Sfuei Mensîl Furlan Indipendent
Archivi de Patrie

Al rive l’om dal sud. Fincantieri tal puint di comant, ma Udin al reme cuintri

............

Giuseppe Bono, nassût a Pizzoni (Catanzaro) ai 23 di Març dal 1944, al è il gnûf president di Confindustrie F-VG. Laureât in Economie e cumierç te Universitât di Messina, al à passade dute une vite di vore dentri de grande industrie taliane publiche, tacant de assunzion intune partecipade di Fiat e Finmeccanica a Catanzaro al rûl di cumò di delegât aministradôr di Fincantieri, aziende leader mondiâl intal setôr des costruzions navâls cun direzion gjenerâl a Triest e cantîrs sparniçâts in dute la Penisule (chei plui prossims a son a Monfalcon e a Marghera). Chê stesse Confindustrie di indulà che Bono, manager di Stât sorevivût al passaç de Prime ae Seconde republiche (di socialist sponsorizât di Giuliano Amato al è deventât un “fûr dal trop”, preseât ancje dal Centridiestre), no plui tart di trê agns indaûr al veve menaçât di mandâ fûr Fincantieri – su la onde de “sbregadure” procurade di Sergio Marchionne e de Fiat -, denunziant une disposizion masse “fofe” viers dai sindicâts. Chê volte, la jessude di Bono e veve cjatât un acet negatîf de bande des associazions teritoriâls locâls, in particolâr di chê di Udin: il so president di chê volte, Adriano Luci, al veve sotlineât cemût che propit il dialic tra lis fuarcis sociâls al ves rapresentât (e al rapresente ore presint) un dai grancj ponts di fuarce de economie furlane. La opare di “ricusidure”, puartade indenant di chel che al jere ae vuide dai Industriâi di Gurize Gianfranco Di Bert, e – in maniere plui scuindude, si dîs – une “persuasion morâl” a nivel politic nazionâl cul riclam a une disposizion plui prudente in presince di une crisi economiche cence precedents, a vevin ritirât dut, includût il plan di 2.500 tais a nivel statâl che il stes Bono al veve presentât. E la svelte dismentie che chescj agns folcjâts a destinin a ogni robe e à fat il rest.
La sielte dal non di Bono, vignude di bandi di “savis” di Confindustrie F-VG, no à cjatât però consens ecessîfs. Anzit, cuintri la sô designazion a Udin e je partide la mobilitazion de base, che e à puartât ae fin palaç Torriani a esprimi une posizion clare, ancje se cirint di evitâ la roture: l’anunzi di une astension al vôt pe nomine dal gnûf president al à però il valôr di une cjapade di distance nete. Di chê altre bande, inte otiche de solite logjiche de “rotazion” teritoriâl, al scjadê dal mandât dal udinês Alessandro Calligaris (che al à cjapât il puest Adalberto Valduga; e ancje intal câs di Calligaris si à regjistrât a nivel teritoriâl une cierte dissension, ma dissimulade in spirt confindustriâl pûr), il comant al tocjave a une altre provincie. Stant ai “si dîs”, tra lis resons che a varessin puartât ae sielte di Bono e sarès la sô visibilitât tant che aministradôr delegât di Fincantieri (che par chê, par altri, al pâr che il Guvier al sedi daûr a pensâ cumò a une privatizazion parziâl) e i siei bogns rapuarts a nivel roman, di là de volontât di rinfuarçâ il “leam” tra il colòs de cantieristiche e il teritori. Fat al sta che, par Gurize, Pordenon e Triest, al è la dimostrazion de incapacitât di proponi un nominatîf che al sedi une espression autentiche dal teritori. Il fat dopo che a vuidâ la Confindustrie regjonâl al sedi un rapresentant de grande industrie e par di plui di Stât e no dal “privât” – intun teritori che il so tiessût produtîf al è costituît cuasi in maniere esclusive di piçulis impresis, o sedi la cuinte essence dal “privât” –, le dîs lungje. La crisi dal eletrodomestic e l’anunziât “disimpegn” de Electrolux, abil intai agns passâts a “imponi” la elezion di Piero Della Valentina al vertiç di Confindustrie regjonâl, e à rindude ancjemò plui delicade la posizion di Pordenon (za al centri di “vôs” par altris vicendis sul as Pordenon-Triest), intant che Gurize e paie il so scjars pês industriâl. Ben al à fat alore Udin a rimarcâ cheste sô cjapade di distance, peade no dome al non indicât e pôc rapresentatîf dal teritori e de “tipologjie” ancje dimensionâl des impresis locâls, ma ancje al fat di jessi restât l’unic a sostignî – intal ambit de anunziade riforme di Confidustrie – une fusion plui zovevule e “sparagnadore” tra lis associazions teritoriâls a pet dal asset federatîf proponût des consûrs dal F-VG. Par cumò al à incassât une “temerose” viertidure di Bono, dome pe istituzion pussibile di une sole sede a nivel regjonâl. Pôc, tant pôc, ma cuissà che nol sedi il principi di un dialic che di chel, par altri, Bono nol pues no tignî cont. Dal rest, Udin – fuart dal “pês” no dome numeric ma ancje cualitatîf e in tiermins di Pil prodot de sô industrie – al pues stâ trancuil e lâ indevant pe sô strade. No je la prime volte che Palaç Torriani al fâs sieltis in cuintritindince a pet di chês altris rapresentantis teritoriâls: chê plui resinte e je stade chê di poiâ la candidature di Giorgio Squinzi al vertiç di Confindustrie taliane, intant che Gurize-Triest e Pordenon – ma ancje la stesse Confindustrie regjonâl, cun Calligaris – a vevin decidût par Alberto Bombassei. Al à vinçût Squinzi. Se il bundì si viôt de buinore… ❚
Linux

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +