Trente agns indaûr nus lassave il mitic armonicist Amato Matiz “Pakai”, l’om che cul so ensemble cjargnel al à fat balâ e insumiâ une epoche. In onôr di chest toc di storie musicâl, ai 14 di Jugn inte sale de Zoventût di Timau, la associazion “Giovins Cjanterins di Cleulas” e organize il cuart concors internazionâl armonicistic “Trio Pakai”, ven a stai il premi plui impuartant di chenti par chest strument, anticipât di un conciert inaugurâl sabide ai 13 di Jugn a Paluce (o cjatais dutis lis informazions tal sît carniarmonie.it/premiopakai o te pagjine Facebook: www.facebook.com/premiofisarmonicisticotriopakai).
Il concors, che al à la direzion artistiche di Alessio Screm e la direzion organizative di Hans Puntel, al previôt cuatri sezions: armoniche classiche, armoniche variété/folk, diatoniche variété/folk e musiche di cjamare classiche. Lis categoriis a son dividudis par fassis di etât: Baby (fint a 10 agns), Junior (di 11 a 14 agns), Young (di 15 a 17) e Senior (di 18 agns in sù). La jurie internazionâl chest an e je presiedude di Verena Unterguggenberger, mestre di armoniche te scuele di musiche Kötschach-Mauthen-Lesachtal, chê slovene e je rapresentade di Alexander Ipavec e chê taliane di Alex Modolo, Massimo Pividori e Adolfo Del Cont. Il montepremi totâl al è di 2.500 euros, cun sconts par comprâ e acuardâ i struments tai negozis aderents. Cun di plui, pes sezions armoniche variété/folk, diatoniche variété/folk, al è ancje un premi speciâl pes composizions ineditis. Po dopo, lis miôr composizions a saran publicadis intune racuelte di spartîts “Stile Pakai” e dutis lis esibizions racueltis intun prodot discografic pe etichete Accademia del Disco.
LA STORIE Ma fasìn un pas indaûr. Amato al nas tal 1931 jù pal Moscjart, a Cleulis, in Cjargne, di Jacum, origjinari di Paulâr e di Margarite Maieron, di Cleulis. Sostignût inte sô passion da vecjos sunadôrs dal puest, Pakai (il sorenon ereditât dal nono), al cjape in man i imprescj fin di piçul e no ju molarà plui. Il Trio Pakai – Genesio Puntel al cuintribàs, Paolo Morocutti ae ghitare e po dopo Stefano Paletti ae vôs – al sarà un dai prin grups folk cjargnei a vê sucès tal forest e un dai prins a regjistrâ un disc. Un progjet tignût dongje propit de figure di Amato Matiz: «Un om dal popul, che cu la sô simpatie e serietât al è stât bon di apassionâ plui di une gjenerazion» al note Screm. «Une persone semplice, un di nô, viert a dut e a ducj, pront a scherçâ e a ridi, di buine compagnie» al ricuarde Celestino Vezzi te publicazion Amato Matiz Pacai, un om e la sô armoniche «un sunadôr che ogni fieste al tirave dongje di se te sô ostarie une trope di sunadôrs e di musicants. Insiemi a lôr al dave vite a moments di ligrie e di vere musiche popolâr». Par agns la sô musiche e je stade insostituibile tes sagris, ma ancje tai batisims e tai matrimonis di dut il Friûl.
Ma ce ereditât nus aial lassât in dì di vuê? «A son tancj musiciscj, ancje zovins, che a rivin dal Friûl e di altris bandis de Italie, de Austrie e de Slovenie, che à an cjapât la maniere di sunâ “a la Pakai”, ven a stâi un ciert virtuosisim tipic de tradizion armonicistiche mitteleuropeane» al rispuint il diretôr artistic Alessio Screm. La armoniche ise duncje un strument ancjemò atuâl? «Sigûr. Tai ultins agns si insegne ancje al conservatori, vignint cussì nobilitade a strument di studi» al sclarìs il musicolic «a son professioniscj di nivel tant che Manuel Šavron, sloven, che al à vinçude la prime edizion dal concors e che al à za publicâ trê album. O zovinis promessis tant che Martina Spollero, 14 agns, dal grup armoniciscj di Tarcint, che e à vinçût tal 2012». La armoniche, duncje, e je futûr e passât de nestre culture musicâl e folcloristiche. Ma buine ancje di cjalâ fûr dal Friûl, propit cemût che al veve fat Pakai: «O sin daur a pensâ a un percors itinerant dal concors» al siere Screm «jenfri Friûl, Austrie e Slovenie: trê nazions confinantis tignudis dongje de armoniche, daûr dal non di Amato Matiz “Pakai”». ❚
✒ N.G.
