfrutâ il fat che la citât e à conessions feroviariis cu la Cine intune otiche di integrazion”.
Cualis sono lis ricjadudis pal Friûl de esplosion dai trafics dal puart di Triest?
“Par esempli Çarvignan al è daûr a lâ fuart. Vuê l’interpuart al è plen, ancje in graciis de acuisizion di un gnûf trafic di machinis che al jere indreçât su la aree triestine, ma che nol jere pussibil gjestî cu lis nestris infrastruturis e ativitâts: cheste e je la capacitât di fâ sisteme. Cu la imprese feroviarie Adriafer (controlade al 100% de Autoritât triestine, ndr), insiemi a nestris clients, o stin studiant une serie di shuttle feroviaris tra il puart di Triest e Çarvignan, aumentant il trafic sul interpuart”.
Ma se al è satur, ce si fasial?
“Si fasin altris infrastruturis, ma dome cuant che al è un client che al domande spazis e al garantìs un plan economic finanziari che al sosten lis gnovis iniziativis. I invistiments ju ripaie il privât, cemût che al sucêt intal puart di Triest. Fin in chel moment si dopre l’esistent: Çarvignan, Pordenon, Gurize…”.
I trens che a partissin dal puart di Triest sono avonde doprâts des aziendis furlanis?
“Il bum dai trafics feroviaris dal puart di Triest al è daûr a cjapâ dentri lis basis logjistichis di dut il teritori regjonâl, al è un circul virtuôs. O resonìn in tiermins di economiis di scjale. Il trafic locâl al beneficie di chel internazionâl. O rivìn a creâ servizis intermodâi che di chei i sistemis industriâi, i distrets de aree furlane si servissin, su destinazions di interès ancje pal trafic locâl, che di bessôl nol rivarès a alimentâ i trens”.
I sistemis furlans fevelino cul puart di Triest?
“Di un pâr di agns o stin dialogant cuntune serie di sistemis, di distrets e di realtâts singulis di une cierte struture e dimension. A son in cors ancje resonaments cul mont dal vin, che al à dibisugnis precisis in tiermins logjistics”.
E Puart di Noiâr? Cemût si inserissial intal percors di integrazion di puarts e interpuarts regjonâi?
“Nol è intes nestris competencis e no sai se lu sarà mai. A Puart di Noiâr a son 7 metris di pescjade, plui o mancul 10 metris a Monfalcon, 18 a Triest. In virtût di cheste situazion, a Puart di Noiâr a varessin di rivâ lis nâfs piçulis, chês mediis a Monfalcon, lis grandis nâfs a Triest. Si podarès fâ un dragament par cressi la profonditât, ma si varès di pensâ ancje a servizis di spuele di marcjanzie tra i puarts di Triest e di Monfalcon cun Puart di Noiâr, che al à grandis pussibilitâts”.
Tancj a pensin che lis infrastruturis a sedin l’unic element di competitivitât dal teritori. E lui?
“Jo no. Si pues vinci cence jessi competitîfs cuant che si cjape a bracecuel l'”ocean blu” (tra i miôr modei strategjics di afârs tal mont, ndr), che al vûl dî dâ un valôr inovatîf a alc che za al esist, esplorant gnûfs spazis di marcjât. O pensi ai distrets industriâi furlans, sburt di setôrs impuartants tant che la cjadree, il mobil, lis produzions agroalimentârs, cu lis lôr particolaritâts, competencis, abilitâts operativis, che a son dome lôr: tancj oceans blu che, midiant di une inovazion di valôr, a puedin fâ cressi il teritori. Il futûr dal sisteme regjonâl al è culì. Di oceans blu o podìn creânt cetancj che o volìn, parcè che o vin un teritori che al à une grande capacitât di disvilup, di inovazion, che no je dome chê tecnologjiche”.
E no varìno bisugne di gnovis oparis par supuartâ in maniere adeguade i disvilups futûrs previodûts dai trafics comerciâi?
“O podaressin vê problemis di capacitât feroviarie, no intal numar, ma inte tipologjie dai trens. In chest sens, Rete ferroviaria italiana e à planificât za, e in tancj câs finanziât, lavôrs di adeguament de rêt che a ‘nt incressaran la produtivitât. A son pûr simpri intervents impuartants dal pont di viste economic, ma l’impat sul teritori al è tant diviers in confront a chel che al sucedarès fasint sù implants. Cuant che si fevele di gnovis infrastruturis si dopre pôc il cerviel. Intune regjon tant che il Friûl-Vignesie Julie, cun 3 puarts e 4 interpuarts, pensâ di costruî alc altri al è fûr di ogni logjiche”.
di Erika Adami
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



